АНУ-аас нууцаар илгээсэн алсын тусгалын пуужинг Украины арми тулаанд ашиглаж эхэлжээ

АНУ-аас нууцаар илгээсэн алсын тусгалын пуужинг Украины арми Оросын эзлэн түрэмгийлэгчдийн эсрэг тулаанд ашиглаж эхэлснийг Вашингтоны албаны эх сурвалж Лхагва гарагт анх удаа мэдээлжээ.

Удаан хугацааны турш Киевийн эрх баригчдын хүсэн хүлээж байсан ATACMS (Army Tactical Missile System) зэвсэг Украины армийн цохилтын зайг хоёр дахин уртасгаж, 300 км болгож байгаа юм байна.

АНУ-ын ерөнхийлөгч Жо Байден өчигдөр Украинд үзүүлэх зэр зэвсгийн тусламжийн $61 тэрбумын багцыг баталсан бөгөөд үүнд дээр дурдсан алсын тусгалын пуужингуудыг нэмж илгээх гэж байгааг эх сурвалж баталжээ.

Гуравдугаар сарын эхээр Байдены засаг захиргаа $300 саяын ээлжит зэвсгийн тусламжийг Украинд үзүүлэх болсныг зарлаж байсан. Энэ багцад ATACMS пуужин анх удаа багтаж байжээ.

Гэхдээ ийм зэвсэг нийлүүлж байгаагаа Цагаан ордон өнөөдрийг хүртэл нууцалж байсан юм.

Үүнээс өмнө олон сарын турш АНУ-ын эрх баригчид алсын тусгалын зэвсэг илгээх Украины талын хүсэлтэд татгалзаж, дээд тал нь 160 км-ийн буюу дунд тусгалын зэвсэг илгээж байв. Татгалзсан шалтгаанаа дайныг "өргөжүүлэхээс болгоомжилсон" гэж тайлбарлаж байлаа.

“Цаг нь болсон гэж би үзэж байна. Босс (Байден) ч бас одоогийн тулааны нөхцөл байдалд үндэслэн өгөх цаг нь болсон гэж үзсэн. Би үүнийг маш сайн бодож тунгаасан шийдвэр гэж бодож байна. Тулаанд шинэ систем нэвтрүүлэх болгондоо бид түүний хурцадмал байдал үүсгэх чадварыг сайтар бодож үзэх ёстой” гэж АНУ-ын зэвсэгт хүчний төв штабын дэд тэргүүн, адмирал Кристофер Грэйди хэвлэлд ярьжээ.

Эх сурвалжийн мэдээлснээр өнгөрсөн долоо хоногт Украины арми шинэ ATACMS пуужинг анх удаа ашигласан байна. Тухайлбал эзлэгдсэн Крымийн хойгийн Жанкой хот дахь агаарын бааз, дараа нь эзлэгдсэн Запорожье мужийн Бердянск хот дахь цэргийн байгууламжид уг зэвсгээр цохилт өгчээ.

Украины эрх баригчид алсын тусгалын зэвсэг хүлээж авснаа албан ёсоор нийтэд мэдээлээгүй байна.

Мягмар гарагт тусламжийн багцыг дэмжсэн АНУ-ын Конгресст талархал илэрхийлэхдээ Украины ерөнхийлөгч Володимир Зеленский “Богино хугацаанд энх тайвныг тогтооход Украины армийн алсын зайд довтлох, их буу, агаарын довтолгооноос хамгаалах хүчин чадлыг нэмэгдүүлэх нь онцгой чухал ач холбогдолтой” гэж хэлж байжээ.

Вашингтоны шийдвэрт нөлөөлсөн бас нэг хүчин зүйл нь Оросын арми Украины эсрэг Умард Солонгосоос авсан алсын тусгалын баллистик пуужин ашиглаж эхэлсэн явдал юм байна.

Хэрвээ Москва ийм зэвсэг ашиглаж эхэлбэл ижил хүчин чадалтай зэвсгийг Украинд илгээхээ Байдены засаг захиргаа өнгөрсөн онд Оросын талд анхааруулж байжээ.

Эх сурвалж: Associated Press