Б.Содномдаржаа, Ц.Амгаланбаатар нарыг 2-оос олон хүний амийг хөнөөсөн гэж үзжээ
Төр нийгмийн нэрт зүтгэлтэн С.Зоригийн амь насыг хөнөөсөн хэргийн шүүх хуралдаан таван хоног үргэлжилсний эцэст өчигдөр шийдвэрээ гаргалаа.
Шүүхээс Ц.Амгаланбаатар, Б.Содномдаржаа нарт 25 жил, Т.Чимгээд 24 жил хорих ял оноосон юм.
Шүүх хуралдааныг даргалагч шүүгч М.Алдарын уншсан шийтгэх тогтоолыг тоймлон хүргэж байна.
Шүүхийн шийтгэх тогтоолд:
Шүүгдэгч Б.Содномдаржааг бусадтай бүлэглэж, шунахайн сэдэлтээр, захиалгаар, онц харгис хэрцгий аргаар, хүнийг санаатай алсан мөн насанд хүрээгүй этгээдийг гэмт хэрэг үйлдэх ажиллагаанд татан оруулсан, мөн бусадтай бүлэглэж урьдчилан үгсэн тохиролцож, давтан үйлдлээр өөр гэмт хэргийг нуун далдлах зорилгоор хохирогчийг биеэ хамгаалж чадахгүй байгааг мэдсээр байж хоёр буюу түүнээс олон хүнийг онц харгис хэрцгий, нийтэд аюултай аргаар хүнийг санаатай алсан гэм буруутайд
Шүүгдэгч Ц.Амгаланбаатарыг бусадтай бүлэглэж хулгайн сэдэлтээр, захиалгаар, онц харгис хэрцгий аргаар хүнийг санаатай алсан, мөн бусадтай бүлэглэж урьдчилан үгсэн тохиролцож, давтан үйлдлээр өөр гэмт хэргийг нуун далдлах зорилгоор хохирогчийг биеэ хамгаалах чадахгүй байгааг мэдсээр байж хоёр буюу түүнээс олон хүнийг онц харгис хэрцгий, нийтэд аюултай аргаар хүнийг санаатай алсан гэм буруутайд
Шүүгдэгч Т.Чимгээг бусадтай бүлэглэж, шунхайн сэдэлтээр, захиалгаар, онц харгис хэрцгий аргаар хүнийг санаатай алсан, мөн насанд хүрээгүй этгээдийг гэмт хэрэг үйлдэх ажиллагаанд татан оруулсан гэм буруутайд тус тус тооцсугай гэсэн байв.
Үүнээс харахад Б.Содномдаржаа, Ц.Амгаланбаатар, Т.Чимгээ нар захиалгаар, шунахайн сэдлээр С.Зоригийн амь насыг хөнөөсөн болохыг шүүх тогтоож. Харин Захиалагч хэн байв гэдэг асуулт хариултгүй үлдэж байна.
Мөн Б.Содномдаржаа, Ц.Амгаланбаатар нарт давтан үйлдлээр өөр гэмт хэргийг нуун далдлах зорилгоор хохирогчийг биеэ хамгаалж чадахгүй байгааг мэдсээр байж хоёр буюу түүнээс олон хүнийг онц харгис хэрцгий, нийтэд аюултай аргаар хүнийг санаатай алсан хэрэгт нь мөн ял оноосон байна.
Тэгэхээр хуулийн байгууллагаас Б.Содномдаржаа, Ц.Амгаланбаатар нарыг С.Зоригийн амь насыг хөнөөснөөс гадна доод тал нь хоёр хүний амийг хөнөөсөн гэж үзжээ. Тиймээс ч шүүх хуралдааны зар дээр анх зөвхөн С.Оюуныг хохирогчоор зарласан байсан бол шийтгэх тогтоол унших үед С.Оюун, Хишгээ, Мөнхжаргал нарыг хохирогч хэмээсэн байв.
Мөн Б.Содномдаржаа, Ц.Амгаланбаатар нарыг онц аюултай гэмт хэрэгтэн гэж зарлан, шийтгэлийнх нь дийлэнх хугацааг гянданд өнгөрүүлэхээр болсон байна.
