Трампыг ерөнхийлөгч болоход нөлөөлсөндөө Твиттерийн үүсгэн байгуулагч уучлал хүслээ
Твиттер сүлжээг үүсгэн байгуулагчдын нэг Эв Уилльямс өөрийнх нь үүсгэсэн сүлжээ Дональд Трампыг ерөнхийлөгчөөр сонгогдоход нөлөөлсөн тул уучлал гуйж байгаагаа хэлсэн байна.
Нью Йорк Таймс сонинд ярихдаа Эв “Твиттерийн гүйцэтгэсэн үүрэг маш муу зүйл болсон” гээд “Твиттер байгаагүй бол тэр ерөнхийлөгч болж чадахгүй байсан нь үнэн, тиймээс үүнийхээ төлөө уучлал гуйж байна” гэжээ.
Өнгөрсөн гуравдугаар сард Дональд Трамп Fox News сувагт ярихдаа сонгуульд ялсан нэг гол шалтгаан нь Твиттер байсан гэж хэлж байв.
“Хэрвээ Твиттер байгаагүй бол би өнөөдөр энд байхгүй байсан гэж боддог” хэмээн Трамп тэр үед ярьж байжээ.
Хэвлэл мэдээллийн хэрэгслүүдийг тэнцвэргүй мэдээлэл хүргэдэг гэж шүүмжилдэг Трамп өөрийн твиттер сүлжээгээр ихэнх мэдэгдлүүдээ хийдэг.
Дональд Трамп твиттер сүлжээнд 30 сая гаруй дагагчтай. Хэдийгээр сошиал сүлжээний идэвхтэй хэрэглэгч мөн ч Трампыг технологийн ертөнцийнхөн таатай хүлээж аваагүй. Тэр ч байтугай Трампын төлөө ажиллахгүй байх хөдөлгөөн цахиурын хөндийн компаниудын захирлуудын дунд өрнөж байсан юм.
Эх сурвалж: Business Insider
