Эр хүн бүрд нэг архичин найз байдаг. Бас ардчиллын партизанууд хэмээх нэг ойлголт бий. Эдний нийтлэг нэг шинж чанар нь тодорхой хугацааны давтамжтайгаар багаараа “айлчилж” ирнэ. Тэгээд урьдын сайн найзууд байснаа дурсана, амьдрал ахуй хүнд байгаа, улс төр нэг л болохгүй байгаагаа, нэг том ажил хөөцөлдөж байгаа тун удахгүй хөл дээрээ босох гэж байгаагаа, дотор муу байгаа тул засах гэж яваагаа ний нуугүй ярина. Занг нь мэдэх найзууд нь заримдаа түүний ар гэр амьдрал ахуйг бодсондоо, заримдаа салахын түүс болсондоо, заримдаа зовлонг нь нимгэлэх гэж халаасаа тэмтэрэхээс өөр аргагүй болдог.
УИХ-ын дарга маань сая Япон улсад айлчлав. Япончууд танилын нүүр халуун гэдэгчилэн М.Энхболд даргыг маань яаж хоосон буцаах вэ хэмээн 850.0 сая ам доллар өгөхөөр болов. Япончууд энэ 25 жилийн хугацаанд нийтдээ 3.0 тэрбум ам долларын дүнтэй зээл тусламж олгож хандивдалгчдын жагсаалтыг тэргүүлдэг. Ер дарга болсон томчууд маань улаан, цэнхэр гэлтгүй бүгд Японд очиж гуйлга гуйдаг, өнөөдүүл нь буруу харж уйлж, зөв хөрж инээж хэдэн доллар өгөөд явуулдаг жишиг тогтоод бас 25 жил болж.
Өнгөрсөн 25 жилд бид олон улсын байгууллагууд, ардчиллыг дэмжигч улс орнууд, банкууд, санхүүгийн байгууллагууд, сангууд гээд тоолбол 100 гаруй айлаас зээлэхээс нь зээлж, гуйхаас нь гуйгаад багцаалбал нийтдээ 30,0 гаруй тэрбум ам доллартай тэнцэх мөнгө аваад үрэн таран хийгээд дуусгасан гэсэн тооцоо байна.
Үр дүнд нь бидний амьдрал дээшилсэнгүй, улс орон хөгжсөнгүй, нэр муудлаа, өр нэмэгдлээ, архичин, ардчилагч, хар тамхичин, дураараа, ажил хийх дургүй, зүрх сэтгэл нь хоосорсон, яравгар цамаан их зантай, шуналын тулам болсон, нам албан тушаал хоёрыг эцэг эхээсээ, эх орноосоо илүүд үздэг болсон хэдэн болох бүтэхгүй үр хүүхэдтэй айл бож үлдэх шив дээ.
Дэлхий хэмээх 192 айлтай өчүүхэн тосгонд Монголчууд бид “Аав нь ардын, ардчиллын, иргэний, өнгөтэй өнгөггүй гээд есөн шидийн хувьсгалын партизан гэдгээрээ түрий барьдаг, энгэр дүүрэн одонтой, архи зооглох дуртай, айл хэсч шараа тайлдаг, гуйлга гуйж гэрээ тэжээдэг, үүнийгээ байх ёстой ердийн зүйл хэмээн боддог, нэрээ хичээх ичих булчирхай гэж байхгүй, ээж нь энгэр султай америк, япон, орос, хятад, солонгос, араб, хар, шар, шохнор хамаагүй хэдэн доллар харуулсан бүхэнтэй явалддаг, үүнийгээ үр хүүхдүүддээ тэжээхийн тулд хэмээн тайлбарладаг баруун халаасандаа МАН-ын батлахтай, зүүн халаасандаа АН-ын батлахтай, жигүүртнүүд зодолдоход далавчаа үзүүлдэг, араатнууд зодолдоход савраа үзүүлдэг, сүүн тэжээлтнүүд хов базахад мөөмөө үзүүлдэг сарьсан багваахайрхуу л айл харагдаж байгаа байх даа.
