Кубатай байгуулсан Обамагийн гэрээг Трамп хүчингүй болголоо
Олон жил дайсагналцаж ирсэн АНУ-Кубын хоорондын уур амьсгалыг зөөлрүүлсэн өмнөх ерөнхийлөгч Барак Обамагийн зүтгэлийг Дональд Трамп үгүйсгэлээ.
Баасан гарагт Майамид мэдэгдэл хийхдээ Дональд Трамп өмнөх засаг захиргааны гэрээг “зөвхөн Кубад ашигтай, аюултай, буруу” тохиролцоо гэж нэрлээд цуцалж байгаагаа зарлажээ.
“Яг одооноос эхлэн өмнөх ерөнхийлөгчийн Кубатай байгуулсан зөвхөн нэг талдаа ашигтай гэрээг би цуцалж байна. Бид АНУ болон Кубын ард иргэдэд илүү ашигтай байх гэрээг шинээр байгуулна” хэмээн Трамп хэлсэн байна.
Тэрээр бүх улс төрийн хоригдлоо суллан, үг хэлэх эрх чөлөөг хүндэтгэдэг болж, улс төрийн олон намыг зөвшөөрөн, чөлөөт сонгууль явуулах хүртэл нь Хаванад үзүүлэх хоригоо цуцлахгүй гэж мэдэгджээ.
Гэхдээ Обамагийн үед Хаванад нээгдсэн АНУ-ын элчин сайдын яамыг хаахгүй бололтой. Трамп “Америк үргэлж эрх чөлөөний талд байна. Кубын ард түмнийг эрх чөлөөтэй болгохыг Америк үргэлж дэмжинэ” гэж үгээ дуусгажээ.
Тэр бас өөрийг нь сонгуульд ялахад дэмжлэг үзүүлсэн Флоридагийн Куба гаралтай иргэдэд талархал хүргэсэн байна.
Эх сурвалж: Russia Today
