Ерөнхийлөгч Ц.Элбэгдорж зөрүүд Ерөнхий сайд Н.Алтанхуягийн чихийг УИХ дахь нам, эвслийн дарга нараар чимхүүлэхээр үүрэг чиглэл өгөөд байгаа.
Ерөнхийлөгчийн лүндэн бол ерөөсөө л Засгийн газрын танхимын сайд нар “Давхар дээл”-тэй байж огтхон ч болохгүйг улстөрчид ойлгосон.
Тун удахгүй Засгийн газрын бүрэлдэхүүний асуудлыг ярилцах үед “Шударга ёс” эвслийн дөрвөн сайдын асуудал ч босч ирнэ. Шадар сайд Д.Тэрбишдагва, Сангийн сайд Ч.Улаан, Эрчим хүчний сайд М.Сономпил, Эрүүл мэндийн сайд Н.Удвал нар дөрвүүлээ лааз өшиглөж ч болзошгүй. Тэр үед л өнөөдөр “Тавантолгой цахилгаан станц” төслийн захирлаар ажиллаж байгаа М.Энхсайханд эрх баригч намын даргаас эхлээд хайр зарлах хүмүүс олон бий.
1996-1998 онд Монгол Улсын Ерөнхий сайдаар тун амжилттай ажиллаж байсан М.Энхсайхан эдийн засагч, ажил хэрэгч чанарын хувьд нэг яамыг өлхөн толгойлоод явчих чадвартай гэдгийг эрх баригчид ч, сөрөг хүчнийхэн ч хэнээр ч хэлүүлэлтгүй мэднэ. Хамгийн гол нь Монгол Улсын Ерөнхийлөгчийн баримталж байгаа “Засгийн газрын гишүүдийг УИХ-ын гаднаас томилох ёстой” гэдэгт М.Энхсайхан хамгийн сайн тохирч байгаа.
Тэгээд ч Ерөнхий сайдын алба хашиж их мөнгөний үнэрт ухаан санаа нь самуурахгүйгээр хэрсүүжиж туршлагажсан ухаан нь энэ цаг үед түүнд хамгийн бодит болмжийг олгож байгаа. Ийм олон давуу талтай учир М.Энхсайхан тун удахгүй “Дан дээл” өмсөх биз ээ.