Засгийн газрын бүтэц, бүрэлдэхүүнийг БАТАЛЛАА

 

УИХ-ын чуулганаар ЗАСГИЙН ГАЗРЫН БҮТЭЦ, БҮРЭЛДЭХҮҮНийг хэлэлцэж эхэллээ

УИХ-ын өнөөдрийн чуулганаар Засгийн газрын бүтцийн тухай, Засгийн газрын бүрэлдэхүүний тухай, Засгийн газрын тухай хуульд нэмэлт, өөрчлөлт оруулах тухай хуулийн төслүүдийн анхны хэлэлцүүлгийг хийж эхэллээ.

Монгол Улсын Ерөнхий сайд Ж.Эрдэнэбат Засгийн газраа байгуулах саналыг Ерөнхийлөгч, УИХ-ын даргад өргөн бариад байгаа билээ.

Гэхдээ Ерөнхийлөгчтэй зөвшилцөх саналын хариуг ДАХИН зөвшилц гэсэн хариу өгсөн байгаа.

Харин УИХ-ын даргад өргөн барьсан саналыг өчигдөр орой УИХ-ын чуулганаар хэлэлцэх эсэхийг цаг сунган хуралдаж шийдвэрлэлээ. Чуулганы хуралдаанд оролцсон 58 гишүүн санал нэгтэйгээр дэмжснээр чуулганаар хэлэлцэхээр болж,  Анхны хэлэлцүүлэгт бэлтгэхээр Байнгын хороо руу шилжүүлсэн юм.

Ерөнхий сайд Ж.Эрдэнбатын өргөн барьсан Засгийн газрын бүтцийн тухай, Засгийн газрын бүрэлдэхүүний тухай, Засгийн газрын тухай хуульд нэмэлт, өөрчлөлт оруулах тухай хуулийн төслүүдээс онцолбол:

Засгийн газрын бүрэлдэхүүн /САЙДУУД/

1. Монгол Улсын Ерөнхий сайд;
2. Монгол Улсын Засгийн газрын гишүүн-Монгол Улсын Шадар сайд;
3. Монгол Улсын Засгийн газрын гишүүн-Монгол Улсын сайд, Засгийн газрын Хэрэг эрхлэх газрын дарга;
4. Монгол Улсын Засгийн газрын гишүүн-Байгаль орчин, аялал жуулчлалын сайд;
5. Монгол Улсын Засгийн газрын гишүүн-Гадаад харилцааны сайд;
6. Монгол Улсын Засгийн газрын гишүүн-Сангийн сайд;
7. Монгол Улсын Засгийн газрын гишүүн-Хууль зүй, дотоод хэргийн сайд;
8. Монгол Улсын Засгийн газрын гишүүн-Хөдөлмөр, нийгмийн хамгааллын сайд;
9. Монгол Улсын Засгийн газрын гишүүн-Батлан хамгаалахын сайд;
10. Монгол Улсын Засгийн газрын гишүүн-Барилга, хот байгуулалтын сайд;
11. Монгол Улсын Засгийн газрын гишүүн-Боловсрол, соёл, шинжлэх ухаан, спортын сайд;
12. Монгол Улсын Засгийн газрын гишүүн-Зам, тээврийн сайд;
13. Монгол Улсын Засгийн газрын гишүүн-Уул уурхай, хүнд үйлдвэрийн сайд;
14. Монгол Улсын Засгийн газрын гишүүн-Хүнс, хөдөө аж ахуй, хөнгөн үйлдвэрийн сайд;
15. Монгол Улсын Засгийн газрын гишүүн-Эрчим хүчний сайд;
16. Монгол Улсын Засгийн газрын гишүүн-Эрүүл мэндийн сайд гэсэн 16 сайдтай байна.

Дэд сайдууд

Тэрбээр Засгийн газрын бүтцэд ДЭД САЙДтай байх өөрчлөлт оруулахаар боловсруулсан байна.

