Хятад улс Солонгосын хойгийн ойролцоо шинэ пуужин туршжээ

Солонгосын хойгт сөргөлдөөн нэмэгдэж, Хойд ба Өмнөд Солонгос, АНУ цэргийн сургуулилалт хийсний дараа Хятад улс мөн энэ бүс нутагт шинэ пуужин туршжээ.

Солонгосын хойгийн ойролцоо Бохайн тэнгисийн буланд хэдхэн хоногийн өмнө туршилт явагдсан тухай Хятадын батлан хамгаалах яамны мэдэгдэлд үндэслэн Синьхуа агентлаг өчигдөр мэдээлсэн байна. Мэдэгдэлд уг туршилтын зорилгыг үндэсний аюулгүй байдлыг хангахад зэвсэгт хүчний байлдах ур чадварыг сайжруулах гэжээ. Бас туршилт хүлээж байсан үр дүндээ хүрсэн гээд харин хэзээ зохион байгуулсан, ямар ангиллын пуужин туршсан зэрэг бусад мэдээллийг дэлгээгүй байна.

Өнгөрсөн сард Өмнөд Солонгосын нутагт THAAD пуужингаас хамгаалах системийг суурилуулсны дараа Бээжин өөрийн үндэсний аюулгүй байдлыг хангахын тулд байлдааны сургуулилалт, шинэ зэвсгийн туршилт явуулна гэдгээ зарласан юм.

Одоогоор Солонгосын хойг нь манай дэлхийн хамгийн их цэрэг, зэвсэг төвлөрсөн халуун цэгүүдийн нэг болоод байна. Өнгөрсөн сарын сүүлээр Өмнөд Солонгос, АНУ хамтарсан тэнгисийн цэргийн сургуулилалт явуулсан бол Пёньян хариуд нь мөн өргөн хэмжээний байлдааны буудлага бүхий сургуулилалт явуулсан юм.

Эх сурвалж: Russia Today