Нөхөн сэргээлт нэрийн дор хууль бусаар ашигт малтмал олборлож байжээ

Цагдаагийн байгууллагаас орон нутагт "Байгаль хамгаалах журмын эсрэг гэмт хэрэг”-тэй тэмцэх чиглэлээр хэрэгжүүлж байгаа ажлуудын талаар ЦЕГ-ын Хэвлэл мэдээллийн төвийн дарга, цагдаагийн хошууч Б.Баатархүү өнөөдөр мэдээлэл хийлээ.

Тэрбээр "Сэлэнгэ аймгийн цагдаагийн газраас тус аймгийн Ерөө, Хүдэр сумд болон Бугант тосгоны нутаг дэвсгэрт нөхөн сэргээлтийн үйл ажиллагаа явуулахаар Сумдын ИТХ, Засаг даргын тамгын газраас зөвшөөрөл авсан аж ахуйн нэгж байгууллага, иргэдийг аймгийн Мэргэжлийн хяналтын газар, Байгаль орчны албадтай хамтарсан ажлын хэсэг байгуулж Хүдэр, Могойн голуудад газар дээр нь очиж үзлэг шалгалтыг зохион байгуулсан байгаа.

Шалгалтаар,

• Эвдэрсэн газрыг нөхөн сэргээх нэрийн дор хууль бусаар ашигт малтмал олборлох үйл ажиллагаа явуулсан “С” захиралтай “Агро копт” ХХК нь Хүдэр сумын “Нуурын тагт” нэртэй газарт байгаль экологид 95 гаруй сая төгрөгийн хохирол учруулсан, “Б”-д холбогдох Ерөө сумын Могойн гол нэртэй газарт хууль бус аргаар ашигт малтмал олборлож, байгаль экологид 10 гаруй сая төгрөгийн хохирол учруулсан хэрэгт тус тус Эрүүгийн хуулийн 214 дүгээр зүйлийн 214.2 дахь хэсэгт зааснаар эрүүгийн хэрэг үүсгэн шалгаж байна.
   
• Мөн “Б” гэгч нь Хүдэр сумын нутагт хууль бусаар ашигт малтмал олборлох үйл ажиллагаа явуулж байгаль экологид 270 гаруй сая төгрөгийн хохирол учруулсан нь шинжээчийн дүгнэлтээр тогтоогдож, эрүүгийн хуулийн 214 дүгээр зүйлийн 214.2 дахь хэсэгт зааснаар эрүүгийн хэрэг үүсгэх саналтайгаар прокурорын байгууллагад материалыг хүргүүлсэн байна.
   
• Хамтарсан ажлын хэсэг “Б”, “Г, “Б” нарт холбогдох гол усыг бохирдуулсан, хууль бусаар үйл ажиллагаа явуулсан гэмт хэргийн шинжтэй үйлдлүүдэд шалгалтын ажиллагааг үргэлжлүүлэн ажиллаж байна.

Сэлэнгэ аймгийн иргэдийн зүгээс гол, ус бохирдож байгаа талаар мэдээлэл өгч байгаа бөгөөд энэ дагуу цагдаагийн болон холбогдох байгууллагууд шалгалтын ажлыг хийж байгаа" гэлээ.