МУИС-ийн багш нар удирдлагуудаа эсэргүүцэн шаардлага хүргүүлжээ
МУИС-ын Үйлдвэрчний хэвлэл хороо, МУИС-ийн багш нарын холбооноос МУИС-ийн удирдлагуудад шаардлага хүргүүлж, улмаар ирэх гуравдугаар сарын 6-ны өдрийн дотор шийдвэрлэхгүй бол ажил хаяхаар болжээ.
Өнгөрсөн дөрвөн жилийн хугацаанд Ардчилсан намын засгийн газар боловсролын салбарыг шинэчлэхээр болж, улмаар олон төрлийн бодлого хэрэгжүүлсэн нь амьдралд нийцэхгүй, сургалтын чанар муудах, хэвийн үйл ажиллагаа алдагдахад хүрсэнд сургуулийн удирдлагууд буруутай гэж үзэж байгаа юм. Тиймээс МУИС-ийн багш нарын холбооноос салбарын яам, Засгийн газарт шаардлага хүргүүлж, МУИС-ийн удирдлагуудыг нэн даруй шинэчилж өгөхийг шаарджээ.
“Бид сургуулийн захиралтай уулзсан. Захирал биднийг та нар ажил солих чиг үүрэгтэй хүн биш. Тиймээс би ажлаа үргэлжлүүлнэ гэж хэлсэн. Гэтэл сургуулийн ажил доголдож, хичээлд шаардлагатай санхүүгийн дансыг хаасан. Хэрвээ бид сайн боловсон хүчин бэлдье гэвэл сургууль чадвартай байх ёстой” гэж МУИС-ийн багш нарын холбооны тэргүүн, МУИС-ийн ШУ-ны сургуулийн Эдийн засгийн тэнхимийн ахлах багш П.Лхамсүрэн ярьж байсан юм.
Үүнээс гадна МУИС-ийн багш нарын үйл ажиллагааг дэмжиж МУБИС, АШУҮИС-ийн багш ажилтнууд тухайн сургуулийн удирдлагадаа шаардлага хүргүүлж, шаардах хуудсанд гарын үсгээ зуржээ. Одоогоор шаардах хөдөлгөөнийхөн оюутны зөвлөлийн төлөөлөлтэй уулзан, хэрвээ ажил хаялт болсон тохиолдолд оюутнуудыг хохироохгүй байдлаар, хичээлийн нөхөх төлөвлөгөө боловсруулж байгаа гэж багш нарын холбооны зүгээс мэдээлсэн юм.
