ШИЙДЛИЙН ЗАСГИЙН ГАЗАР ЮУ ХИЙВ

Дэлхийн 50 гаруй орны төрийн тэргүүн нэг дор цуглах АСЕМ-ийн дээд хэмжээний уулзалтын өмнө зочид буудлын салбарт 150 тэрбум төгрөгийн зээл олгохоор шийдвэрлэв.

Аялал жуулчлалыг дэмжихэд чухал нөлөөтэй дэлхийн зочид буудлын сүлжээний 4 буудал баригдаж байна

Импортыг орлож, экпортыг нэмэгдүүлэх үйлдвэрлэлд 300 тэрбум төгрөгийн зээл олгож байна

Хөрөнгө оруулалтын газраас зарим компаниудад хөрөнгө оруулалтын тогтворжуулалтын гэрчилгээ олгож эхэллээ. Шаардлага хангасан компаниудын Аж ахуйн нэгжийн орлогын албан татвар, Нэмэгдсэн өртгийн албан татвар, Ашигт малтмалын нөөц ашигласны төлбөр, гаалийн албан татварыг 5-24 жилийн хугацаанд хувь хэмжээг нь тогтвортой байлгана

Монгол банкнаас үнэ тогтворжуулах хөтөлбөрөөс олгосон зээлийн үлдэгдэл 535,4 тэрбум төгрөгийг Засгийн газар шилжүүлэн авч хууль тогтоомжид нийцүүлэн барагдуулж байна

Монголын Хөрөнгийн биржид 2015 он гарсаар 400-гаад тэрбум төгрөгийн үнэт цаасны арилжаа явагдлаа. Наймдугаар сарын 25-ны өдөр 8,7 тэрбумын үнэт цаас худалдагдсан нь Монголын Хөрөнгийн биржийн түүхэн дээд амжилт боллоо

Өдөрт 900, жилд 270.000 шоо метр бетон үйлдвэрлэх МАК компанийн бүрэн автомат хийт бетоны үйлдвэр ашиглалтад орлоо.

Жилд сая тн цемент үйлдвэрлэж дотоодын хэрэгцээний тал хувийг хангах “Монцемент” үйлдвэр ашиглалтад орлоо. Үйлдвэрийг “Чингис” бондын 45 сая ам.доллараар санхүүжүүлсэн юм.

Сүүлийн 30 гаруй жилд баригдаагүй том цахилгаан станц болох ДЦС-5 төслийн гэрээ байгуулагдлаа. 450 МВт цахилгаан, 587 МВт дулаан үйлдвэрлэх энэ станцыг барьж угсрахад 2700 гаруй хүн ажиллана.

Улаанбаатар хотын төв болон зүүн бүсийг дулаанаар хангах “Амгалан” дулааны станц ашиглалтад орлоо. Тус станц 348 МВт дулаан үйлдвэрлэж 20.000 айл өрх, 250 орон сууцны дулааны нөхцөлийг сайжруулж, шинээр 40,000 айл өрх, 500 орон сууцыг дулаанаар хангана.

IV цахилгаан станцын хүчин чадлыг 123 мегаваттаар нэмэгдүүллээ. Энэ нь 1983 оноос нийслэлийнхний 80 хувийг цахилгаан дулаанаар хангаж ирсэн уг станцад хийгдэж буй томоохон өргөтгөл юм..

-“Эрдэнэтийн дулааны цахилгаан станц”-ыг 35 МВт-аар өргөтгөх ажлыг эхлүүллээ. 55 сая ам.долларын өртөгтэй энэ төсөл хэрэгжсэнээр Эрдэнэт хот төдийгүй төвийн бүсийн эрчим хүчний системд эерэг нөлөө үзүүлнэ.

Төв аймгийн Баянжаргалан сумын нутагт баригдах Бөөрөлжүүтийн цахилгаан станцын бүтээн байгуулалт эхэллээ. 600 МВт-ын хүчин чадалтай энэхүү дулааны цахилгаан станц нь төв, зүүн, өмнөд бүсийн өсөн нэмэгдэж байгаа эрчим хүчний хэрэглээг хангана.

Эгийн голын усан цахилгаан станцыг БНХАУ-ын хөнгөлөлттэй зээлээр санхүүжүүлэн барина. 827 сая ам.долларын өртөгтэй энэ станц нь 315 МВт-ын хүчин чадалтай бөгөөд жилд дунджаар 606 сая КВт цахилгаан үйлдвэрлэж 5,7 тэрбум м.куб эзлэхүүнтэй цэвэр усны сан үүсгэнэ.

