Уншиж байна ...
ХУУЧИРСАН МЭДЭЭ: 2016/07/11-НД НИЙТЛЭГДСЭН

Ц.Элбэгдорж: Дөрвөн тэгш ой тохиосон их баяр наадам маань өнгө төгөлдөр эхэлж байна

А.Төгөлдөр, iKon.mn
2016 оны 7 сарын 11
iKon.MN
 

Тулгар төр байгуулагдсаны 2225, Их Монгол Улсын 810, Ардын хувьсгалын 95 жилийн ой, Үндэсний их баяр наадмын нээлт Төв Цэнгэлдэх хүрээлэнд болж байна.

Төрийн их баяр наадмыг нээж Монгол Улсын Ерөнхийлөгч Ц.Элбэгдорж үг хэллээ. 

Тэрбээр "Наадамчин олны уухайн түрлэг дуурссан Монгол наадмын энэхүү хоймроос эрхэм хүндэт Та бүхэнд Тулгар төрийн 2225, Их Монгол Улсын 810, Үндэсний эрх чөлөөний хөдөлгөөний 105, Ардын хувьсгалын 95 жилийн ойн  Үндэсний их баяр наадмын мэндийг өргөн дэвшүүлж, хамгийн сайн сайхныг хүсэн ерөөж мэндчилье.

Монгол түмний түүхийн дөрвөн тэгш ой тохиосон их баяр наадам маань өнгө төгөлдөр эхэлж байна. Манай үндэсний наадам бол бидний бахархалт түүх, өнөө, ирээдүйг илтгэсэн их ёслол юм. Монголчуудын бүтээсэн гайхамшигт соёл, ёс заншлын ундрага дүүрэн эх булаг юм.

Наадмын өмнө төрийн ээлжит сонгууль боллоо. Ард түмний сонголтоор Улсын Их Хурал, Засгийн Газрын бүрэлдэхүүн өөрчлөгдөж шинэчлэгдэж байна. Харин асуудал, сорилт бүхэн хариулт шийдлээ хүлээн үлдэж байна. Монголчууд бид нэг эх оронтой, нэг хувь заяатай. Хүн бүр ажил амьдралдаа дор бүрнээ эзэн болж, Монгол гэсэн нэгэн эрх ашгийг дээдэлж урагшаа тэмүүлж ажиллацгаая.

Монгол түмнийхээ цэнгэлийн манлай – үндэснийхээ их баяр наадмыг би энэ жил найм дахь удаагаа нээж байна. Найман хүү төрүүлж өсгөсөн малчин ээж аавын эгэл хүүгийн хувьд би энэ их билигшээл хүндэтгэлд сүслэж, Монгол түмнийхээ их буян заяа, босоо хийморьт үеийн үедээ залбирч явах болно.

Энэ жилийн наадам улам их өргөн дэлгэр болж байна. Газрын хол, усны уртаас олон зочид ирж байна. Энэ бөмбөрцгийн хоёр их тив – Ази, Европын төр засгийн удирдлага, тэргүүн гийчид Монголын зүг жолоо залж байна. Түрүүч нь ирж, ар араасаа уяан дээр бууж байна. Монголчуудаа наадмаа ч сайхан хийе, ажлаа ч сайн хийе. Нэрээ хичээе. Өндөр дээд зочидоо хүндлэн угтая. Дэлхий биднийг харж байгаа. Өвөг дээдэс маань бас харж байгаа.

Энэ өдрүүдэд Монгол хүн байгаа манай гарагийн газар бүр наадам болж байна. Дэлхий ч Монгол наадмыг сонирхож байна. Хүчитний мэх улам уран, хүлгийн давхил улам төгөлдөр, харваачдын цэц улам ончтой байг ээ. Зон олон Монголчууд маань заяа тэгш сайхан наадаг ээ. Өндөр төрийн маань их цагаан сүлд улам ихээр цэнгэн баясаг ээ.

Монгол наадам ийнхүү ерөөл дүүрэн эхэлж байгааг даяар олноо тунхаглан зарлая.

Хотол олноороо сайхан наадаарай.

Хурай, хурай, хурай." гэв.

Тэрбээр дараа нь Төрийнхөө туганд мөргөхөөр барилдах гэж байгаа мэт дэвэв.

 
Гэрэл зургийг mpa.mn

Энэ жилийн баяр наадмын нээлт, хаалтын соёл урлагийн арга хэмжээг Төрийн шагналт, УДЭТ-ын ерөнхий найруулагч Н.Наранбаатар найруулсан юм.

 

MNB телевиз ШУУД дамжуулж байна.

1-р хэсэг:

 

2-р хэсэг:

 

3-р хэсэг: