Хэн юу хэлэв
Ж.Батзандан: Намайг шалгуулахаар хэн нэгэн хүсэлт өгөөгүй
Өнгөрөгч долоо хоногт УИХ-ын гишүүн Засгийн газрын гишүүнээр ажиллахгүй байх тухай асуудал олны анхаарлын төвд байлаа. Эрхэм гишүүд ч энэ асуудлыг тойруулан өөр өөрсдийн байр суурийг илэрхийлсэн бөгөөд эндээс цойлсон нэг гишүүн нь Ж.Батзандан.
Намынхаа эсрэг кноп дарж, Засгийн газрыг тогтворгүй байдалд түлхсэн буруутнуудын нэг гэгдээд байгаа түүнийг намаас нь хөөнө, бүр АТГ-т шалгуулахаар өгсөн гэх мэдээлэл тарсны дараа хэвлэлд ярилцлага өгсөн юм.
Ж.Батзандан: Намайг АТГ-т шалгуулахаар өгсөн гэдэг нь худлаа мэдээлэл байсан.
Түүнчлэн, “Би Монгол Улсын Ерөнхийлөгч болно” гэсэн утга бүхий ярилцлага өгсөн түүний мэдэгдэл олны анхаарлыг зүй ёсоор татлаа. Ж.Батзандан гишүүн “Нэг их дарамтлаад байгаа зүйл байхгүй.
Бүлгийн хуралдааны үеэр бие биедээ хатуу ширүүн үг хэлэх бол зөндөө байдаг. Намаас хөөнө, хасна гэсэн уурласан, бухимдсан хүмүүсийн яриаг улстөрд явж байгаа хүн тоох хэрэггүй гэж би боддог. Гэхдээ улстөрчид соёлтой байх ёстой. Гэр бүл, найз нөхөд, намын нөхөддөө хэлж болохгүй үг гэж бас байх ёстой.
Тэрийгээ манайхан бас мэдэж байгаа байлгүй дээ. Тиймээс би дарамтлуулаад, сэтгэл санаагаар унасан зүйл алга. Намайг АТГ-т шалгуулахаар өгсөн гэдэг нь худлаа мэдээлэл байсан. Намын дарга, АТГ, Цагдаагийн ерөнхий газраас тодруулахад намайг шалгуулахаар хэн нэгэн хүсэлт өгөөгүй гэсэн” хэмээн ярьсан юм. Түүнчлэн, намын дарга намайг ална тална гэж хэлсэн гэх мэтээр багагүй улстөржсөн, маргаан дагуулсан юм.
С.Одонтуяа: АН-ын гишүүний санал засаг огцруулахад нөлөөлбөл намаас гаргана
-УИХ дахь АН-ын бүлгийн дэд даргын албан тушаалыг авснаасаа хойш бүлгийн байр суурийг төдийлөн илэрхийлж байгаагүй С.Одонтуяа гишүүн даваа гарагт мэдээлэл хийхдээ олон хүнийг гайхшруулсан бас алмайруулсан мэдэгдэл хийсэн юм. Учир нь түүний мэдэгдлийн дараа Ардчилсан нам анархизм тогтоож, гишүүдээ дарамталж байна гэх сөрөг пиар маш их явлаа.
С.Одонтуяа гишүүн намын дүрмийг танилцуулсан ч энэ нь гишүүдээ хайрцагладаг, Ардын намаас ялгаагүй дарангуйлал тогтсон нам болж гэх хардлагын эх үндэс болсон. Зарим нэг гишүүд нь ч энэ үгэнд нь тоглолт хийж, өнгөрөгч долоо хоногт багагүй сенсаацилсан гэхэд болно.
С.Одонтуяа гишүүн “Засгийн газрын тухай хуульд нэмэлт өөрчлөлт оруулах тухай хуулийн төсөлтэй холбоотойгоор УИХ-аас эцсийн шийдвэр гараагүй байна. Ардчилсан намын дүрэмд зохицуулалт байдаг, тэр нь Засгийн газрыг огцруулсан тохиолдолд гэсэн өгүүлбэрээр бий.