Оюутолгой төслийн далд уурхайн санхүүжилтийн төлөвлөгөө батлагдлаа. 2013 оны наймдугаар сараас зогсонги байдалд орсон Оюутолгойн далд уурхайн бүтээн байгуулалт үргэлжилснээр 6 тэрбум долларын хөрөнгө оруулалт хийгдэж, олон мянган иргэд ажилтай, орлоготой болно.

Тавантолгойн нүүрсний ордыг эдийн засгийн эргэлтэд оруулах хэлэлцээр үргэлжилж байна. Төсөл хэрэгжүүлэгч компанид “Эрдэнэс Монгол”, “Эрдэнэс Тавантолгой” компаниуд хувь эзэмших, төмөр замын суурь бүтцийн 51 хувийг “Монголын төмөр зам” компани эзэмших зэрэг асуудлаар Засгийн газар хөрөнгө оруулагчидтай тохиролцоод байна.

Гацууртын алтны ордыг эзэмших асуудлыг хуулийн хүрээнд, хугацаа алдалгүй шийдвэрлэнэ. 50 гаруй тоннын баталгаат нөөцтэй уг ордыг хуулийн хүрээнд ашиглахгүй бол эдийн засагт төдийгүй байгаль орчинд нөхөж баршгүй гарз хохирол учрах магадлалтай.

106 тусгай зөвшөөрөл олгох ажил үргэлжилж байна. Хөрөнгө оруулалт, ажлын байр, татвар, валютын нөөцийг нэмж эдийн засгийг эрчимжүүлэхэд түлхэц болох, өмнө нь шүүхийн шийдвэрээр хүчингүй болсон ашигт малтмалын хайгуулын болон ашиглалтын 106 талбайд зөвшөөрөл олгох ажил 60 гаруй хувьтай явж байна.

Алт олборлолт нэмэгдэж байна. Валютын нөөцийг зузаалж, монгол төгрөгт баталгаа болох энэ онд олборлосон алтны хэмжээ эхний хагас жилийн байдлаар 4 тонн болсон нь ноднингийн мөн үеийнхээс 1,5 тонноор илүү байна.

Уурхай байсан газарт усан цахилгаан станц баригдана. Бороогийн алтны уурхайг нөхөн сэргээхэд үүссэн усны хуримтлалд түшиглэн бага оврын усан цахилгаан станц барих ажлыг судлан шийдвэрлэнэ. Энэ нь уул уурхайн нөхөн сэргээлтийн шинэлэг загвар болох юм.

Хайгуулын лицензийг 460 компанид олголоо. Манай орны газар нутгийн 19,9 хувьд ашигт малтмалын хайгуул хийх боломжтой. 2015 онд хайгуулын зөвшөөрөл хүссэн 460 гаруй компанид зөвшөөрөл олгоод байна.

Яам, агентлаг, төрийн өмчит байгууллагуудын хот доторхи хэрэгцээнд том оврын автомашин хэрэглэхийг зогсоож, 100 км-т 16 литрээс ихгүй шатахуун зарцуулдаг автомашин ашиглах шийдвэр гаргав.

Шилэн дансны хууль амжилттай хэрэгжиж байна. Бүх шатны төсвийн 5000 эрх захирагч, төрийн болон орон нутгийн өмчийн оролцоотой компани, улсын үйлдвэр зэрэг 360 гаруй байгууллага санхүүгийн гүйлгээгээ олон нийтэд ил тод, цаг тухайд нь мэдээлж байх үүргээ биелүүлж байна.

Засгийн газрын 15 яам, 26 агентлаг, ЗГХЭГ-ын орон тоог 15 хувиар бууруулах шийдвэр гаргалаа.

Төрийн өмчийн төлөөлөгч буюу төлөөлөн удирдах зөвлөлд төрийн захиргааны албан хаагчийг цаашид томилохгүй. Ингэснээр яам, агентлагийн төлөөлөл нь бодлого боловсруулагч хууль тогтоомж, салбарын зохицуулалтыг хэрэгжүүлэгчийн хувьд төрийн өмчийн компани, аж ахуйн нэгжид давуу эрх олгох явдал үгүй болно..

2015-2016 онд хувьчлах, өөрчлөн байгуулах төрийн өмчит болон төрийн өмчийн оролцоотой байгууллагуудын жагсаалтыг баталлаа.

