Төв цэнгэлдэх хүрээлэн, Хүй долоо худаг дахь авто зогсоолын талбайн хэмжээгээр тээврийн хэрэгслийн зөвшөөрлүүд олгогддог. Хөдөлгөөнд оролцогч та авсан зөвшөөрөл дээрх зураглалын дагуу хөдөлгөөнд оролцож тээврийн хэрэгслээ зогсоолд байрлуулна.
Хүй долоо худагт нийт 5,700 автомашин байрлуулах бөгөөд үүнээс “Ж” зөвшөөрөлтэй автомашины зогсоол 100, “А” зөвшөөрөлтэй 100, “ДК” зөвшөөрөлтэй 100, Улаан “М” зөвшөөрөлтэй 1000, ногоон “Ү” зөвшөөрөлтэй 700, “Г”, ногоон “М” зөвшөөрөлтэй 3,400 автомашин тус тус байрлуулах бүрэн боломжтой.
Улаан, цэнхэр өнгө бүхий “М”, ногоон “Ү” зөвшөөрлүүд нь зөвхөн Хүй долоон худагт, “Шар-Ү” зөвшөөрөл зөвхөн Төв цэнгэлдэх хүрээлэнд үйлчлэх бөгөөд “Ж”, “ДК”, “А”, “Г” зөвшөөрөлтэй тээврийн хэрэгслүүд нь хүй долоо худаг болон төв цэнгэлдэх хүрээлэнд очих боломжтой.
Зөвшөөрөл аваагүй авто машинтай баярын өдрүүдэд оролцох бол Дүнжингарав, Мишээл экспо төвийн зогсоол дээр автомашинаа байрлуулан Төв цэнгэлдэх рүү үнэ төлбөргүй автобусаар зорчих боломжтой.
Тулгар төрийн 2225, Их Монгол улсын 810, Ардын хувьсгалын 95 жилийн ой, Үндэсний их баяр наадмын үеэр Замын цагдаагийн газар нь Орон нутгийн цагдаагийн газар, Хууль сахиулах их сургууль, ЦЕГ-ын Лицензын төвийн зэрэг алба хаагчдыг оролцуулаад 800 орчим алба хаагчын бүрэлдэхүүнтэй замын хөдөлгөөн зохицуулах, замын хөдөлгөөний аюулгүй байдлыг хангах чиглэлээр өндөржүүлсэн бэлэн байдалд шилжиж уртасгасан цагаар ажиллаж байна.