• 4 сарын 26, Баасан
|
|
Уншиж байна ...
ХУУЧИРСАН МЭДЭЭ: 2017/01/12-НД НИЙТЛЭГДСЭН

Ломбард дээрэмдсэн гурван этгээдэд эрүүгийн хэрэг үүсгэжээ

А.Төгөлдөр, iKon.mn
2017 оны 1 сарын 12
iKon.MN
Зураг зураг

Баянзүрх дүүргийн 15 дугаар хорооны нутаг дэвсгэрт байрлах барьцаалан зээлдүүлэх газар /ломбард/ дээрэмдсэн хэрэг гарчээ.

Уг хэргийг тус дүүрэг дэх цагдаагийн хоёрдугаар хэлтсийн алба хаагчид илрүүлэн шалгаж байна.

Барьцаалан зээлдүүлэх газрын ажилтан 30 настай, эмэгтэй Г-г ажлаа хийж байхад нь үл таних гурван этгээд зэвсэг, зэвсгийн чанартай эд зүйл ашиглан айлган, сүрдүүлж бэлэн мөнгө, гар утас, үнэт эдлэл зэргийг дээрэмдэн авч явсныг шуурхай илрүүлжээ. Уг хэргийг Улаанбаатар хотын харьяат Ц нарын гурван этгээд үйлдсэн болохыг тогтоон, Эрүүгийн хуулийн тусгай ангийн 147 дугаар зүйлийн 147.2-т зааснаар эрүүгийн хэрэг үүсгэн шалгаж эхэлсэн байна. Хохирлын хэмжээг урьдчилсан байдлаар 15 сая төгрөг гэж тогтоогоод байгаа аж.

Сэрэмжлүүлэг
Иймд барьцаалан зээлдүүлэх үйлчилгээ үзүүлдэг иргэн, аж ахуйн нэгж, байгууллагуудыг чанарын шаардлага хангасан камержуулалтын систем суурилуулах, тогтмол харуул хамгаалалттай болох, цагдаагийн байгууллагатай уялдаа холбоотой ажиллах зэргээр болзошгүй гэмт хэрэг, зөрчлөөс урьдчилан сэргийлэхийг анхааруулж байна.

Эрүүгийн хуулийн заалт:

147 дугаар зүйл. Бусдын эд хөрөнгийг дээрэмдэх

147.2. Энэ хэргийг давтан, бүлэглэж буюу урьдчилан үгсэж тохиролцсон бүлэг, урьд энэ гэмт хэрэгт болон булаах, далайлган сүрдүүлэх гэмт хэрэгт шийтгүүлсэн этгээд үйлдсэн, эсхүл зэвсэг, зэвсгийн чанартай бусад зүйл хэрэглэсэн, энэ хэргийн улмаас бусдад их хэмжээний хохирол учирсан бол эд хөрөнгийг хураах буюу хураахгүйгээр таваас дээш арван жил хүртэл хугацаагаар хорих ял шийтгэнэ гэж заасан байдаг.