Төрийн байгууллагын хяналт шалгалтын талаар иргэд, аж ахуйн нэгжүүд нээлттэй мэдээлэл авах, хянаж шалгадаг байгууллагууд нь мэдээллээ ил тод байрлуулах нөхцөлийг бүрдүүлсэн www.shilenhyanalt.gov.mn цахим хуудсыг ажиллуулж эхэллээ.

Засгийн газраас улс орны нийгэм, эдийн засгийн хүрээнд нэн шаардлагатай 62 хуулийн төслийг боловсруулан УИХ-д өргөн мэдүүлснээс 28 нь батлагдаж, 34 нь хэлэлцүүлгийн шатанд байна.

Монгол Улсын 3 сая дахь иргэн Хатанболдын Монголжин 2015 оны нэгдүгээр сарын 24-нд Өмнөговь аймагт мэндэлсэн. Гурван сая дахь иргэн болон түүний үе чацуутнуудыг алдаршуулах ажлыг орон даяар зохион байгууллаа.

Эмнэлгийн зориулалтаар анх баригдсан Төрийн тусгай албан хаагчдын эмнэлгийн барилгыг зориулалтаар нь ашиглаж Улсын нэгдүгээр төв эмнэлгийнхний санаачилсан “Нэг эмнэлэг хоёр жигүүр" төслийг дэмжиж, хэрэгжүүлэх замаар тус барилгыг тус эмнэлгийн менежментийн багт өгөхөөр боллоо.

Тус барилгыг буцааж эмнэлэг болгоход хагас жилийн хугацаа, 20 гаруй тэрбум төгрөг шаардлагатай. Гэхдээ улсын төсвөөс нэг ч төгрөг гаргахгүйгээр менежментийн баг энэ ажлыг хариуцан зохион байгуулна.

Төрийн 20 гаруй үйлчилгээг 24 цагийн турш хүргэдэг 108 ТҮЦ машин улсын хэмжээнд ажиллаж байна. Mөн www.ezasag.mn ажиллуулж эхэлснээр иргэд гар утас, зөөврийн компьютерээс төрийн 25 үйлчилгээг авах боломжтой болов. Энэ 10 дугаар сараас төрийн 167 төрлийн үйлчилгээг ТҮЦ машин, төрийн үйлчилгээний цахим системээр иргэдэд хүргэнэ.

Төрөөс иргэддээ үзүүлдэг 160 гаруй үйлчилгээг нэг цонхонд төвлөрүүлэн, 24 цагийн турш үйлчилдэг нэгдсэн төвийг байгуулах ажлыг эхлүүлээд байна. Дараагийн шатанд захын дүүргүүдэд салбарыг нь байгуулах боломжтой.

Элэгний С вирустэй 128 мянга гаруй иргэддээ зориулж эмчилгээний 98-99 хувийн үр дүнтэй АНУ-ын ХАРВОНИ эмийг нийлүүлнэ. АНУ-д курс эмчилгээний үнэ нь 94 мянган ам.доллар байгаа энэ эмийг нэн хөнгөлөлттэй нөхцөлөөр буюу 1200 ам.доллараар оруулж ирэх юм.

-“Бага сургууль, цэцэрлэгийн цогцолбор төсөл”-өөр Улаанбаатарт 72 бага сургууль-цэцэрлэгийн цогцолбор босно. Мөн 4 дунд сургууль, 3 цэцэрлэгийн хуучин барилгыг буулгаж, шинийг барина.

Эмнэлгийн зориулалтаар анх баригдсан төрийн тусгай албан хаагчдын эмнэлгийн барилгад Улсын I төв эмнэлгийн менежментийн баг ажиллаж “Нэг эмнэлэг, хоёр жигүүр” төсөл хэрэгжинэ.

Эмнэлэг барихад 50 сая ам.доллар зарцуулах шийдвэр гаргалаа. Төв эмнэлэг, хорт хавдрын эмчилгээ, сум, аймаг, дүүргийн оношилгоо эмчилгээнд зарцуулах хөрөнгийг БНХАУ-аас 2015 онд Монгол Улсад олгосон буцалтгүй тусламжаас санхүүжүүлэх юм.

Эдийн засаг хүндрэлтэй байгаа ч халамжийн болон асаргааны тэтгэмжийг 10 хувиар нэмэгдүүллээ. Ингэснээр бүрэн тэтгэврийн доод хэмжээг 230 мянган төгрөг, хувь тэнцүүлсэн тэтгэврийн доод хэмжээг 195 мянган төгрөгөөр тогтоосон байна.

