ЮНЕСКО-ийн Монголын үндэсний комиссын Ерөнхий нарийн бичгийн дарга С.Уянга, Улсын Ерөнхий Прокурорын туслах, Тамгын газрын дарга Ц.Арвинбуудай нар өнөөдөр Хамтран ажиллах тухай санамж бичигт гарын үсэг зурлаа.
Талууд хамтран ажиллах хүрээнд сэтгүүлчдийн аюулгүй байдлыг хамгаалах, тэдний эсрэг гэмт үйлдэл, ял шийтгэлгүй үлдэж буй асуудлаарх НҮБ-ын үйл ажиллагааны төлөвлөгөөний хэрэгжилт, соёлын өвийг эрэн сурвалжлах, бүртгэх, хадгалах, хамгаалах, сэргээн засварлах болон бусад харилцааг зохицуулсан хууль тогтоомжийн хэрэгжилт, үйл ажиллагааны талаар харилцан мэдээлэл солилцохоор тохиролцов.
Харин Улсын Ерөнхий Прокурорын газрын Тамгын газар нь сэтгүүлчдийн хууль, эрх зүйн мэдлэг, ойлголтыг дээшлүүлэх, прокурорын давтан сургалтын хөтөлбөрийн агуулгад үзэл бодлоо илэрхийлэх эрх чөлөөг хамгаалах тухай Монгол Улсын соёрхон баталсан, нэгдэн орсон гэрээ конвенц, сэтгүүлчдийн аюулгүй байдлыг хангах тухай асуудлыг тусгах чиглэлээр хамтран ажиллах юм.
Талууд дээр дурдсан үйл ажиллагааг ЮНЕСКО-ийн Мэдээлэл харилцааны хөгжлийн олон улсын хөтөлбөр (МХХОУХ)-ийн Монгол дахь Үндэсний Хороотой хамтарч хэрэгжүүлэхээр тохиролцлоо.
Монгол Улсад МХХОУХ-ийн үйл ажиллагааг эрчимжүүлэх зорилгоор Гадаад харилцааны сайд, ЮНЕСКО-ийн Монголын үндэсний комиссын дарга Ц.Мөнх-Оргилын 2016 оны гуравдугаар сарын 2-ны өдрийн 17/18 тоот тушаалаар 11 хүний бүрэлдэхүүнтэй Үндэсний Хороо байгуулагдаж, даргаар нь Глоб Интернэшнл төвийн тэргүүн Х.Наранжаргалыг томилов.
Үндэсний Хорооны нарийн бичгийн даргын ажлын албыг Глоб Интернэшнл төв хариуцаж ажиллах аж.