Дэд сайд нь сайдын эрхлэх асуудлын хүрээнд дараах бүрэн эрхийг хэрэгжүүлэх юм байна.

• Сайдаас олгосон бүрэн эрхийн хүрээнд харьяа агентлаг, байгууллагатай харилцах, тэдгээрийн үйл ажиллагааг уялдуулан зохицуулах;
• Хөтөлбөр, төсөл, арга хэмжээний хэрэгжилтийн шуурхай зохицуулалтыг хангуулах;
• Сайдын даалгаснаар Улсын Их Хурал, Ерөнхийлөгч, Засгийн газар, аймаг, нийслэлийн Засаг даргатай харилцах;
• Улсын Их Хурал, түүний Байнгын хороо, Ерөнхийлөгч, Засгийн газар, Ерөнхий сайдаас байгуулах хороо, комисс, зөвлөл, ажлын хэсэгт сайдын түр эзгүйд түүний даалгаснаар сайдыг төлөөлнө гэжээ.

Мөн сайдын түр эзгүйд түүнийг орлож байх хугацаанд гаргасан шийдвэрээ сайдад танилцуулах бөгөөд уг шийдвэрийнхээ хууль зүйн үр дагаврыг өөрөө хариуцах аж.

Дэд сайд бодлогын асуудлаар сайдтай санал зөрснөөс бүрэн эрхээ хэрэгжүүлэх боломжгүй болсон, түүнчлэн хуульд заасан бусад үндэслэл байна гэж үзвэл албан тушаалаасаа огцрох тухай хүсэлтээ Ерөнхий сайдад өргөн мэдүүлж болно гэсэн эрх эдлэх юм байна.

Засгийн газрын бүтэц /ЯАМДУУД/

Ерөнхий чиг үүргийн

1. Байгаль орчин, аялал жуулчлалын яам;
2. Гадаад харилцааны яам;
3. Сангийн яам;
4. Хууль зүй, дотоод хэргийн яам;
5. Хөдөлмөр, нийгмийн хамгааллын яам;

Чиглэлийн

1. Батлан хамгаалах яам;
2. Барилга, хот байгуулалтын яам;
3. Боловсрол, соёл, шинжлэх ухаан, спортын яам;
4. Зам, тээврийн яам;
5. Уул уурхай, хүнд үйлдвэрийн яам;
6. Хүнс, хөдөө аж ахуй, хөнгөн үйлдвэрийн яам;
7. Эрчим хүчний яам;
8. Эрүүл мэндийн яам гэсэн 13 яамтай байхаар санал боловсруулсан.

Яамдуудын хувь цөөлж, заримыг нь нэгтгэн, нэрийг нь өөрчилсөн, Аж үйлдвэрийн яамыг татан буулгасныг Ерөнхийлөгч дэмжээгүй.

Яамдуудыг нэгтгэх, шинээр байгуулах болсон талаар

• Хөдөлмөрийн яам, Хүн амын хөгжил, нийгмийн хамгааллын яамыг тус тус нэгтгэн, шинээр Хөдөлмөр, нийгмийн хамгааллын яамыг ерөнхий чиг үүргийн яамны статустайгаар ажиллуулах саналтай байна. 
• Монгол Улсын эдийн засагт голлох ач холбогдолтой уул уурхайн салбарын хөгжлийн бодлогыг улс орныг аж үйлдвэржүүлэх, хүнд үйлдвэрлэлийг хөгжүүлэх бодлоготой уялдуулах зайлшгүй шаардлагатай байгаа тул Уул уурхай, хүнд үйлдвэрийн яамыг байгуулж ажиллуулах нь зүйтэй гэж үзлээ. 
• Хүнс, хөдөө аж ахуйн яамны суурин дээр Хүнс, хөдөө аж ахуй, хөнгөн үйлдвэрийн яамыг байгуулж ажиллуулах саналтай байна. 
• Эрүүл мэнд, спортын яамны “нийтийн биеийн тамир, спортыг хөгжүүлэх” чиг үүргийг Боловсрол, соёл, шинжлэх ухааны яаманд шилжүүлж, Боловсрол, соёл, шинжлэх ухаан, спортын яам болгон өөрчлөн байгуулах нь зүйтэй гэж үзлээ.

