Зарлах болгондоо ямар нэг шалтгаанаар хойшилж, удаа дараа хэлэлцэх асуудлаараа зөрчилдөж байсан АН-ынхан өнөөдрийг хүртэл үүрэг гүйцэтгэгч Ерөнхий нарийн бичгийн даргатай, намын ҮЗХ-оор баталгаажаагүй намын даргатай яваа билээ.
Тэд өнгөрөгч сард ҮЗХ-ны хурлаа хийсэн ч зөвхөн намынхаа мөрийн хөтөлбөрийг хэлэлцээд тарж одсон. Тэгвэл энэ удаад нэр дэвшигчдийнхээ асуудлаар тун ч халуухан хуралдах сурагтай.
Тойргоо булаацалдсан АН-ын гишүүдийн улстөржилт их байгаа учраас энэ удаад ҮЗХ хэрвээ хуралдвал тун ч ширүүхэн болох нь тодорхой байгаа юм. АН-ын ҮЗХ-ны хуралдаан энэ сарын 23-наас өмнө болно гэх мэдээлэл байгаа бөгөөд энэ амралтын өдрүүдэд хуралдаж мэдэхээр байна.
Учир нь Сонгуулийн хуулийн өөрчлөлтөөс болж намууд нэр дэвшигчдээ энэ сарын 23-нд зарлахаар болж хойшлуулсан юм.
Харин МАН-ын Бага хурал Бямба гарагт зарлагдсан байсан ч мөн л тодорхойгүй хугацаагаар хойшилжээ. Ямар шалтгаанаар хойшлуулсан нь тодорхой бус байгаа ч нэр дэвшигчдээ зарласны дараа Бага хурлаа хийх нь зөв гэж үзсэн бололтой.