Төрийн албаны ТУРШИЛТЫН шалгалтад хамрагдсан иргэдийн 88 хувь нь унажээ
Төрийн албаны зөвлөл 2016 оны 9 дүгээр сарын 15-20-ны өдрүүдэд "Төрийн албаны шалгалт" нээлттэй өдөрлөгийг зохион байгууллаа.
Өдөрлөгөөр шалгалт өгөхөөр бэлтгэж байгаа иргэдэд арга зүйн зөвлөгөө өгч, цахим шалгалтын системтэй танилцуулж, хөндлөнгийн нөлөөгүй, нээлттэй, ил тод зохион байгуулж байгааг иргэдэд сурталчлахын зэрэгцээ төрийн албанд орох иргэд туршилтын шалгалт өгч, хууль эрх зүй, албан хэрэг хөтлөлтийн мэдлэгийн түвшингээ тогтоон, өөрөө өөрийгөө сорих боломж олголоо.
Төрийн албаны зөвлөлийн soril@csc.gov.mn хаягаар 1,620 иргэн өдөрлөгт оролцох хүсэлтээ ирүүлсэн бөгөөд хуваарь гарган, нэрсийг нь Төрийн албаны зөвлөлийн csc.gov.mn сайтад байрлуулав.
Туршилтын шалгалтад хамрагдсан 1,560 иргэдийн 88 хувь нь шалгалтад унажээ.
Өдөрлөгт оролцсон иргэдтэй уулзахад төрийн албаны шалгалтад орохын тулд сайн уншиж бэлтгэх хэрэгтэй юм байна гэдгийг хэлж байлаа.
/н.Мөрөн. Хан-уул дүүрэг/
Цахим шалгалт авч байгаа нь их зөв зүйтэй. Төрийн албаны шалгалтад бэлтгэдэг цэнхэр номоор өөрийгөө бэлтгэвэл боломжийн юм байна гэж бодож байна. Өмнө нь нэг удаа шалгалт өгсөн. Өнөөдөр өгөөд бас уначихлаа. Онлайнаар өгч байгаа шалгалт нь гадуур яригдаад байгаа шиг хардаж сэрдэх зүйл харагдахгүй байна. Сорилын тестээ сайн унших, бөглөх хэрэгтэй. Шалгалтад бэлтгэдэг аппеликейшнүүд байдаг юм билээ. Эдгээрийг хувиарааа бөглөх хэрэгтэй юм байна гэж бодогдож байна.
/н.Насанбат./
Энэ жил сургуулиа төгссөн. Шалгалт өгөхийн тулд хуулиа илүү сайн унших хэрэгтэй юм байна. Ном байдаг түүнээс их сайн бэлтгэх хэрэгтэй юм байна. Шалгалтын цахим систем найдвартай юм шиг санагдаж байна. Цаг гарч ирнэ. Хажуу талдаа бөглөх хүснэгт гарч байгаа нь давуу талтай юм байна.
/н.Наранцэцэг. Хан -Уул дүүрэг/
Энэ шалгалт өгөөд тэнцсэнгүй. Их уншиж суралцах хэрэгтэй байгаа юм байна. Шалгалтын цахим систем ойлгомжтой юм байна. Шалгалтын үр дүн шууд гардаг болохоор ямарваа нэгэн хардаж сэрдэх зүйл алга. Технологийн дэвшил гарч байна гэдгийг харуулж чадаж байна. Шалгалтад бэлтгэхийн тулд хуулиа их сайн унших ёстой юм байна.
Эх сурвалж: ТАЗ
