Энэтхэгийн оргодол тэрбумтан 120 метр өндөр цамхгийн дээвэр дээр баригдсан харшдаа мөд амьдарч чадахгүй
Энэтхэгийн баячууд тансаг хэрэглээ, этгээд сонирхлоороо алдартай.
Тухайлбал тус улсын нэг бизнесмэн 120 метр өндөр буюу 33 давхар цамхгийн дээвэр дээр хоёр давхар харш захиалж бариулсан байдаг.
Бенгалуру хотод байдаг 3,700 гаруй м.кв талбайтай, нисдэг тэрэг хөөрч, буух тавцан, усан сан, цэцэрлэг бүхий уг харшийг $20 саяын өртгөөр босгожээ.
Энэтхэгийн бизнесмэн Вижай Маллягийн захиалсан уг харш дээр нь баригдсан цамхгаасаа дэд бүтцийн хувьд ямар ч хамааралгүй юм.
Тансаг ангиллын орон сууцны уг цамхаг Маллягийн өвөг дээдсийн үе дамжин амьдарч байсан газар дээр баригджээ. Тиймээс Малля дээврийг нь эзэмшсэн юм байна.
Гэхдээ Малля уг харшдаа хэзээ ч амьдарч чадахгүй байх магадлал өндөр болжээ.
Учир нь тэр 2016 оны гуравдугаар сард $1 тэрбум гаруйн өрөнд орж, санхүүгийн луйврын хэрэгт холбогдсоныхоо дараа Энэтхэгээс оргон зайлсан юм.
Одоо тэр Их Британиас орогнол хүсээд байгаа.
Маллягийн эзэмшилд Kingfisher брэндийн шар айргийн үйлдвэр байдаг. Уг бүтээгдэхүүн одоо Энэтхэгийн зах зээлийн 36 хувийг эзэлж, Япон, Канад, Шинэ Зеланд, Норвеги зэрэг дэлхийн 69 улсад экспортлогддог юм.
Энэтхэгийн эрх баригчид Вижай Малляг шилжүүлж авахаар хэд хэдэн удаа оролдсон ч одоогоор бүтээгүй байна.
Өнгөрсөн оны наймдугаар сард тэрбумтныг Энэтхэгт шилжүүлж өгөх боломжийн талаар асуултад Их Британийн дотоод хэргийн сайд Том Тугендхат “Аль аль талд нь заавал хэрэгжих ёстой хууль зүйн арга хэмжээнүүд хүлээгдэж байгаа. Гэхдээ Британийн засгийн газрын байр суурь тодорхой, бид шударга ёсноос зугтсан хүмүүсийн нуугдах газар байх бодолгүй байна” гэж хариулж байжээ.
Эх сурвалж: Business Insider
