Moody's Монголын үнэлгээг бууруулах болсон шалтгаан

Moody’s агентлагаас Монголын зээлжих зэрэглэлийг өнгөрсөн долоо хоногийн эцсээр буруулах болсныг мэдээлсэн билээ. 

Үүний шалтгаан нь Монгол улсын гадаад хөрвөх чадвар муудсан, гадаад валютын албан нөөц буурсан зэрэг нь бондын үнэлгээг бууруулах үндэслэл боллоо гэжээ. 

Монголын үндэсний төгрөг нь 2011 оноос хойш тасралтгүй суларч байгаа бөгөөд түүхэн дээд хэмжээ болох 1840-д хүрсэн байна. 

Энэ жил гэхэд 10 хувиар суларсан бол 2011 оны дөрөвдүгээр сараас хойш 35 хувиар сулраад байна. Ийнхүү засгийн газрын бондыг В1-ээс В2 болгон бууруулж төлөв байдлыг “сөрөг” гэж үнэлжээ. 

Мөн Хөгжлийн банкны бондыг В1-ээс В2 болгон бууруулсан байна. Мөнгөний ба сангийн тэлэх бодлого нь эрэлтийн дарамтыг үүсгэж, инфляцийг өдөөн, дам нөлөө нь банкны сектор, төлбөрийн тэнцэлд нөлөөлсөн гэж агентлагаас мэдээллээ. 

Монголын нийт гадаад валютын албан нөөц нь хагас жилийн хугацаанд 2.2 тэрбум ам.доллараас 1.6 тэрбум ам.долларт хүрч буурлаа.

Монголын нийт гадаад валютын албан нөөц нь хагас жилийн хугацаанд 2.2 тэрбум ам.доллараас 1.6 тэрбум ам.долларт хүрч буурлаа. Ингэж багасахад гадаадын шууд хөрөнгө оруулалт өнгөрсөн жил үлэмж хэмжээгээр буурсан нь нөлөөлсөн. 

“Хөрөнгө оруулалтын орчин тодорхой бус хэвээр байна. Тэгэхээр гадаадын шууд хөрөнгө оруулалт энэ жилдээ лав сэргэхээргүй байна. Цаашилбал хөрөнгө оруулалтын орчны тогтвортой бус байдал нь уул уурхайн салбарын хөгжилд сөргөөр нөлөөлж магадгүй” гэж тайланд дурджээ.

Мөн гадаадын өрийн дарамт албан нөөц буурахын хэрээр нэмэгдсээр байна. Moody’s-ийн гадаад эмзэг байдлын индикатор буюу ирэх нэг жилийн хугацаанд тухайн улсын гадаад өрөө төлөх нөөцийн хүрэлцээтэй байдлыг хэмждэг уг хэмжүүр 2014 онд 130 хувь болж өссөн бол 2015 онд 196 хувь болж өсөхөөр байна. 100 хувиас дээш гарахад гадаад зээлдэгчдээс хүчтэй хамааралтай гэсэн үг хэмээн  Moody’s-ээс мэдээллээ. 

Төв банкны 2013 оноос хэрэгжүүлсэн тэлэх бодлого буюу банкуудад хөнгөлөлттэй зээл олгож, бага хүүтэй мортгэйжийн зээл гаргаж барилга, үл хөдлөх хөрөнгийн салбарыг дэмжсэн нь эрэлтийг өсгөсөн. Инфляцийн дарамт үргэлжилхээр байна. 

Энэ нь төлбөрийн тэнцэлд дарамт учруулж капиталын урсгалд эрсдэл учруулна. Цаашилбал гадаад төлбөрийн чадварыг муутгана гэж Moody’s үзлээ.