МАХН-ын дарга Н.Энхбаяр шиг улстөрд хор найруулж хутгах талаар мэргэшсэн хүн заримдаа алга л байдаг.
Төрийн бүх өндөр албан тушаалуудыг хашсан, тэгээд бас оймстойгоо ачигдаж, аавын хаалга татсан, төрөлх намаа хуваасан, сонгуульд орохдоо ч саналыг нь хувааж ялагдуулсан, парламентад анх удаа гуравдагч хүчний бүлэг байгуулж чадсан гээд Монголд улстөрийн жинхэнэ үзэгдэл болсон хүн л дээ.
Энэ хүний одоогийн нөхцөл байдлыг нь харвал яг л үлгэрт гардаг алтан загасны эмгэн шиг харагдаж байх юм.
Н.Энхбаяр, Ц.Цолмон нарын нам гэдэг нь иймэрхүү асуудал дээр батлагдчихаж байгаа тул МАХН-ынхан юу гээд ч нэмэргүй.
Үндсэн хуулийн Цэцийн тавдугаар дүгнэлт гарахаас өмнө Н.Энхбаяр шиг хэрэгтэй буянтай хүн АН, МАН-д алга байлаа.
Тэр нэг шөнийн настай эвслийн гэрээг МАН-ынханд тэврүүлж орхиод АН-ын шүхэр дор зогсохоор явахдаа эрчүүдийг араасаа уйлуулж дуулуулсан гунхсан сайхан бүсгүй мэт л байлаа.
Түүнээс ч өмнө Н.Энхбаяр улстөрийн намуудын хамтын ажиллагааны хувьд тогтворгүй, олон ааштай, хоёр нүүртэй үйлдлийг мөн ч их гаргасан юм. Оны өмнөөс л МАН-МАХН-ын эвсэл, тэр бүү хэл нэгдлийн асуудлыг ахмадуудаараа дамжуулан нийгэмд мессеж өгч, далдуураа эрх баригчдыг айлгаж эхэлсэн гэж хэлж бас болно.
Ийм мессеж түүний хувьд, АН-тай хийх яриа хэлцлийнх нь гол хөзөр болж байв.
Яв явсаар намынхаа Бага чуулган дээр урьд өдөр нь МАН-тай эвсэхээр болсон тухай сүр дуулиантай мэдээг тас цохиж утсаа салгаад алга болсон хүн.
Тэр нь мэдээж хэрэг 3.Баянсэлэнгэ нарын санаачилсан Өршөөлийн хуультай холбоо бүхий тогтоолын төслөөс шалтгаалсныг бүгд л ярьж бичиж байлаа.
МАН-тай нийлж сонгуульд ялалт байгуулахаас илүүтэй өөрөө л нэр дэвших боломжтой болох нь түүнд чухал байсныг намын нөхөд нь таашааж хүлээж авсан нь юу л бол. Гэхдээ эцсийн эцэст Н.Энхбаяр, Ц.Цолмон нарын нам гэдэг нь иймэрхүү асуудал дээр батлагдчихаж байгаа тул МАХН-ынхан юу гээд ч нэмэргүй.
Н.Энхбаярын яг ийм олон ааш гаргаж тал тал тийш үсчсэн тоглолтыг анаж байсан З.Энхболд ганц л тогтоолын төслөөр хуураад МАН-тай эвсүүлэхгүй голын нөгөө эрэгт үлдээснийг тэр хожимдсон ч гэсэн ойлгосон биз.
УИХ-ын нэгдсэн хуралдаанаар Үндсэн хуулийн Цэцийн дүгнэлтийг хүлээгээд авсан тул цаашид Их суудлын хуралдаан зарлах ч хэрэг гарсангүй, мажоритараар энэ удаагийн сонгууль явах нь тодорхой болсон тул хүчтэйг нь дагаж, хүчгүйг нь хаяж ирсэн Д.Тэрбишдагва, Ч.Улаан нар ч дуун дээр нь Н.Энхбаярыг хаяж одлоо.
Эцэст нь Н.Энхбаяр МАН-тай эвсэж сонгуульд ялсан ч үгүй, АН-аас тогтоолын төслөө батлуулж авсан ч юмгүй, ИЗНН байтугай МНН ч байхгүй, адаг сүүлд нь Ч.Улаан, Д.Тэрбишдагва ч үгүй, өөрт нь гэргий Ц.Цолмон, хүү Э.Батшугар нараас нь ч илүү хайртай байж мэдэх өнөөх л З.Баянсэлэнгэ, О.Баасанхүү, Э.Эрдэнэжамьян нартайгаа үлдэж хоцорлоо. Яг л үлгэрт гардаг алтан загасны эмгэн илүү ихийг хүссээр эцэст нь хоосон тэвштэйгээ үлддэг шиг.