О.Цолмон: Бан Ги Мун утасдаж болиулаагүй бол Ц.Элбэгдорж Н.Энхбаярыг алахаар шийдчихсэн байсан юм билээ
Экс Ерөнхийлөгч Н.Энхбаярын оролцсон “Монгол тулгатны 100 эрхэм” нэвтрүүлэг цацагдсан нь олон нийтийн дунд шуугиан тариад байна. Түүний ярианд гомдол нэвт шингэжээ.
Н.Энхбаярыг баривчлах үед Ц.Элбэгдорж Ерөнхийлөгч, Ц.Нямдорж Хуульзүйн сайд байсан. АТГ, Шүүх Ерөнхийлөгчийн, цагдаа Хууль зүйн яамны харъяанд байдаг учраас энэ хоёрын оролцоогүй байх боломжгүй гэдэг дээр үндэслээд ингэж үзэж байна. Ц.Элбэгдоржийг улсын нууц задлаад шоронд явах нь гарцаагүй болчихоод байх үед П.Жасрай гуай өмөөрсөөр байгаад аваад үлдсэн.
Ц.Нямдорж Хятадын тагнуул гэсэн асуудал гарсан, шалгуулчих гэхэд “нүдэнд нь нулимс цийлэгнэж” битгий тэгээч гэж гуйсан учир больсон гэнэ. Ярианаас “Би тэднийг зүгээр өнгөрөөсөн байхад тэд намайг ингэлээ” гэсэн гомдол илт мэдрэгдэнэ.
Эхнэр О.Цолмон нь мөн “Ц.Элбэгдорж Н.Энхбаярыг алахаар шийдчихсэн байсан юм билээ, Бан Ги Мун утасдаж болиулсан” гэж хэлсэн нь олон хүний сэтгэлийг сэртхийлгэсэн юм. Тэмцлийн хурц хэлбэрийг сонгож байгаа хүн юу хийж байгаагаа мэдэж байсан байж таарна. Үүнийг хэн нэгэн бусдыг хөнөөсөнтэй зүйрлэж боломгүй.
Ц.Нямдорж: Ноцтой мэдээллийг дэлгэнэ
Н.Энхбаяр олон юм ярьсан ч хамгийн ноцтой нь хоёр нам аль нь ч эрх барьсан бай, сөрөг хүчин болсон хэдээ оролдохгүй хэмээн удаа дараа амлалт өгч байсан тухай. 2000 оны сонгуулийн дараа Ардчилсан намын удирдлагууд “Та нар биднийг шалгаж шоронд хийх байх. Ганц л юм гуйя, битгий шалгаарай” гэж шалахад Н.Энхбаяр хүлээж авсан гэнэ.
“Хар дэвтэр” бичин суудаг юм бол энэ төр хэзээ ч өөрөө цэвэршихгүй.
Дараа нь бас “Аль нь ялж ялагдсан, алдаа гаргасан бай хэлэлцэхгүй байя” гэсэн утгатай тохироог хийж байсан гэжээ. Түүний энэ ярианы дараа Ц.Нямдорж гишүүн телевизийн нэвтрүүлэгт оролцон “Н.Энхбаяр хулгай хийгээд шийтгэгдсэн бол хохь нь” гэж мэдэгдэв. Түүнийхээр бол Н.Энхбаярыг н.Сэргэлэн гэгчийн хэрэгт хамааруулан аль эрт л шалгаж эхэлсэн байсан гэнэ. Гэвч тэрбээр яагаад тэр үед дуугүй байсныхаа учрыг хэлсэнгүй, булзааруулаад өнгөрлөө.
Тэрбээр зарчим их ярьдаг боловч Н.Энхбаяртай үл ойлголцох болсон шалтгаан нь зарчим биш, харин М.Энхсайхантай сүжрэх болсноос эхлэлтэй гэнэ.
Парламент солигдох үед бууж байгаа нам нь эрх авч байгаа намаасаа “Бие, биенээ шалгахгүй байя” гэж тохирно гэж юу гэсэн үг вэ. Үнэндээ шүүх дээр шалгагдаж байгаа УИХ-ын гишүүдийн хэрэг хурдхан шиг нэг тийшээ шийдэгдээгүйн учир юу вэ.
