УИХ-ын гишүүн С.Жавхлан, ТТЭН-ын дарга Г.Уянга нар өнөөдөр Төрийн ордонд мэдээлэл хийлээ.
Өнгөрсөн оны арванхоёрдугаар сарын 6-нд Тусгаар Тогтнол Эв Нэгдлийн нам /ТТЭНН/-аас Ерөнхийлөгч Ц.Элбэгдоржийг огцруулах 12 үндэслэлийг гаргаж УИХ-ын дарга болон гишүүдэд хүргүүлжээ.
Уг жагсаалтыг хүлээн авсан УИХ-ын гишүүн С.Жавхлан ТТЭНН-тай хамтарч ажиллах болж буйгаа өнөөдөр илэрхийллээ.
Ингэснээр С.Жавхлан гишүүн УИХ-ын чуулганд Ерөнхийлөгчийг огцруулах асуудлыг оруулах боломжтой болж байгаа юм байна.
Энэ талаар УИХ-ын гишүүн С.Жавхлан "Би хувьдаа энэ үндэслэлүүдийг зөв зүйтэй гэж үзэж байгаа. Тиймээс УИХ-ын гишүүний бүрэн эрхийнхээ хүрээнд Их хуралд хандана" гэлээ.
Харин ТТЭНН-ын дарга Г.Уянга "Монгол Улсын Ерөнхийлөгчийг огцруулах үндэслэлүүдийг гаргаад УИХ-ын дарга болон гишүүдэд хандсан. Ерөнхийлөгчийг огцруулах цорын ганц субьект бол УИХ. Бүх гишүүдэд хандсан ч ганцхан С.Жавхлан гишүүн дуудаж уулзсан. С.Жавхлан гишүүнийг бүрэн эрхийнхээ хүрээнд энэ асуудлыг цааш нь аваад явах болсонд баяртай байгаа" гэв.
Дээрх мэдээллийг хийсний дараа УИХ-ын гишүүн С.Жавхлан, ТТЭНН-ын дарга Г.Уянга нар сэтгүүлчдийн асуултад хариулав.
-Бүрэн эрхийнхээ хүрээнд асуудлыг цааш нь аваад явна гэлээ. Тэгэхээр Ерөнхийлөгчийг огцруулах асуудлыг УИХ-д оруулна гэсэн үг үү. Энэ ажлаа хэзээнээс эхлэх вэ?
С.Жавхлан: -Даруйхан, өнөө маргаашгүй энэ асуудлыг оруулна.
-Ерөнхийлөгчийн сонгууль хаяанд ирчихсэн энэ үед огцруулах асуудал ярих шаардлага байна уу?
Г.Уянга: -Хууль зөрчсөн үйлдэлд хугацаа чухал биш гэж бодож байна.