Ноолуур боловсруулах үйлдвэрүүдэд 100 тэрбум төгрөгийн эргэлтийн хөрөнгийн зээл олгосон нь экспортыг нэмэгдүүлэх төдийгүй үйлдвэрлэгчид, малчдыг дэмжсэн бодлого юм.

Эдийн засгийн түншлэлийн тухай Монгол Улс, Япон улсын хоорондын хэлэлцээр байгуулагдлаа. 120 гаруй сая хүн амтай Японы зах зээлд Монголын бараа бүтээгдэхүүн нэн тааламжтай нөхцөлөөр гарах нь манай экспортын бүтээгдэхүүнийг ойрын жилүүдэд огцом нэмэгдүүлэх боломж олгох юм.

АНУ-ын Мянганы сорилтын сангаас Монгол Улсад дахин төсөл хэрэгжүүлэхээр болоо. МСС-аас өмнө нь манай улсад 285 сая ам.долларын төсөл амжилттай хэрэгжүүлсэн юм.

АНУ-ын JPMorgan компани манай Хөгжлийн банктай хамтран 400 сая долларын дүрмийн сантай хөрөнгө оруулалтын сан байгуулна. Мөн Дэлхийн банкнаас манай төсвийн алдагдлыг нөхөхөд 100 сая долларын дэмжлэг үзүүлэхээр болсон. Эдгээр шийдвэрүүдийг Ерөнхий сайд Ч.Сайханбилэгийн АНУ-д хийсэн ажлын айлчлалын үеэр гаргасан юм.

Ерөнхий сайд Ч.Сайханбилэг Арабын нэгдсэн Эмират улсад айлчлах үеэрээ бүтээн байгуулалтын томоохон төслүүдийг санхүүжүүлэх нэг тэрбум долларын хөрөнгө оруулалтын санг Монголд байгуулах тухай CIB санхүүгийн групптэй хамтран ажиллах санамж бичигт гарын үсэг зурлаа.

Ерөнхий сайд Ч.Сайханбилэг ОХУ-д айлчилж, хос төмөр замыг цахилгаанжуулах, Монголын нутгаар байгалийн хийн хоолойг дайруулах асуудлаар Ерөнхийлөгч В.В.Путинтэй санал солилцлоо. Монголоос мах экспортлох, ОХУ-ын хил гаалийн хүнд суртлыг багасгах чиглэлээр үүрэг даалгавар өгч ажиллана гэдгээ Ерөнхийлөгч В.В.Путин мэдэгдлээ.

АНУ-ын JPMorgan компани манай Хөгжлийн банктай хамтран 400 сая долларын дүрмийн сантай хөрөнгө оруулалтын сан байгуулна. Мөн Дэлхийн банкнаас манай төсвийн алдагдлыг нөхөхөд 100 сая долларын дэмжлэг үзүүлэхээр болсон. Эдгээр шийдвэрүүдийг Ерөнхий сайд Ч.Сайханбилэгийн АНУ-д хийсэн ажлын айлчлалын үеэр гаргасан юм.

Монголын Хөрөнгийн биржийг Лондонгийн Хөрөнгийн биржтэй хамтран ажиллах гэрээг 2017 он хүртэл сунгаж, манай биржийг дэлхийн санхүүгийн том төв рүү гаргахад Их Британийн Засгийн газраас дэмжлэг үзүүлэх асуудлыг Ерөнхий сайд Ч.Сайханбилэг Их Британи Умард Ирландын Нэгдсэн Вант улсад хийсэн айлчлалын үеэрээ шийдвэрлэлээ.

Ерөнхий сайд Ч.Сайханбилэгийн урилгаар Бүгд Найрамдах Энэтхэг улсын Ерөнхий сайд Нарендра Моди Монгол Улсад айлчлах үеэрээ хоёр орны иж бүрэн түншлэлийн харилцааны түвшинг дээшлүүлэн стратегийн түншлэлд дэвшүүлэхээр тохиролцлоо. Мөн айлчлалын үеэр манай улсын дэд бүтцийн салбарыг хөгжүүлэхэд Энэтхэг улс нэг тэрбум хүртлэх ам.долларын шугам нээхээр боллоо.

Өмнө нь 1764 айлын орон сууц бүхий “Буянт-Ухаа I” хорооллыг барьсан Үндэсний бүтээн байгуулалтын корпораци 6500 айлын орон сууц, 4 цэцэрлэг, 2 сургууль, автомашины долоон давхар гарааж бүхий “Буянт-Ухаа II” хорооллын үндсэн бүтцийг бариад дуусч байна. Тус хороолол нь харьцангуй үнэ хямд, иж бүрэн төлөвлөгдсөн, үндэсний компаниуд бүтээж байгаагаараа онцлог юм.