Түүнчлэн шүүгчдэгч Ц.Амгаланбаатар 2007 онд таксины жолоочийн амийг онц хэрцгийгээр бүрэлгэсэн хэрэг үйлдэн, ял эдэлж байгаа. Түүнд Орхон аймгийн сум дундын шүүхээс 2010 оны зургаадугаар сарын 16-ны өдрийн шийтгэх тогтоолоор 25 жилийн хорих ял оногдуулсан аж. Ц.Амгаланбаатарт дээрх 25 жилийн ялаас өчигдрийн буюу арванхоёрдугаар сарын 27-ны өдрийн байдлаар 16 жил долоон сар 9 хоногийн хугацаа үлдээд байсныг С.Зоригийн хөнөөсөн хэрэгт оногдуулсан 25 жил хорих ялд нь багтаан шийтгэхээр болжээ.
Шүүгдэгчдийн ар гэрийнхэн давж заалдах шатны шүүхэд хандахаа мэдэгдсэн. Тиймээс хуулийн дагуу анхан шатны шүүхийн шийдвэрийг дараагийн шатны шүүхийн шийдвэр гарах хүртэл түдгэлзүүлэх юм байна. Ингэснээр шүүгдэгч Ц.Амгаланбаатар, Т.Чимгээ, Б.Содномдаржаа нарт урьд авсан цагдан хорих таслан сэргийлэх арга хэмжээг хэвээр үлдээсэн байна.
Ц.Амгаланбаатар, Т.Чимгээ, Б.Содномдаржаа нар энэ хэрэгт холбогдсоноосоо хойш 484 хоног цагдан хоригджээ.
Шүүгчийн уншсан шийтгэх тогтоол
1. Шүүгдэгч Б.Содномдаржааг бусадтай бүлэглэж, шунахайн сэдэлтээр, захиалгаар, онц харгис хэрцгий аргаар, хүнийг санаатай алсан мөн насанд хүрээгүй этгээдийг гэмт хэрэг үйлдэх ажиллагаанд татан оруулсан, мөн бусадтай бүлэглэж урьдчилан үгсэн тохиролцож, давтан үйлдлээр өөр гэмт хэргийг нуун далдлах зорилгоор хохирогчийг биеэ хамгаалж чадахгүй байгааг мэдсээр байж хоёр буюу түүнээс олон хүнийг онц харгис хэрцгий, нийтэд аюултай аргаар хүнийг санаатай алсан гэм буруутайд
Шүүгдэгч Ц.Амгаланбаатарыг бусадтай бүлэглэж хулгайн сэдэлтээр, захиалгаар, онц харгис хэрцгий аргаар хүнийг санаатай алсан, мөн бусадтай бүлэглэж урьдчилан үгсэн тохиролцож, давтан үйлдлээр өөр гэмт хэргийг нуун далдлах зорилгоор хохирогчийг биеэ хамгаалах чадахгүй байгааг мэдсээр байж хоёр буюу түүнээс олон хүнийг онц харгис хэрцгий, нийтэд аюултай аргаар хүнийг санаатай алсан гэм буруутайд
Шүүгдэгч Т.Чимгээг бусадтай бүлэглэж, шунхайн сэдэлтээр, захиалгаар, онц харгис хэрцгий аргаар хүнийг санаатай алсан, мөн насанд хүрээгүй этгээдийг гэмт хэрэг үйлдэх ажиллагаанд татан оруулсан гэм буруутайд тус тус тооцсугай.
2. Прокуророос шүүгдэгч Б.Содномдаржаа, Т.Чимгээ нарт 1986 оны Эрүүгийн хуулийн тусгай ангийн 241 дүгээр зүйлд зааснаар яллах дүгнэлт үйлдэж ирүүлсэн хэргийг Эрүүгийн байцаан шийтгэх хуулийн 24 дүгээр зүйлийн 24.1.2 дахь хэсэгт заасныг үндэслэн хэрэгсэхгүй болгож шүүгдэгч Б.Содномдаржаа, Т.Чимгээ нарыг Эрүүгийн хуулийн ерөнхий ангийн 72 дугаар зүйлийн 72.1.2 дахь хэсэгт зааснаар эрүүгийн хариуцлагаас чөлөөлсүгэй.
