Дэлхийн 3,500 залуу удирдагч Улаанбаатарт чуулахаар иржээ
Ази-Номхон далайн орнуудын чуулга уулзалтыг Улаанбаатар хотод зохион байгуулах талаар Гадаад Харилцааны Яам болон Олон улсын JCI байгууллагаас хамтарсан мэдээлэл хийлээ.
Тус чуулганд оролцохоор дэлхийн 51 орны 3,500 манлайлагч, бизнес эрхлэгч залуус Монгол Улсад хүрэлцэн ирээд байгаа ажээ.
"Чуулганаар үндэсний үйлдвэрлэгчдийнхээ гадаад харилцааг өргөтгөх боломжтой"
Гадаад харилцааны дэд сайд Б.Батцэцэг “Зочдын ирэх угтах, визийн асуудал, зохион байгуулалтын асуудал зэрэг дипломат ёслолын үйл ажиллагааны чиглэлээр Гадаад Харилцааны Яамны зүгээс дэмжлэг үзүүлэн ажиллаж байна. Үндсэндээ хурлын бэлтгэл ажил хангагдсан гэж хэлж болно.
3,500 зочноор дамжуулан дэлхий дахинд Монгол Улсаа сурталчлах, Монгол Улсынхаа бизнес эрхлэгчдийн боломжийг нээх, үндэсний үйлдвэрлэгчдийнхээ гадаад харилцааг өргөтгөх, холбоо тогтоох, Монгол залууст дэлхийн томоохон байгууллагын төлөөлөгч залуустай хамтран ажиллах боломжийг олгож байгаагаараа ач холбогдолтой” хэмээв.
"120 улсын идэвхтэй залуусын сүлжээгээр Монгол Улсаа дэлхий дахинд сурталчилна"
JCI Монгол байгууллагын 2017 оны Үндэсний Ерөнхийлөгч П.Батхишиг “Бид JCI байгууллагын Ази-Номхон далайн орнуудын чуулга уулзалтыг зохион байгуулах нь манай улсад нэлээд олон ач холбогдолтой.
Манай Монгол Улсад 1992 онд салбар байгууллагыг бий болгосон. Чуулганы үеэр бид олон олон үндэсний байгууллагын улс орон, нийгэмдээ хийж бүтээсэн сайн сайн өөрчлөлтүүдийг хэлэлцэж, туршлага солилцоно.
120 улсын идэвхтэй залуусын сүлжээгээр бид Монгол Улсаа дэлхий дахинд сурталчилна. Сурталчилгааны тал дээр богино хугацаанд сайн үр дүн гарна гэж бодож байна” гэлээ.
"Бидний хамтын ажиллагаанд улс үндэстний хил хязгаар үгүй, бүгд нэгдэн ажилладаг"
JCI байгууллагын Ерөнхийлөгч Давн Хетзел “Манай байгууллага гишүүнчлэлийн хувьд ихэвчлэн 18-40 насны залуус байдаг.
Энэхүү чуулганы гол онцлог бол JCI байгууллагын дэлхийн өнцөг булан бүрээс залуус хуран цуглаж, өөрсдийн туршлага, мэдлэгийг солилцдог. Бидний хамтын ажиллагаанд улс үндэстний хил хязгаар үгүй, бүгд нэгдэн ажилладаг.
Ази-Номхон далай бүсийн чуулган боловч бусад бусад бүсээс ирж оролцогчдын тоо олон байгаа гэдгийг хэлмээр байна.
Тэгэхээр дэлхийн маш олон орноос залуу удирдагчид чуулж, бие биенийхээ хэл соёл, мэдлэг боловсролоос суралцах боломжийг олгож байгаа юм” хэмээн тайлбарлалаа.
“Жэй Си Ай 2017 АСПАК” чуулганы үеэр залууст өөрийгөө хөгжүүлэх, бизнес төлөвлөгөө хийх, хаана ямар бизнесийн боломж байна, мэдээлэл технологийн хувьд хэрхэн хамтран ажиллах зэрэг сэдвээр сургалт болж, сургалтад хамрагдсан залууст “JCI”-ийн сургалтын байгууллагаас сертификат олгох юм.
Үүнээс гадна бүс нутгийн хөгжлийн тулгамдсан есөн төрлийн асуудлаар форум, хэлэлцүүлэг хийнэ. Мөн Ерөнхий ассамблей болж, үүнд 1,800 гаруй төлөөлөгчид албан ёсоор оролцон “JCI’’-ийн 2022 он хүртэлх хийх ажлынхаа төлөвлөөг гаргах юм байна.
