Харин ирж буй жилийн таамаглалыг эдийн засгийн бодит үзүүлэлтүүд дээр үндэслэж Олон улсын валютын сан жил бүр гаргадаг.
Олон улсын валютын сангийн төлөөлөгчид ч манай удирдлагуудтай уулзаж энэ талаар санал солилцож байна.
Валютын сангийн таамаглалаас олон тоо сонирхол татаж байгаа юм.
Энэ жилийн тухайд манай улсын эдийн засгийн өсөлт 6.4 хувьтай байхаар байгаа бол 2015 онд энэ тоо 5.4 хувь болж буурах таамаглалтай байна.
Мөн улсын төсвийн алдагдал 10.1 хувьд хүрнэ гэж төсөөлсөн байна. Энэ жилийн тухайд алдагдал ДНБ-ийн долоон хувьтай тэнцэж байгаа билээ.
Экспорт, импортын тухайд энэ жилийнхээс төдийлөн өөрчлөлт байхгүй байна.
Мөн сүүлийн хоёр жилийн турш нэмэгдүүлэхээр чармайж байгаа ч буусаар байгаа гадаадын шууд хөрөнгө оруулалт ирэх жил ердөө 100 сая доллараар нэмэгдэнэ гэж төсөөлсөн нь Монгол Улс дахиад л валютын хомсдолд оруулахыг харуулж байгаа юм.
Тиймээс ч валютын нөөцийг 1,2 тэрбум ам.доллар байгааг ирэх жил нэг тэрбумд хүрч доошилно гэж ОУВС төсөөлсөн байна.
2015 ОНД ЭДИЙН ЗАСГИЙГ ОУВС ХЭРХЭН ТААМАГЛАВ:
2010 | 2011 | 2012 | 2013 | 2014 | 2015 | |
---|---|---|---|---|---|---|
Эдийн засгийн бодит өсөлт, хувиар: | 6.4 | 17.3 | 12.3 | 11.6 | 6.4 | 5.4 |
Уул уурхайн салбар | 3.6 | 7.7 | 8.3 | 19.4 | 19.7 | 8 |
Уул уурхайгаас бусад салбар | 7 | 19.9 | 13.3 | 9.8 | 3 | 4.7 |
Нийт мөнгөний нийлүүлэлтийн өсөлт, хувиар | 61.6 | 37.1 | 18.8 | 24.3 | 8.7 | 16.5 |
Инфляци | 14.3 | 9.4 | 14.2 | 11.2 | 11.6 | 8.4 |
Улсын төсвийн алдагдлын дотоодын нийт бүтээгдэхүүнд эзлэх хувь, Хөгжлийн банкийг оруулснаар | 0.4 | -4 | -9.1 | -8.9 | -7 | -10.1 |
Экспорт, тэрбум доллараар | 2.9 | 4.8 | 4.4 | 4.3 | 5.5 | 5.7 |
Импорт, тэрбум доллараар | -3.2 | -5.8 | -5.9 | -5.6 | -4.8 | -4.9 |
Гадаад худалдааны тэнцэл, тэрбум доллараар | -0.3 | -0.1 | -1.6 | -1.3 | 0.7 | 0.8 |
Гадаадын шууд хөрөнгө оруулалт, тэрбум доллараар | 1.6 | 4.6 | 4.4 | 2.1 | 0.8 | 0.9 |
Портфолио хөрөнгө оруулалт, тэрбум доллараар | 0.88 | 0.08 | 2.33 | -0.15 | 0.1 | -0.04 |
Төлбөрийн баланс, сая доллараар | 879 | 364 | 1497 | -1885 | -1039 | -188 |
Гадаад валютын нөөц, сая доллараар | 2266 | 2630 | 4126 | 2242 | 1202 | 1014 |
Энэхүү таамаглалаас ганц "гэрэлтэй" зүйл нь инфляцийг 3,2 орчим хувиар буурч 8,4 хувьтай болно гэж таамагласан байх юм.
Монголбанкны зүгээс ч ирэх жил инфляцийг долоон хувьд барих бодлого гаргаад буй.
Одоогийн инфляцийн задаргааг үзэхээр нийлүүлэлтийн гаралтай буюу мах, шатахуун зэрэг өргөн хэрэглээний бараа бүтээгдэхүүний үнийн инфляци тавхан хувийг эзэлж байна. 2010 онд энэ төрлийн бүтээгдэхүүний үнийн нөлөөлөл инфляцийн өсөлтийн 40 хувийг эзэлж байв.
Тэгэхээр одоогийн байдлаар гадаад валютын ханшийн нөлөөллөөс буюу импортын бараа бүтээгдэхүүний өсөлт ийнхүү инфляцид сөрөг нөлөө үзүүлж байна. Ханшийн өөрчлөлтийн тогтворжилт дунджаар зургаан сарын дараагаас зах зээлд мэдрэгдэж эхэлдэг байна. Тиймээс 2015 онд импортын гаралтай бүтээгдэхүүний өсөлт харьцангуй тогтворжвол инфляцид үзүүлэх нөлөөлөл буурч инфляцийг долоон хувьд барих боломжтой гэж эдийн засагчид үзэж байгаа билээ.
Өчигдөр УИХ-ын даргатай уулзсан ОУВС-ын төлөөлөгчид Өрийн удирдлагын тухай хуулийн төслийн хэлэлцүүлгийг түргэвчилж, ойрын хугацаанд Улсын Их Хурлаар батлуулах шаардлагатай хэмээн үзэж буйгаа илэрхийлсэн байна.
Хэрвээ Өрийн удирдлагын тухай хууль батлагдвал нөхцөл байдал өөр тийшээгээ эргэж болох юм.