Монголын говийн элсэн шуурга Бээжинг нөмөрч, 50 гаруй нислэг саатжээ

Монгол улс болон Өвөр Монголоос үүсэлтэй элсэн шуурга өнөөдөр Бээжин хотыг нөмөрч, агаарын чанар, үзэгдэх орчин муудсан тул олон тооны нислэг саатаж, хүүхэд, хөгшдийг гэрээс гарахгүй байхыг анхааруулжээ.

Хятадын Үндэсний Цаг уурын Төвийн мэдээлснээр Лхагва гарагийн үдээс хойш эхэлсэн шуурга 1.63 сая хавтгай дөрвөлжин километр газар нутгийг хамраад байгаа гэнэ.

Өнөө өглөөний байдлаар Бээжингийн агаар дахь PM2.5 тоосонцор шоо метр тутамд 630 микрограм болж нэмэгдсэн байна. ДЭМБ (Дэлхийн Эрүүл Мэндийн Байгууллага) энэ төрлийн тоосонцрын хэвийн хэмжээг 10 микрограмаас хэтрэхгүй байх ёстой гэж үздэг юм. Үдээс хойш нь тус хотын агаарын чанарын индекс 905 болж, аюултай түвшинд хүрчээ.

Бээжингийн олон улсын нисэх буудлын мэдээлснээр 15 нислэг цуцлагдаж, 40 орчим нислэг түр хойшилсон байна. Элсэн шуургыг Баасан гараг хүртэл үргэлжилнэ гэж таамаглаж байгаа гэнэ.

Шуурганы эх сурвалжийг Өвөр Монголын баруун хэсэг, Монгол улсын өмнөд хэсэг гэж тооцоолж байгаагаа Бээжингийн Цаг Уурын албаны төлөөлөгч Гуо Жяньшин хэвлэлд ярьжээ.

Жил бүрийн хавар Монголын говиос гаралтай элсэн шуурга Хятадын хойд хэсгийг дайран өнгөрдөг юм.

Эх сурвалж: South China Morning Post