АСЕМ-ын Хүнсний аюулгүй байдлын хуралд НЭМХ-ийн санал дэмжигдэв
АСЕМ-ын дээд түвшний уулзалтын дагалдах хурлуудын нэг Ази-Европын Хүнсний аюулгүй байдлын зөвлөлдөх уулзалт энэ сарын 20-21-ний өдрүүдэд Төрийн ордонд амжилттай болж өндөрлөсөн билээ.
Энэхүү уулзалтад АСЕМ-ын гишүүн 17 орны хүнс хөдөө аж ахуйн асуудал хариуцсан төрийн болон төрийн бус байгууллагын төлөөлөл, Монгол дахь Элчин сайдын яамд, консулын газрууд, Европын холбоо, НҮБ-ын ХХААБ, ДЭМБ, НҮБХС, Койка гэх мэт хүнс хөдөө аж ахуй, эрүүл мэндийн чиглэлээр төсөл хөтөлбөр хэрэгжүүлж буй 11 олон улсын байгууллага, МУ-ын Үндэсний аюулгүй байдлын зөвлөл, ХХААЯ, ЭМСЯ, МХЕГ, НЭМХ, МЭХ, МХХ, СҮНЭХ зэрэг төрийн ба төрийн бус байгууллагын нийт 130 төлөөлөгч оролцлоо. Тус зөвлөлдөх уулзалтад НЭМХ-г төлөөлж захирал, АУ-ны доктор Б.Цогтбаатар; ХСТ-ийн дарга, АУ-ны доктор Ж.Батжаргал; ЭШТА, АШУ-ны доктор У.Цэрэндолгор; ЭША, ХАБ-судлаач Б.Энхтунгалаг, ЭША Н.Болормаа нар оролцов.
Уулзалтын гол сэдэв нь хөдөө аж ахуйн үйлдвэрлэлийг хурдасгах замаар АСЕМ-ын гишүүн орнуудын дунд хүнсний хангамжийг сайжруулах, төр хувийн хэвшлийн хамтын ажиллагааг дэмжих, мөн үндэсний болон бүс нутгийн бодлогыг үр ашигтайгаар зохицуулахад чиглэгдэж байв.
- “Ази, Европын бүс нутгийн хүнсний хангамжийн асуудал, хүнсний бүтээгдэхүүний худалдаа, тээвэр логистикийн асуудалд учирч буй техникийн саад тотгор, түүнийг бууруулах арга зам”,
- “Органик хүнсний үйлдвэрлэл, баталгаажуулалтын асуудал, зах зээлийн чиг хандлага”,
- “Генийн өөрчлөлттэй хүнсний бүтээгдэхүүний үйлдвэрлэл цаашдын чиг хандлага”,
- “Мал амьтан, ургамлын гаралтай бүтээгдэхүүний хорио цээр, хил дамнасан малын халдварт өвчний асуудал”,
- “Хүнсний нэмэлтийн зохистой хэрэглээ, анхаарах асуудал”,
- “Хүүхдэд чиглэсэн эрүүл бус хоол хүнсний зар сурталчилгааг хязгаарлах”,
- “Хүүхдийн дундах таргалалтыг бууруулах” зэрэг олон илтгэлүүд тавигдаж, санал солилцсон.
Хоёрдахь өдрийн хуралдаанаар зөвлөлдөх уулзалтад оролцогчид “АСЕМ-ын дээд түвшний уулзалт”-д хүргүүлэх “Ази-Европын Хүнсний аюулгүй байдлын зөвлөлдөх уулзалтын товч тайланг хэлэлцэн баталсан. Гишүүн орнууд хуурамч бараа бүтээгдэхүүн, үүнд хуурамч эм, хоол хүнс хүний эрүүл мэндэд хортой, амь насанд эрсдэл учруулж байгааг ASEM-ийн гишүүн орнууд онцолж байв. Нэгэнт хуурамч бүтээгдэхүүн нэмэгдэж байгаа өнөө үед хуурамч бүтээгдэхүүн эсэхийг шалгах нано шошгололт чухал юм. Нано шошгын нэг загвартай зөвлөлдөх уулзалтад оролцогчид танилцлаа.
Эх сурвалж: Нийгмийн Эрүүл Мэндийн Хүрээлэн