Тодруулбал, Ардчилсан намын гишүүний өгсөн санал Засгийн газрыг огцруулахад нөлөөлсөн бол тухайн гишүүдийг намаас гаргана. Хувь хүний сонголтоор саналаа өгөх эрхтэй ч яах гэж УИХ-д намын бүлэг байдаг билээ.
Бүлгийн гишүүний хувьд хувь хүний сонголтоор саналаа өгөх эрхтэй ч бүлгийн шийдвэрээ дагах нь үүрэг байдаг. Гэхдээ энэ асуудалд эцсийн шийдвэр гарахыг хүлээх хэрэгтэй” хэмээн байр сууриа илэрхийлсэн билээ.
М.Батчимэг: Ерөнхийлөгч хуулийг 2016 оноос мөрдөхгүй бол хориг тавина гэж хэлсэн
-Бас л давхар дээлтэй холбоотой асуудал. Гэхдээ өнөөдрийн улс төрийн хүрээнд хүлээлт үүсгээд байгаа Ерөнхийлөгчийн шийдвэр яаж гарах бол гэдэг асуудлыг хөндсөн учраас сонирхолтой сэдэв. Учир нь УИХ-ын гишүүн М.Батчимэг Ерөнхийлөгчийн хамгийн ойрын хүн.
Гишүүн байхаасаа өмнө зөвлөхөөр нь ажиллаж байсан учраас Ерөнхийлөгч ямар бодолтой байгааг гишүүний ярилцлагаас бүрэн харчихаж болмоор. М.Батчимэг гишүүн “Би энэ хуулийг батлуулахын төлөө байгаа. Зөвхөн хугацааны хувьд 2014 оноос эхлэн мөрдөх ёстой гэж бодож байсан зарчмын байр сууриасаа л алхам ухарсан.
Сүүлийн хоёр сар хөшигний цаана өрнөсөн улс төрийг анхааралтай ажигласны дараа ийм сонголт хийхэд хүрч байна.
М.Батчимэг: УИХ 2014 оноос мөрдөхөөр баталбал нэг бол энэ хууль огт байхгүй болох, эсвэл улс оронд хүсээгүй улс төрийн хямрал буй болох нөхцөл бүрдэж байна гэж би харж байна.
УИХ 2014 оноос мөрдөхөөр баталбал нэг бол энэ хууль огт байхгүй болох, эсвэл улс оронд хүсээгүй улс төрийн хямрал буй болох нөхцөл бүрдэж байна гэж би харж байна. “Чоно борооноор” гэдэг шиг бужигнуулж байгаа хүмүүс олон байна. Хууль санаачлагчийн хувьд Ерөнхийлөгч эхнээсээ ойлгомжтой хэлсээр ирсэн.
Хуулийг мөрдөх хугацаа 2016 оноороо үлдэхгүй бол энэ хуульд хориг тавина гэж. Бас хуулийг татаж ч болох хувилбар яригдсан байдаг. Хоригийг УИХ хүлээж авах эсэх дээр эргэлзээ гарвал санаачлагчийн хувьд хуулийг батлагдахаас нь өмнө эргүүлэн татчих хувилбар Ерөнхийлөгчид бий гэсэн үг.
Өнгөрсөн онд Хэвлэлийн эрх чөлөөний хуулийг хэлэлцүүлгийн шатанд нь эргүүлэн татаж байсан явдал миний санаанд одоо ч тод хэвээрээ байна. Тиймээс энэ хуулийг батлуулах нь эхний том алхам гэж би ойлгож байгаа” хэмээн ярьсан юм. Тэгэхээр Ерөнхийлөгчийн хатуу байр суурь ганхахгүй бол МАН-ын хийгээд байгаа улс төрийн тоглолт ямар ч үр дүнгүй болох нь ээ.