Төрийм өмчийн гэгдэх томоохон 89 компани байдаг юм байна. Энэ компаниудын тайлангаар баталгаажсан өр 2016 оны жилийн эцсийн байдлаар 10.8 их наяд төгрөгт хүрчээ. 2017 онд бид улсаараа, бултаараа нийлж хөдөлмөрлөөд, хөдөлмөрлөөд хамаг хар хөлсөө дуслуулж ажиллаад, ажиллаад 7.3 их наяад төгрөгийн орлогыг улсын төсөвтөө оруулна. Бас төрийн тэргүүнээсээ эхлээд сайд дарга нараа оруулаад дээр нь сая төрсөн баяцхан үрсээсээ нэгийг ч үлдээдгүй бүгдийг нь нэмж тоолоод 3.0 саяуулаа идээд идээд 7.8 их наяд төгрөгийг хувааж хүртэх юм байна. Гэтэл төрийн өмчийн нэртэй 89-хөн компани үүний дотор нэр бүхий 50-иадхан компаний өр 10.8 их наяад төгрөгт хүрсэн гэж байдаг.
Өнөөх өр нь хүү алдангаараа өдөр хоногоор өсч байдаг. Бид цагдаадаа, багшдаа, эмчдээ, хуульчдаа цалинг нь тавилгүй нэг ч хөгшний тэтгэвэрийг нь өгөлгүй ажиллуулж машинаа асаалгүй, тогоо залгалгүй, хуудас цаас ч худалдаж авалгүй төрд орж ирж байгаа сохор зоос бүрийг энэ компаниудын өрийг дарахад ашиглана гэж тооцвол 2 жилийн хугацаа хэрэгтэй байна. Энэ хооронд өнөөх 3 сая иргэнээс маань хэд нь амьд тэсч үлдэхийг хэн ч таашгүй...
Гэтэл энэ “өр”-ийн өмчийн компаниудын захирлууд 3-12 сая төгрөгний цалинтай, улирал тутам өндөр урамшуулал авдаг, зээл аваад цалингаа нэмдэг, гадаад дотоодод өндөр зардалтай аялал хийдэг, тэгэхдээ хоногийн 10 сая төгрөгний үнэтэй буудалд тухалдаг, ах дүү хамаатан саднуудынхаа хүүхдүүдийг компаний зардлаар өндөр төлбөртэй сургуульд сургадаг, байгууллагынхаа 100 жил хэрэглээд дуусахааргүй 00-ийн цаас, бэлгэвч тэргүүтнийг нэг мөсөн базаадаг.
Энд тэндэхийн хог дээрээс олж ирсэн тоног төхөөрөөмжийг хорвоод байхгүй үнээр агуулах агуулахаар нь худалдаж авдаг энгэртээ намын батлахтай, ардаа бат хамгаалалттай, эх оронч яриатай, ажил хэрэгч дүртэй ад чөтгөрүүд, нэг нь өнхөрөвч нөгөө нь ургаад гараад ирдэг олон толгойтой мангасуудын өнөө цагийн амилсан дүрүүд болон тодорчээ.
Тухайлбал төрийн өмчийн “Мон-Атом” ТӨХК нь захирал, захирлын туслах, цэвэрлэгч, жижүүр гэсэн 4-5 орон тоотой сүүлийн 4 жилд удирдлагууд нь 3-4 удаа солигдож жилд 535,0 сая төгрөгний алдагдалтай ажиллаж, 6 тэрбум төгрөгний өр үйлдвэрлэсэн.
Сайншандын аж үйлдвэрийн цогцолбор гэгч төслийн нэгж компани ч болж амжаагүй, ганц ажилтангүй байж 12 тэрбумын өр үүсгээд байгаа гэсэн мэдээлэл байна.
Өртөнгүүдийн манлайлагчдыг жагсаавал Хөгжлийн Банк 6.3 их наяд, Төрийн Банк 1.3 их наяд, Эрдэнэс Таван Толгой 789.0 тэрбум, Эрдэнэт Үйлдвэр 633.0 тэрбум, ТОСК 351.0 тэрбум, МИАТ 310 тэрбум, Монголын Төмөр Зам 80.0 тэрбум гээд л тэрбум тэрбумаараа ар араасаа хөвөрнө.
Өрийн мангасуудын тухай эхний түүх үүгээр өндөрлөж байна. Үүний дараа тусгай сангууд хэмээх цөөврүүд, орон нутгийн өмчийн компаниуд хэмээх хархнууд, албан байгууллага бүрийн амбаарын хөх хулганууд хэмээх бас бус үлгэрүүдийг нэг нэгээр нь хамтдаа хүүрнэлдэхийг уриалж байна.
Д.Уламбаяр
2017 оны 04 сарын 2-3