"Бид "РИО-2016" зуны Олимпийн Алтан түншээр ажиллах болсондоо таатай байна"
СКАЙтел групп нь "РИО-2016" зуны Олимпод Монгол Улсаа төлөөлөн оролцох баг тамирчдыг дэмжих, хувь нэмрээ оруулан ажиллахаар өнөөдөр Монголын Үндэсний Олимпийн Хороотой хамтран ажиллах санамж бичигт гарын үсэг зурлаа.
Энэ үеэр СКАЙтел группийн Гүйцэтгэх захирал Д.Болор өгүүлэхдээ "Бид МҮОХ-тойгоо хамтын ажиллагааны түншлэлийн гэрээг байгуулж, "РИО-2016" зуны Олимпийн Алтан түншээр ажиллах болсондоо таатай байна.
СКАЙтел групп нь Олипизмийг дэмжих, Монгол Улсад нийтийн биеийн тамирыг хөгжүүлэхийг нийгмийн хариуцлагынхаа гол чиглэл болгож ажилладаг.
Тухайлбал, 2012 оны Олимпийн үеэр манай компани нь МҮОХ-той амжилттай хамтарч ажилласан билээ. Энэ удаа уламжлалаа даган "РИО-2016" зуны Олимпийг дэмжиж ажиллахаар боллоо. Ийнхүү өнөөдрөөс эхлэн Олимпод оролцож байгаа тамирчдаа дэмжих томоохон хөтөлбөр маань хэрэгжиж эхэллээ.
Тус хөтөлбөрийн хүрээнд:
- "Рио-2016” зуны Олимпийн наадмыг шууд дамжуулах МҮОНТВ-ийн Алтан түншээр ажиллаж эхлээд байгаа.
- МҮОХ-той Олимпизмийг дэмжих хамтарсан хөтөлбөр хэрэгжүүлэх, “РИО 2016” Зуны Олимпод амжилт гарган медальт байрт шалгарсан бүх тамирчдадаа 9000 серийн алтан дугаар, МОНГОЛдоо дараа төлбөрт үйлчилгээг 4 жил ашиглах эрх, хамгийн сүүлийн үеийн дэвшилтэт ухаалаг rap утасны дээжийн хамт олгохоор болсон.
- "РИО-2016" Олимпийн наадамд зориулан "Олимпийг өнгөлье" тусгай цэнэглэгч картуудыг худалдаан гаргаж, улмаар Монголын баг тамирчдад санхүүгийн нэмэлт дэмжлэг үзүүлэх болно.
Энэ жилийн хувьд "РИО-2016" зуны Олимпод манай улсаас одоогийн байдлаар 40 гаруй тамирчид оролцох эрхээ авчихсан байгаа юм байна. Эдгээр тамирчид маань өмнөх Олимпод гаргасан амжилтуудаа хол давуулан гэдэгт бид итгэлтэй байна" гэлээ.
СКАЙтел группийн Төлөөлөн удирдах зөвлөлийн гишүүн Б.Баттүшиг хэлэхдээ "Миний хувьд спортыг их сонирхдог. Мөн СКАЙтел группийн хувьцаа эзэмшигч гэдэг утгаараа аливаа спортын арга хэмжээ болоход СКАЙтел группийг дэмжихийг уриалдаг.
Өнөөдөр СКАЙтел групп нь "РИО-2016" зуны Олимпийн "Алтан түнш" болж байгаадаа тун их баяртай байна.
Цаашид СКАЙтел групийн удирдах зөвлөлийн гишүүний хувьд, мөн Монголын Бадминтоны холбооны ерөнхийлөгчийн хувьд аливаа спортын арга хэмжээг дэмжиж ажиллах болно" гэв.
МҮОХ-ны Ерөнхийлөгч Д.Загдсүрэн хэлэхдээ "Өнөөдөр бид "Олон улсын Олимийн өдөр"-ийг тохиолдуулан СКАЙтел групптэй хамтран ажиллах санамж бичигт гарын үсэг зурлаа. СКАЙтел групп нь Олимпоос гадна спортын олон холбоог дэмжиж ажилладаг, спортод чин сэтгэлээсээ ханддаг хамт олон.
Ийнхүү хамтын ажиллагааныхаа гэрээг байгуулсанд МҮОХ болон тамирчид маш их баяртай байгаагаа илэрхийлмээр байна" хэмээн ярилаа.