Одоо ч гэсэн хоёр ч гишүүн эрүүгийн хэрэгт шалгагдах ёстой ч гишүүний халдашгүй дархан эрхийн цаана суусаар байна. Хэрвээ үнэхээр төрийн эрх баригчдын хооронд иймэрхүү тохироо хийгддэг, бүгд но-той ч тэр баримтуудаа хэрэг болохоор задална хэмээн “хар дэвтэр”-тээ бичин суудаг юм бол энэ төр хэзээ ч өөрөө цэвэршихгүй. Гагцхүү ард түмэн сонгуулиар солихоос өөр аргагүй.
А.Мөрөн: Намайг хүний наймаагаар зарчихаагүй л байна
Монголд багийн спортын төрлүүдээс хамгийн олон жил хөгжиж, хүмүүсийн сонирхлыг татдаг нь сагсанбөмбөг, хөлбөмбөг.
Гэвч энэ хоёр спортын холбоо хоёулаа хэл амтай байна. Хөлбөмбөгийн спорт Монголд хөгжөөд 60 гаруй жил болж байгаа ч мэргэжлийн төвшинд очиж чадаагүй яваа. Тэр ч бүү хэл нэг ч тоглогч олон улсын тавцанд гарч, мэргэжлийн талбарт өрсөлдөж байгаагүй юм.
Тэгвэл Такеши Моримото хэмээх япон хүн шигшээ багийн тоглогч А.Мөрөнг Тайландын лигт зуучилснаар Монголын хөлбөмбөгт нэгэн содон үйл явдлыг бий болгосон билээ. Харин дараагийн гурван хөлбөмбөгч болох “Хоромхон”-ы Х.Цэнд-Аюуш, “Эрчим”-ийн М.Төгөлдөр, С.Гал-Эрдэнэ нар явах болоход асуудал үүсэв. “Эрчим” баг тоглогчдоо явуулахгүй хэмээн татгалзаж, МХБХ Т.Моримотог агент хийх эрхгүйг тогтоолоо.
Хэвлэлүүд гурван тамирчнаа ямар ч “барьцгүй” этгээдийн үгэнд орж, бараг л хүний наймаанд явах гэж байгаа мэтээр сүржигнэлээ. Үүний дараа Т.Моримотогийн зуучлалаар анх Тайландыг зорьсон А.Мөрөн “Намайг хүний намаагаар зарчихаагүй л байна” хэмээн мэдэгдсэн юм. Бодоод үзэхэд, энэ хэрэгт лицензгүй атлаа тоглогч зуучилсан Т.Моримото, нэр төдий урамшуулал авдаг хөлбөмбөгчид гэхээсээ илүү МХБХ хамгийн их буруутай юм шиг.
Юм сураад ирвэл Монголын шигшээ багт л хэрэгтэй
Сая явах гэж байсан гурван тоглогчийн хамгийн өдөр цалинтай нь Х.Цэнд-Аюуш. “Хоромхон” багаасаа сард 250 мянган төгрөг авдаг юм билээ. Тэрбээр багаасаа ганцаархнаа ийм өндөр цалин авдаг гэсэн. Харин А.Мөрөнгийн хэлснээс үзвэл Тайландын лигт тоглоход зөвхөн бэлтгэл хийснийхээ төлөө 600 орчим мянган төгрөгийн урамшууллыг авдаг юм билээ.
Гэрээний мөнгө тусдаа гээд бодохоор Монголтой зүйрлэшгүй нь илт. Тийм болохоор Тайландыг зорьсон тэднийг буруутгах шаардлага байхгүй юм. Юм сураад ирвэл Монголын шигшээ багт л хэрэгтэй шүү дээ. Харин энэ ажлыг өдий хүртэл эхлүүлэхгүй явсан Хөлбөмбөгийн холбооны удирдлагууд өөрсдөөсөө ичих хэрэгтэй. Шинэ бүтэц, зохион байгуулалтад орсныхоо дараа энэ тал дээр онцгой анхаарч ажиллах хэрэгтэй бус уу.