Apple-ын хувьцааны үнэ түүхэн дээд хэмжээнд хүрлээ
Өчигдөр Apple корпораци 2015 оны хоёрдугаар улиралын (1-3 сар) санхүүгийн тайлангаа танилцууллаа.
Энэ улиралд iPhone-ы өндөр борлуулалтын улмаас Apple төлөвлөж байсан орлогоо давуулан биелүүлжээ.
Тайлан зарлагдсаны дараа Apple-ын нэгж хувьцааны үнэ 1.25 хувь өсч $134 хүрсэн нь бүх цаг үеийн хамгийн дээд үзүүлэлт юм.
Мөн Apple ноогдол ашиг хуваарилах төлөвлөгөөгөө шинэчилснээ зарласан байна.
Ирэх хоёр жилд тэд нийт $200 тэрбумыг хувь эзэмшигчиддээ ноогдол ашиг болон хувьцааг буцаан худалдаж (buyback) авах хэлбэрээр тараах юм.
Тим Кукын хэлснээр хуучин iPhone хэрэглэгчдийн 20 хувь нь шинэ iPhone 6, 6 Plus руу шилжсэн тул цаана нь 80 хувийн зах зээлийн багтаамж байгаа гэлээ.
Мөн Хятад дахь борлуулалт Европын борлуулалтыг анх удаа давсан байна.
iPad-ын борлуулалт буурсны гол шалтгааныг iPhone, Mac-ын каннибализацитай холбоотой гэж тайлбарлажээ.
Apple-ын хоёрдугаар улирлын тоо баримтуудын дэлгэрэнгүй:
- EPS (earning per share): $2.33, төсөөлж байснаас 40% өссөн
- Орлого: $58.01 тэрбум, төсөөлж байснаас 27% өссөн
- iPhone-ы тоо: 61.2 сая, төсөөлж байснаас 40% өссөн
- iPad-ын тоо: 12.62 сая, төсөөлж байснаас 23% буурсан
- Mac компьютер: 4.56 сая, төсөөлж байсан тоо 4.7 сая
- Gross margin: 40.8%, төсөөлж байсан хувь 39.5%
- Бэлэн мөнгөний нөөц: $194 тэрбум
Орлогыг зах зээлээр нь задлан харуулбал:
| Зах зээл | Орлого |
|---|---|
| Хойд ба Өмнөд Америк | $21.3 тэрбум |
| Европ | $12.2 тэрбум |
| Хятад | $16.8 тэрбум |
| Япон | $3.45 тэрбум |
| Үлдсэн Ази Номхон Далайн бүс | $4.21 тэрбум |
Эх сурвалж: Bloomberg, Business Insider
