2016 оны сонгууль угтсан пиар тун эрт эхэллээ. Улстөрчид ч ирэх сонгуулиар очих тойрог, “тойглох” сонгогчдынхоо эрэлд гарч эхэлцгээжээ. Сонгуулийн жил л хэдэн арваараа гарч ирдэг шанага, шүүр барьсан зургууд 2013 оноос эхлээд л цахим хуудсыг дүүргэж байна. Зул хүж өргөж, туулай агнаж, телевизээр дуулж хуурдах нь эрчимжлээ.
Цэмцийсэн ганган залуу ямаа самнаж, төрийн түшээ бүсгүйчүүд хормогч зүүж эмнэлэг цэвэрлээд л. Зарим нь засмал замын хажууханд цас ухаж, автобусанд суусан зургаараа “нүүр ном”-оо гоёж эхлэв.
Хамгийн гол нь намын жагсаалтаар УИХ-д сонгогдсон эрхмүүд ирэх сонгуулиар тойрогт өрсөлдөх учраас УИХ-ын гишүүн болсныхоо маргаашнаас л хаана тойрог олох, хэнтэй өрсөлдөх вэ гэсэн бодлоор тархиа гашилгах болсон гэдэг.
Тиймдээ ч жагсаалтын гишүүд л хамгийн түрүүнд иймэрхүү төрлийн пиараа эхлүүлж, аймаг орон нутгаар хэрэн хэсч эхэлсэн юм. УИХ-ын хаврын чуулганаар Сонгуулийн тухай хуулийн төслийг хэлэлцэж эхэлсэн.
Мөн хуульд өөрчлөлт оруулж тойргуудыг жижигсгэх эсэхээс шалтгаалан өөрчлөлт орох ч тэд хүссэн ч эс хүссэн ч сонгогчдоо асарч, тойрох, “хайр зарлах” ажилдаа ханцуй шамлан орохоос өөр аргагүй юм. Тиймээс аймаг сум дамжин аль сумын иргэд наашаа харж инээж байгааг тагнах ажилдаа тэд тун шаргуу оржээ.
АН анхнаасаа л тойргоо хуваагаад авчихсан. Фракцийн зарчим энэ намд үйлчилдэг учраас аль фракцийн гишүүн хаана өрсөлдөх вэ гэдэг нь эхнээсээ тодорхой болчихдог. Тэр утгаараа тойргийн зураглал гаргахад илүү амархан харагдаж байгаа юм. Гэхдээ З.Энхболд намын даргаар очсон даруйдаа ирэх сонгуульд ямар ч фракцийн дүрэм үйлчлэхгүй шүү гэдгийг хатуухан сануулсан билээ. Фракцийн хор найруулах асуудал хэрхэвч байж болохгүй гэдгийг сануулаад ирэх сонгуулиар нэр дэвшихээр санаархаж байгаа хүмүүстэй нэг бүрчлэн уулзсан гэдэг.
Тойрогт өрсөлдөх боломж байгаа хэсэгт нь нэр дэвшүүлнэ гэдгээ амалж, эртнээс сонгуулийн ажлаа эхэл хэмээж, харин энэ удаад тойрог өгөхгүй гэсэн хүмүүстэй ил тод хэлсэн сураг дуулдаж байлаа. АН-ын хувьд ирэх сонгуулийг холимог системээр явуулах бодолтой байгаа.
Тэгэхээр сонгуулийг ямар тогтолцоогоор явуулах нь эцэслэгдээгүй гэсэн үг” хэмээжээ. Тиймээс олонхийн бүлэг энэ асуудлаар ойлголцолд хүрч чадвал сонгууль хуучин байдлаараа явах нь. Сонгинохайрханаас дүүргийн АН-ын дарга Ө.Пүрэвбаатар, Л.Эрдэнэчимэг, Баянзүрхээс дахиад Ж.Батзандан өрсөлдөх бэлтгэлээ хийж эхэлсэн. Хан-Уулын хос хоёр ч ирэх жил дөрөө харшин давхих нь тодорхой байна.
Гэхдээ АН-ын баримталж байгаа бодлого нь тойрогтоо нэр хүндтэй зайлшгүй суудал зулгаах хүмүүсээ явуулж, нэр хүнд нь буурсан, эсвэл олон удаа парламентад сонгогдсон гишүүдээ жагсаалт руу оруулах бодлого баримталж байгаа юм. Тэр утгаар харвал Хан-Уулаас олон сонгогдсон Л.Болд, Баянзүрхэд нэр дэвших Д.Арвин нар жагсаалт руу орж, Уул уурхайн сайд асан, УИХ-ын гишүүн Д.Ганхуяг Баянзүрх тойрог руу очих магадлал өндөр байгаа юм.