3. Шүүгдэгч Б.Содномдаржааг 2002 оны Эрүүгийн хуулийн ерөнхий ангийн 12 дугаар зүйлийн 12.1 дэх хэсэгт заасныг журамлан Эрүүгийн хуулийн тусгай ангийн 91 дүгээр зүйлийн 91.2.1, 91.2.3, 91.2.11, 91.2.12 дэх хэсэгт зааснаар 24 жилийн хугацаанд хорих, мөн 2002 оны Эрүүгийн хуулийн тусгай ангийн 91.2.6, 91.2.10, 91.2.11, 91.2.12, 91.2.13, 91.2.15, 91.2.16 дэх хэсэгт зааснаар 25 жил хорих ялаар
Шүүгдэгч Ц.Амгаланбаатарыг 2002 оны Эрүүгийн хуулийн ерөнхий ангийн 12 дугаар зүйлийн 12.1 дэх хэсэг, мөн 52 дугаар зүйлийн 52.3-т заасныг журамлан Эрүүгийн хуулийн тусгай ангийн 91 дүгээр зүйлийн 91.2.1, 91.2.4, 91.2.11, 91.2.12 дэх хэсэгт зааснаар 15 жилийн хугацаанд хорих ялаар, мөн 2002 оны Эрүүгийн хуулийн тусгай ангийн 91.2.6, 91.2.10, 91.2.11, 91.2.12, 91.2.13, 91.2.15, 91.2.16 дэх хэсэгт зааснаар 25 жил хорих ялаар
Шүүгдэгч Т.Чимгээг 2002 оны Эрүүгийн хуулийн ерөнхий ангийн 12 дугаар зүйлийн 12.1 дэх хэсэгт заасныг журамлан Эрүүгийн хуулийн тусгай ангийн 91 дүгээр зүйлийн 91.2.1, 91.2.3, 91.2.11, 91.2.12 дэх хэсэгт зааснаар 24 жилийн хугацаанд хорих ялаар тус тус шийтгэсүгэй.
4. Эрүүгийн хуулийн ерөнхий ангийн 57 дугаар зүйлийн 57.1 дэх хэсэгт заасныг журамлан шүүгдэгч Б.Содномдаржааг 2002 оны Эрүүгийн хуулийн ерөнхий ангийн 12 дугаар зүйлийн 12.1 дэх хэсэгт заасныг журамлан Эрүүгийн хуулийн тусгай ангийн 91 дүгээр зүйлийн 91.2.1, 91.2.3, 91.2.11, 91.2.12 дэх хэсэгт зааснаар 24 жилийн хугацаанд хорих ялыг 2002 оны Эрүүгийн хуулийн тусгай ангийн 91.2.6, 91.2.10, 91.2.11, 91.2.12, 91.2.13, 91.2.15, 91.2.16 дэх хэсэгт оногдуулсан 25 жил хорих ялд багтааж түүний биечлэн эдлэх ялыг нийт 25 жилийн хугацаанд
Шүүгдэгч Ц.Амгаланбаатарт 2002 оны Эрүүгийн хуулийн ерөнхий ангийн 12 дугаар зүйлийн 12.1 дэх хэсэг, мөн 52 дугаар зүйлийн 52.3-т заасныг журамлан Эрүүгийн хуулийн тусгай ангийн 91 дүгээр зүйлийн 91.2.1, 91.2.4, 91.2.11, 91.2.12 дэх хэсэгт зааснаар оногдуулсан 15 жилийн хугацаанд хорих ялыг 2002 оны Эрүүгийн хуулийн тусгай ангийн 91.2.6, 91.2.10, 91.2.11, 91.2.12, 91.2.13, 91.2.15, 91.2.16 дэх хэсэгт зааснаар оногдуулсан 25 жил хорих ялд багтааж, биеэр эдлэх ялыг 25 жилийн хугацаанд тус тус тогтоосугай.
5. Эрүүгийн хуулийн ерөнхий ангийн 57 дугаар зүйлийн 57.3 дах хэсэгт заасныг журамлан шүүгдэгч Ц.Амгаланбаатарт Орхон аймгийн сум дундын шүүхээс 2010 оны 6 сарын 16-ны өдрийн 78 дугаартай шийтгэх тогтоолоор 25 жилийн хорих ял оногдуулснаас эдлээгүй хугацаа 16 жил 7 сар 9 хоногийн хугацаанд хорих ялыг энэ тогтоолоор оногдуулсан 25 жил хорих хугацаанд багтааж түүний биечилэн эдлэх ялыг 25 жилийн хугацаанд хорих ялаар тогтоосугай.
