Ц.Баатархүү: Наймдугаар сарын 31-нд болох НИТХ-аар Ц.Сандуйг огцруулах асуудлыг хэлэлцэнэ
НИТХ дахь Ардчилсан намын бүлгээс өнөөдөр 60 тэрбум төгрөгийн асуудалтай нэр холбогдоод байгаа Ц.Сандуйг огцруулах талаар мэдэгдэл хийлээ.
НИТХ дахь АН бүлгийн дарга Ц.Баатархүү "Төрийн албыг наймаалцаж 60 тэрбум төгрөг босгох МАН-ын удирдлагуудын хэрээс хэтэрсэн үйлдэл үнэн бодит болохыг тус намын Ерөнхий нарийн бичгийн даргаас эхлээд жирийн гишүүд нь өөрсдөө хүлээн зөвшөөрсөн.
Иймд НИТХ дахь АН-ын бүлгээс НИТХ-аар НИТХ-ын даргыг огцруулах асуудлыг хэлэлцэх ёстой гэж үзэж байна.
Иймээс энэ удаагийн наймдугаар сарын 31-нд болох хурлаар уг асуудлыг хэлэлцэнэ" гэлээ.
Сургууль цэцэрлэгийн долоон засварын ажил эхлээгүй байна
НИТХ-ын төлөөлөгч Т.Батцогт "Сургууль цэцэрлэгийн долоон засварын ажил эхлээгүй, дөрвөн ажил 50 хувийн гүйцэтгэлд хүрээгүй байна.
Таван ажил л 50 хувьдаа хүрсэн байна. Эрх баригч намын мэргэжлийн Засийн газар байж, ажлыг маш сайн хийнэ гэдэг нь худлаа байжээ.
Эрх баригчдад хөгжлийн бэлэн бодлого байгаагүй гэдэг нь харагдаж байна.
Ажилгүйдлийг бууруулах чиглэлээр бүтэн нэг жил өнгөрч байхад хийсэн зүйл алга.
Ажлаа явуулаач гэсэн шаардлагыг бид байнга тавьж байгаа" гэлээ.