УИХ-ын гишүүн Л.Гантөмөр тойрогтоо хэвээр үлдэж, харин Р.Амаржаргал гишүүн жагсаалт руу орох нь гэсэн яриа гараад байгаа. Тэгсэн тохиолдолд Худалдаа хөгжлийн банкны гүйцэтгэх захирал Мэдрээ Сүхбаатарыг сонгох магадлалтай. Өмнөх сонгуулиар жагсаалтаар орж ирсэн гишүүдээс УИХ-ын гишүүн М.Батчимэг Орхон аймаг, Р.Бурмаа Дорнодод, Д.Эрдэнэбат Сэлэнгэд өрсөлдөх нь тодорхой болсон.
“Мон-Уран”-ы Б.Наранхүү өнөө жил ч Дундговьдоо өрсөлдөх бол Х.Баттулга жагсаалтаар, Д.Ганбат хонгор нутгаасаа өрсөлдөх нь гэсэн бор шувуу нисч байна. С.Одонтуяа, С.Эрдэнэ нар тойргоо бусдад өгөхийг хүсэхгүй байгаа. Намын даргын фракцид байсан хүмүүс гэдэг утгаараа Баянголын хоёр, нэмээд Г.Баярсайхан Чингэлтэйгээ авч үлдэх нь. Архангайгаас Б.Болор, Р.Гончигдорж нар өрсөлдөх яриа эрчээ авчээ.
Харин Н.Батбаяр гишүүн АН-д хангалттай олон жил тойргоос суудал авч ирсэн учраас энэ удаад жагсаалтад орох магадлалтай. Ерөнхий сайд Ч.Сайханбилэг, АН-ын дарга З.Энхболд, Ерөнхий нарийн бичгийн дарга Л.Эрхэмбаяр нар автоматаар жагсаалтаар орж ирнэ. Увс аймагт экс сайд Н.Алтанхуяг, Цөмийн энергийн газрын дарга асан Н.Тэгшбаяр нар магадлал өндөртэй ч Д.Нямхүүг мартаж боломгүй. Өлгий нутгаас өнөө жил К.Сайрааныг сойж, А.Бакейг жагсаалт руу татах боломж бий.
Монгол Улсын дархан аварга А.Сүхбат Төв аймагт, Олимпийн аварга Н.Түвшинбаяр Булган, Их аварга Д.Дагвадорж Өвөрхангайд санаатай гэдгээ илэрхийлж намын даргатай ойр ойрхон уулзах болсон сурагтай. “Ажнай” Д.Бат-Эрдэнэ Өмнөговиосоо өнөө жил ч суудал зулгаах биз. МҮАН-аас урваж орж ирсэн Д.Батцогт Ховдоос хүч үзнэ.
Р.Эрдэнэбүрэн, О.Эрдэнэбулган, Г.Ургамалцэцэг, Г.Байгальмаа, Д.Болдбаатар зэрэг өнгөрсөн хугацаанд дэд сайдын албан тушаал хашсан залуучууд ирэх сонгуулиар мэдээж тойрогт өрсөлдөнө. Энэ утгаараа АН-ын лидер улстөрчид жагсаалт руу орж, тойрогт дандаа залуус өрсөлдөх дүр зураг харагдаж байна.
МАН-ын хувьд мөн л залуучуудаа дэмжих зорилго баримталж байгаа. Тэр ч утгаараа олон сонгогдсон гишүүдээс илүүтэй намын залуусын улс төрийн тоглолт, пиар хүчтэй байгаа нь харагдах болсон. Дорнодыг Н.Номтойбаяр хэдийнэ өмчилсөн.
Баянзүрхэд өдгөө дэд сайдын алба хашч буй Баянзүрх дүүргийн Засаг дарга асан Б.Батзориг, Б.Мөнхбаатар нар нэр дэвших бэлтгэлээ базааж буй мэдээлэл хэвлэлээр гарч эхэллээ.
МАН-ын хувьд мөн л залуучуудаа дэмжих зорилго баримталж байгаа.
