Улсын хэмжээнд 434 мянган иргэн улаанбурханы дархлаажуулалтад хамрагджээ

Улаанбурхан-улаанууд өвчний эсрэг нэмэлт дархлаажуулалтыг 18-30 насныханд энэ сарын 12-ноос хийж эхэлсэн. Дархлаажуулалт тавдугаар сарын 25-н буюу Лхагва гарагт дуусна.

Дархлаажуулалтыг иргэдэд хамгийн ойр эрүүл мэндийн байгууллагын нэгж болох өрхийн эмнэлгээр дамжуулан үнэ төлбөргүй хийж байгаа юм.

 

ХӨСҮТ-ийнхөн өнгөрсөн амралтын өдрүүдэд "Нарантуул", "Бөмбөгөр", "Хархорин" худалдааны төвүүд болон "Гранд" их дэлгүүр, Үндэсний цэцэрлэгт хүрээлэнд ажиллаж буй нийт 2,047 иргэнийг улаанбурхан-улаанууд өвчний  эсрэг нэмэлт дархлаажуулалтад хамруулсан байна.

Түүнчлэн ЭМСЯ-ны Шуурхай удирдлагын албанаас өгсөн мэдээллээр 2016.05.23-ны байдлаар

• Улаанбаатарт 217,162
• Улсын хэмжээнд 434,588 иргэн улаанбурхан-улаанууд өвчний эсрэг нэмэлт дархлаажуулалт хийлгэжээ.