АНУ тив хоорондын баллистик пуужин туршлаа

АНУ-ын агаарын хүчний Калифорни дахь бааз тив хоорондын баллистик пуужинг цэнэгт хошуугүйгээр өчигдөр туршсан байна.

Туршилтын зорилгыг бэлэн байдал, тусгалын нарийвчлалыг шалгахын хажуугаар цөмийн зэвсгийн хүчин чадлаа харуулах юм гэж Америкийн зэвсэгт хүчнийхэн тодорхойлжээ. “Minuteman III” баллистик пуужингийн туршилт АНУ-Хойд Солонгосын хооронд үүсээд байгаа сөргөлдөөний цаг үед таарч байгаагаараа онцлог болж байна. Гэвч туршилт нь Солонгосын хойгийн нөхцөл байдалтай хамааралгүй, тогтмол хуваарийн дагуу хэрэгжүүлдэг туршилтынх нь нэг хэсэг гэж зэвсэгт хүчний командлал мэдээлжээ.

Пуужинг өчигдөр Калифорни дахь Хойд Ванденбергийн Агаарын Баазаас харвасан байна.

Хэдийгээр эрх баригчид Хойд Солонгосын нөхцөл байдалтай холбож тайлбарлахгүй байгаа ч зарим цөмийн зэвсгийн эсрэг хөдөлгөөнүүд Вашингтоны үйлдлийг шүүмжилжээ. Тухайлбал Nuclear Age Peace Foundation байгууллагын ерөнхийлөгч Дэвид Кригер “Өөрийн туршилтыг чухал хэрэгтэй гэж тайлбарлаад, Хойд Солонгосын туршилтыг аюул занал гэж үзэж байгаа нь эрх баригчдын хоёр нүүр гаргаж байгаагийн илрэл” гэж Лос Анжелес Таймс сонинд ярьжээ.

Тэрээр Вашингтон дэмий мөнгө үрж байгаагаас гадна сөргөлдөөнийг хурцатгах алхам хийлээ гэж шүүмжилсэн байна.

“Minuteman III” баллистик пуужинг анх 1970 онд зохион бүтээж байсан ба 60 жилийн турш ашиглах зориулалттай юм.

Эх сурвалж: Russia Today