Эхний шатанд 368 мянган ам.метр талбай бүхий 3955 айлын орон сууц, мэргэжлийн сургалт үйлдвэрлэлийн төв, сургууль, цэцэрлэгийн хамт баригдана.

Шалгуур нөхцөлөө хангасан иргэд орон сууцны зээлийн урьдчилгаанд зөвхөн 10 хувийг нь төлж, үлдсэн 20 хувьд нь Хөгжлийн банк баталгаа гаргах асуудал шийдвэрлэгдэх шатандаа байна. Мөн зээлийн хугацаа 20 жил байсныг 30 хүртэл жил болгож өөрчлөх юм.

Орон сууц худалдан авах боломжгүй иргэдийг орон сууцжуулах “Түрээсийн орон сууц” хөтөлбөр батлагдлаа. Нийслэлд 16000, аймгийн төвүүдэд 4000 айлын түрээсийн орон сууц баригдана.

Завхан, Говь-Алтай, Увс, Ховд, Баян-Өлгий аймгийг нийслэл хоттой хатуу хучилттай авто замаар холбох ажил концессийн барих-шилжүүлэх нөхцөлөөр амжилттай хэрэгжиж байна.

Хөшигийн хөндийн нисэх буудлын эхний ээлж 2016 оны дундуур ашиглалтад ороход нисэх буудлыг нийслэлтэй холбох өндөр хурдны авто замыг зэрэг ашиглалтад оруулна. Шинэ авто замыг БНХАУ-ын зээлийн хөрөнгөөр санхүүжүүлэх бөгөөд тусгаарлах зурвастай, зургаан эгнээтэй, нэгдүгээр зэрэглэлийн зам байх юм.

Өндөрхаан-Чойбалсан чиглэлийн 143 км зам энэ онд ашиглалтад орсноор баруун 5 аймгаас бусад аймгийн төвүүд нийслэл хоттой хатуу хучилттай авто замаар холбогдож дуусах юм.

“Богдхан” төмөр зам, “Улаанбаатар” холимог тээврийн ложистик төв байгуулна. Нийслэл хот дундуур гардаг төмөр замыг Богд уулын өврөөр тойруулан олон улсын шинэ нисэх буудлын орчмоор дайруулан тавих төсөл хэрэгжинэ. Ингэснээр Хөшигийн хөндийн орчимд авто зам, төмөр зам, агаарын тээврийн ложистик төв бий болно.

Хөвсгөл аймгийн Галт сумын Идэрийн голын хөвдөг гүүр, Сэлэнгийн Түнхэл тосгон дахь гүүрийн барилгын ажлууд эхэлнэ.

Хөшигийн хөндийн олон улсын нисэх буудлын санхүүжилтийг УИХ-д өргөн мэдүүлж, соёрхон батлууллаа. Нисэх буудлын бүтээн байгуулалт 60 хувьтай үргэлжилж байна.

Иргэний нисэхийн ерөнхий газрын агаарын навигац болон агаарын хөлгийн, нисэх буудлын үйлчилгээ, аж ахуйн үйл ажиллагааг эрхлэн хэрэгжүүлэх “Иргэний нисэхийн үндэсний корпораци” төрийн өмчит аж ахуйн тооцоот үйлдвэрийн газрыг байгууллаа.

Иргэний нисэхийн салбар олон улсын жишгээр 30 км тутамд навигацийн нислэг хийх шийдвэр гаргаснаар Монгол Улсын агаарын агаарын замд нисч буй агаарын хөлгийн хоорондын зай 90 км байсныг 30 км болгож багасгалаа.

Ерөнхий сайд Ч.Сайханбилэг тус буудалд ажиллах үеэрээ гаднын улс орнуудын нисэх буудалд шалгагдаад онгоцонд суусан зорчигчдыг буугаад ирэхэд нь дахин шалгаж, саатуулалгүй нэвтрүүлэх үүргийг өгснөөр “Чингис хаан” нисэх буудал ногоон гарцтай боллоо.

МИАТ-ийн алдагдлыг бууруулахын тулд ганц эх үүсвэрээс түлш шатахуун нийлүүлдэг хараат байдлаас ангижруулж, түлшний хоёр дахь эх үүсвэртэй болгох ажлыг эхлүүллээ.