Гадаад хэргийн дэд сайд Н.Оюундарь саяхан Сэлэнгэ нутгаар зочилж зорилгоо тодорхой болгочихсон. Энэ тойрогт Сангийн сайд Ж.Эрдэнэбат нэг бүсгүй дагуулан өрсөлдөх бололтой.
Уул уурхайн дэд сайд Г.Тэмүүлэн Архангай, Я.Содбаатар, С.Чинзориг, аймгийн Засаг дарга Д.Тогтохсүрэн нараас хоёр нь Өвөрхангайд нэр дэвшинэ. Л.Оюун-Эрдэнэ Хэнтийд өрсөлдөх бол Б.Бат-Эрдэнэ аварга өнөө жил жагсаалтаар УИХ-д орж ирэхээр санаархах нь.
О.Содбилэг Эрдэнэт, Чингэлтэй дүүргийн Засаг дарга Д.Ганболд дүүрэгтээ, Л.Энх-Амгалан, Д.Сарангэрэл нар Хөвсгөл, Д.Сумъяабазар, Ц.Сандуй Сонгинохайрхан, Баянгол дүүрэгт Л.Амгалан, Ж.Ганбаатар, Хан-Уул дүүрэгт Б.Саранчимэг, Сү.Батболд нар магадлал өндөр байгаа. Д.Оюунхорол, Ж.Батсуурь, Ж.Энхбаяр, Су.Батболд, Д.Лүндээжанцан нарын гишүүд энэ удаад жагсаалтаар орж ирнэ.
Ц.Нямдорж гишүүний хувьд жагсаалтаар орж ирэх шаансаа алдчихсан учраас өнөө жил хотын аль нэг дүүрэгт, эс бөгөөс УИХ-д өрсөлдөхгүй байж мэдэх юм. Барилга хот байгуулалтын сайд Д.Цогтбаатар УИХ-ын гишүүн М.Зоригтын тойрогт өрсөлдөх сураг дуулдлаа. А.Тлейхан жагсаалт руу орж, Ардын нам өлгийчүүд рүү Аж үйлдвэрийн яамны дэд сайд Х.Баделханыг явуулахаар тохироо хийсэн сурагтай.
“Шударга ёс” эвслийн хувьд ирэх сонгуулиар эвсэл болж орох эсэх нь эргэлзээтэй. Мэдээж өнөө жил хамгийн рейтинг өндөртэй байсан гишүүдээсээ гадна шинээр намд элссэн гишүүд тойрог хувааж авна. Өнгөрсөн сонгуульд тойрог зулгааж ирсэн гишүүн МАХН-д бараг л байхгүй. Тиймээс энэ жил тойргийн гишүүдээ жагсаалт руу явуулах бодлого барих нь. Намын удирдлагуудын зүгээс хэн хаана нэр дэвших хүсэлтэй вэ гэдгийг нь асууж, саналыг нь авсан гэх мэдээлэл байна.
Жил жилийн хамгийн өрсөлдөөн ихтэй тойрогт ордог Өвөрхангайд өнөө жил дандаа нутгийнх нь хүүхдүүд өрсөлдөх нь ээ. МҮАН-аас өнөө жил мөн л жагсаалтын гишүүдээ тойрог руу явуулна. Тухайлбал, УИХ-ын гишүүн Г.Уянга Сэлэнгэ аймгаас нэр дэвших нь гэх яриа байна. Н.Батцэрэг Өвөрхангай, эс бөгөөс хотын аль нэг дүүргийг сонгох юм байна.
Энэ бол эхний байдлаар таамаг төдий яриа. Сонгуулийн хууль хэрхэн батлагдахаас, мөн жилийн жилд байдаг тойргийн наймаа яаж явахаас шалтгаалан зарим нэг тойргийн нэр дэвшигчид өөрчлөгдөж, шинэ хүмүүс гарч ирэх магадлал ч өндөрсөнө. Парламентад суудалтай намууд үндсэндээ нэр дэвших сонирхолтой хүмүүсийнхээ нэрсийг авч дууссан бөгөөд хэн хаана өрсөлдөх вэ гэдгийг тандаж судалгаа хийж, энэ тойрогт мөнгө хаяж чадах, эс чадахаас шалтгаалан хүмүүсээ явуулах бололтой. Урьдчилсан таамгаас харахад өнөө жил жагсаалтад намуудын хөгшчүүл “нуугдаж”, тойргуудад залуусын тулаан өрнөх дүр зураг харагдаж байна.