6. Эрүүгийн хуулийн ерөнхий ангийн 24 дүгээр зүйлийн 24.1.2 дахь хэсэгт заасныг журамлан шүүгдэгч Ц.Амгаланбаатарыг, мөн хуулийн 24 дүгээр зүйлийн 24.1.3 дахь хэсэгт заасныг журамлан шүүгдэгч Д.Содномдаржааг тус тус онц аюултай гэмт хэрэгтнээр тооцсугай.
7. Эрүүгийн хуулийн ерөнхий ангийн 52 дугаар зүйлийн 52.7, 52.11 дэх хэсэгт заасныг журамлан шүүгдэгч Б.Содномдаржаад оногдуулсан 25 жилийн хугацаанд хорих ялын заримыг буюу 23 жил хорих ялыг гянданд, үлдэх ялыг онцгой дэглэмтэй хорих ангид, шүүгдэгч Ц.Амгаланбаатарт оногдуулсан 25 жилийн хугацаанд хорих ялын заримыг буюу 20 жил хорих ялыг гянданд, үлдэх ялыг онцгой дэглэмтэй хорих ангид
Эрүүгийн хуулийн 52 дугаар зүйлийн 52.6 дахь хэсэгт заасныг журамлан шүүгдэгч Т.Чимгээд оногдуулсан 24 жил хорих ялыг чанга дэглэмтэй эмэгтэйчүүдийн хорих ангид тус тус эдлүүлсүгэй.
8. Эрүүгийн хуулийн ерөнхий ангийн 59 дүгээр зүйлийн 59.1, 59.2 дахь хэсэгт заасныг журамлан шүүгдэгч Ц.Амгаланбаатар 484 хоног, Т.Чимгээ 484 хоног, Б.Содномдаржаа 484 хоног цагдан хоригдсон хоногийг тус тус ял эдэлсэн хоногт тооцсугай.
9. Шүүгдэгч Ц.Амгаланбаатар, Б.Содномдаржаа, Т.Чимгээ нар бусдад төлөх төлбөргүй, хохирогч Оюун, Хишгээ, Мөнхжаргал нар төлбөр нэхэмжлээгүй болохыг дурьдсугай.
10. Эрүүгийн байцаан шийтгэх хуулийн 88 дугаар зүйлийн 88.1.3, 88.1.7 дахь хэсэгт зааснаар хэрэгт эд мөрийн баримтаар хураагдаж ирсэн эд зүйлсийг шийтгэх тогтоолын хавсралтад зааснаар шийдвэрлэхийг тэмдэглэсүгэй.
11. Шийтгэх тогтоолыг танилцуулан сонсгосноор хуулийн хүчинтэй болох бөгөөд шүүгдэгч Ц.Амгаланбаатар, Т.Чимгээ, Б.Содномдаржаа нарт авсан цагдан хорих таслан сэргийлэх арга хэмжээг хэвээр үлдээж тэдний эдлэх ялыг энэ өдрөөс эхлэн тооцсугай.
12. Энэ тогтоолыг шүүгдэгч, хохирогч нар, тэдгээрийн өмгөөлөгчид эс зөвшөөрвөл тогтоолыг гардуулснаас хойш 14 хоногийн дотор Нийслэлийн Эрүүгийн хэргийн давж заалдах шатны шүүхэд гомдол гаргах, улсын яллагч эсэргүүцэл бичих эрхтэй болохыг дурьдсугай.
13. Давж заалдах шатны шүүхэд гомдол гаргасан, эсэргүүцэл бичсэн тохиолдол тогтоолыг түдгэлзүүлж, тогтоол биелүүлэх хүртэл шүүгдэгч Ц.Амгаланбаатар, Т.Чимгээ, Б.Содномдаржаа нарт урьд авсан цагдан хорих таслан сэргийлэх арга хэмжээг хэвээр үлдээсүгэй.
Даргалагч шүүгч, ерөнхий шүүгч М.Алдар, шүүгч С.Оюунчимэг, Б.Мөнх-Эрдэнэ.
