Леонардо Ди Каприог НҮБ-ын энхийн элчээр сонгов
Холливудын жүжигчин Леонардо Ди Каприог НҮБ-ын энхийн элчээр сонгосон талаар НҮБ-ын Ерөнхий нарийн бичгийн дарга Бан Ги Мүн мэдэгдлээ.
Жүжигчин залууг цаг агаарын өөрчлөлтийн асуудал хариуцсан энхийн элчээр сонгосон бөгөөд ирэх мягмар гарагт болох Ерөнхий Ассамблейн цаг агаарын өөрчлөлтийн дээд чуулганд урьсан байна.
Бан Ги Мүн “Леонардо Ди Каприо бол хүрээлэн буй орчныг хамгаалахын төлөө хөдөлгөөний идэвхтэй тэмцэгч” хэмээн үнэлсэн аж. Харин жүжигчин өөрөө хэлэхдээ “НҮБ-ын энхийн элч болно гэдэг нэр төрийн хэрэг.
Хүн төрөлхтний түүхийн энэхүү чухал үед цаг агаарын өөрчлөлтийн эсрэг тэмцэх нь хувь хүнийхээ зүгээс хүлээж буй том хариуцлага.
Ойрын жилүүдэд бид хүрээлэн буй орчин, цаг агаарын өөрчлөлтийг багасгахын төлөө ажиллах нь манай гарагийн хүмүүсийн хувь заяанд нөлөөлөх чухал асуудал юм” гэжээ.
