"Хүүхэд хулгайлахыг завдсан хэргийг шалгаж байна, Төв талбайд жагссан 3 эмэгтэйг БАРИВЧЛААГҮЙ"
Улаанбаатар хотын Цагдаагийн Газраас цаг үеийн асуудлаар мэдээлэл хийлээ.
ЦЕГ-ын Хэвлэл мэдээллийн төвийн ахлах мэргэжилтэн, цагдаагийн хошууч Ё.Лхагвасүрэн “Энэхүү хэргийг Сүхбаатар дүүрэг дэх Цагдаагийн 1-р хэлтэст шалгаж байна. Гэмт хэргийн хохирогч Т гэгч хүүхэд Сүхбаатар дүүргийн 8-р хороонд оршин суугч, 11 настай. Хүүхдийн биеийн байдал сайн байна.
Олон нийтийн мэдээллийн хэрэгслээр мэдээлснээр тухайн гэмт хэрэгтэн хэргийн ул мөрийг арилгах, бүгэх, зугтах зэрэг сөрөг үр дагавар гардаг.
Тиймээс ямарваа нэгэн гэмт хэргийн талаарх мэдээлэл байвал нэн яаралтай цагдаагийн байгууллагын 102 дугаарын утсанд хандаж байхыг Цагдаагийн байгууллагаас анхааруулж байна” гэлээ.
Д.Сүхбаатарын талбай дээр эсэргүүцлээ илэрхийлсэн гурван эмэгтэйг баривчлаагүй
Мөн гуравдугаар сарын 8-ны өдөр Д.Сүхбаатарын талбай дээр гурван эмэгтэй оффшорчдыг эсэргүүцэн, хагас нүцгэн байдалтайгаар эсэргүүцлээ илэрхийлсэн. Тэднийг Цагдаагийн байгууллагаас баривчилсан гэсэн мэдээлэл гарсан юм.
Энэ талаар Ё.Лхагвасүрэн "Д.Сүхбаатарын талбай дээр эсэргүүцлээ илэрхийлсэн гурван эмэгтэйг баривчлаагүй. Гэхдээ аливаа нэг жагсаал цуглаан хийх гэж байгаа бол хуулийн дагуу тухайн харьяалсан хороо, дүүргийн засаг даргад мэдэгдэх ёстой.
Ингэснээр Цагдаагийн байгууллагаас тэдгээр иргэний аюулгүй байдлыг хангах болон өөр бусад үйл ажиллагаатай давхцаж байгаа тохиолдолд зохицуулалт хийж өгдөг.
Тэгэхээр үзэл бодлоо илэрхийлэх эрхийг хааж боосон асуудал байхгүй, харин үүнийгээ мэдэгдэж байж үйл ажиллагаа зохион байгуулаарай гэж зөвлөж байна” гэлээ.