Засгийн газрын хэрэгжүүлэгч агентлагуудын бүтэц

Засгийн газар нь тохируулагч 10, хэрэгжүүлэгч агентлаг 17, нийт 27 агентлагтай ажиллахаар тусгаса​н бөгөөд Засгийн газрын агентлагуудын ТООНД өөрчлөлт орохгүй байхаар зохицуулжээ.

Засгийн газрын хэрэгжүүлэг агентлагуудын өөрчлөлт

• Засгийн газрын тохируулагч агентлаг-Үндэсний хөгжлийн газрыг шинээр байгуулах
• Засгийн газрын хэрэгжүүлэгч агентлаг-Хүүхдийн төлөө газрыг Хүүхэд, залуучуудын хөгжлийн газар болгон өөрчлөн байгуулж, залуучуудын хөгжлийн асуудлыг хариуцуулах нь зүйтэй гэж үзжээ.
• Засгийн газрын хэрэгжүүлэгч агентлаг-Гааль, татварын ерөнхий газрыг хуваах замаар өөрчлөн зохион байгуулж, Гаалийн ерөнхий газар болон Татварын ерөнхий газрыг сэргээн ажиллуулах санал боловсруулжээ. 
• Эрүүл мэндийн даатгалын асуудал эрхэлсэн төрийн захиргааны байгууллага шинээр байгуулахгүйгээр Засгийн газрын хэрэгжүүлэгч агентлаг-Нийгмийн даатгалын ерөнхий газрыг Эрүүл мэнд, нийгмийн даатгалын ерөнхий газар болгон өөрчлөх
• Засгийн газрын хэрэгжүүлэгч агентлаг-Төрийн өмчийн бодлого, зохицуулалтын газрыг Монгол Улсын Ерөнхий сайдын эрхлэх асуудлын хүрээнд байгуулж ажиллуулах. Төрийн өмчийн бодлого, зохицуулалтын газрыг байгуулахтай холбогдуулан Засгийн газрын хэрэгжүүлэгч агентлаг-Худалдан авах ажиллагааны газрыг татан буулгаж, чиг үүргийг нь тус агентлагт шилжүүлэх саналтай.
• Засгийн газрын хэрэгжүүлэгч агентлаг-Улсын бүртгэл, статистикийн ерөнхий газрыг өөрчлөн зохион байгуулж, цаашид Үндэсний статистикийн хороог Улсын Их Хурлын дэргэд сэргээн ажиллуулна.
• Оюуны өмч, патент, зохиогчийн эрхийн асуудал нь улсын бүртгэлийн үйл ажиллагаатай шууд хамааралтай тул Засгийн газрын хэрэгжүүлэгч агентлаг-Оюуны өмчийн газрыг татан буулгаж, Хууль зүй, дотоод хэргийн сайдын эрхлэх асуудлын хүрээнд Засгийн газрын хэрэгжүүлэгч агентлаг-Улсын бүртгэл, оюуны өмчийн ерөнхий газрыг байгуулах нь зүйтэй гэж үзэээ.
• Шүүхийн шийдвэр гүйцэтгэх ерөнхий газар болон Цагдаагийн байгууллага тус тус хариуцан гүйцэтгэх бүрэн боломжтой тул Засгийн газрын хэрэгжүүлэгч агентлаг-Тахарын албыг татан буулгах. 
• Засгийн газрын хэрэгжүүлэгч агентлагууд болох Ашигт малтмалын газар болон Газрын тосны газрыг нийлүүлэх замаар өөрчлөн зохион байгуулах нь зүйтэй гэж үзжээ.