Уншиж байна ...
Зураг
Зураг
ХУУЧИРСАН МЭДЭЭ: 2015/01/28-НД НИЙТЛЭГДСЭН

Монгол Улсын бахархал ГУРВАН САЯ дахь иргэн МЭНДЭЛЛЭЭ

З.Санжаа, iKon.mn
2015 оны 1 сарын 28
iKon.MN

Монгол Улсын ГУРВАН сая дахь иргэнээр Өмнөговь аймгийн Даланзадгад сумын Нэгдсэн эмнэлэгт нэгдүгээр сарын 24-ний өглөө эцэг Энхтүвшингийн Хатанболд, эх Ганбатын Аззаяа нарын гэр бүлд мэндэлсэн охин тодорсон байна.

Үндэсний статистикийн хорооны дарга С.Мэндсайханы танилцуулснаар Монгол Улсын ГУРВАН сая дахь иргэн энэ сарын 24-ний өдрийн 08.27 цагт мэндэлсэн байна. 

 ГУРВАН сая дахь иргэнээр охин хүүхэд тодорч, араас нь тун ойрхон ихэр хөвгүүд мэндэлсэн нь Монгол Улсын хүн ам өсөн дэлгэрч, улам олуулаа болохыг бэлгэдлээ.

Эрүүл мэнд, Спортын сайд Г.Шийлэгдамба: "ГУРВАН сая дахь иргэн болон эхийн биеийн байдал сайн байгаа. Төрөлт хэвийн явагдсан, хүүхэд 3500 гр жинтэй 50 см өндөр" гэлээ.

Улсын бахархалт иргэнийг 70 сая төгрөгөөр урамшуулах аж. 

ХХ зуунаас хойш манай улсын хүн ам хэрхэн өссөнтэй танилцана уу.

 
Богд Хаант Монгол Улсын үед
 

Богд Хаант Монгол Улс 1918 онд хүн амаа тоолсон нь ХХ зууны анхны тооллого юм. 

1918 онд 647'500 хүн тоологдсоноос 542.5 мянган Монгол Улсын иргэн, 100 мянга орчим Хятад иргэн, 5 мянга орчим Орос иргэн байжээ. Ө.х: Энэ үед 6 хүн тутмын нэг нь хятад байж.

1918 он
Ардын хувьсгалын дараах анхны тооллого
 

1935 оны тооллогоор манай улсын хүн ам ~738'200 тоологджээ. 

1918 оны тооллогоос хойш 17 жилийн хугацаанд хүн амын тоо 90 мянга орчмоор нэмэгдсэн ба энэ хугацаанд жилд дунджаар 5.3 мянга орчмоор нэмэгджээ.

1935 он
Дайны жилүүдэд хийсэн тооллого
Улаанбаатар хотын 1-р цэцэрлэгийн хүүхдүүд 1943 он /Богд хааны зуны ордны музей/

1944 онд 759.1 мянган хүн тоологдсон нь ХХ зуунаас хойш манай улсын хүн амын хамгийн бага өсөлт байв.

Хэлмэгдүүлэлтийн хар сүүдэрт манай улс ~30 гаруй мянган хүнээ үгүй хийсэн нь гол шалтгаан юм.

1935-1944 оны хооронд 10 жилийн хугацаанд хүн ам ердөө 20.8 мянгаар өссөн байна.

1944
Олон улсын аргачлалыг ашиглан явуулсан тооллого
 

1956 оны тооллогоор хүн амын тоо 845.5 мянга болжээ.

Архангай аймаг хамгийн олон ~60.4 мянга, Өмнөговь аймаг хамгийн бага ~20.2 мянган хүнтэй байжээ.

1956 он
НЭГ САЯ дахь иргэн төрөв
 

Улсын нэг сая дахь иргэн 1962 оны 2 сард төрсөн байна.

Энэ үед манай улс НҮБ-ийн гишүүнээр (1961) элсээд удаагүй байлаа. 

1962 он
Цахим тооцоолуур машиныг анх удаа ашигласан тооллого
 

1963 оны тооллогоор 1'017'100 хүн тоологдсон нь хамгийн хурдтай өссөн үе байв.

Улс орон тайван цагтай золгосон эл үед бүтээн байгуулалтын ажил ид өрнөж, хүн амыг эрүүлжүүлэх нэгдсэн бодлого хэрэгжүүлж байжээ.

1963 он
Хүн амаа тоолохоос гадна орон сууцны фондыг анх удаа тоолсон
 

1960-аад онд манай улс эрүүлийг хамгаалах салбараа эрчимтэй хөгжүүлсэн ба 1969 оны тооллогоор 1'197.6 мянган хүн тоологдож, өсөлт 2.8%-тай байв. 

1969 он
Хүн амаа 10 жилийн давтамжтай тоолдог болов
 

НҮБ-д нэгдэн орсны дараа НҮБ-с манай улсад хүн амаа 10 жил тутамд тоолдог байх зөвлөмж ирүүлснээр энэ үеэс эхлэн 10 жилийн давтамжтай хүн амаа тоолдог болов.

1979 оны тооллогоор 1'595 мянган хүн тоологдож өсөлт 2.9%-тай байв.

1979 он
Монгол Улсын 2 САЯ дахь иргэн төрөв
Гэрэл зургийг uvsnaranbulag.mn сайтаас ашиглав

Хоёр сая дахь иргэн 1988.07.10-нд төрсөн ба түүний чацуутнаар орон даяар 25 хүүхдийг тодруулсан байдаг.

1988.07.10
Хүн ам 1979 оноос хойш жилд дунджаар 45 мянгаар өссөн
 

1989 оны тооллогоор 2'044 мянган хүн тоологдож өсөлт 2.5%-тай буюу 1979 оноос хойш жилд дунджаар 45 мянгаар өссөн.

Энэ үед төвлөрсөн төлөвлөгөөт эдийн засгийн тогтолцоог халах ардчилсан хувьсгалын шуурга ид өрнөж байв.

1989 он
Шилжилтийн үеийн дараах анхны тооллого
 

Нийгмийн тогтолцоо өөрчлөгдсөний дараах тооллогоор хүн ам 2'373.5 мянгад хүрч өсөв.  

2000 оны тооллого нь НҮБ-ын удирдамж, зөвлөмжүүдийг голчлон удирдлага болгосон тул олон улсын стандартад нийцсэн, Монгол улсад явагдсан анхны орчин үеийн тооллого болсон. 

2000 оны 1-р сарын 5-ны байдлаар 2'373'493 хүн Монгол Улсын байнгын оршин суугчаар тоологдсоны дотор 1'177'981 нь эрэгтэйчүүд, 1'195'512 нь эмэгтэйчүүд байв.

2000 он
Гадаад улсад байгаа иргэдээ анх удаа тоолов
 

2010 онд 2'754'685 хүн тоологдсоноос суурин хүн 2'647'545, гадаадад 6 сараас дээш суугаа 107'140 хүн тоологдсон.

2010 он
Улсын бахархал, 3 сая дахь иргэн төрөв
 

Монгол Улсын 3 сая дахь иргэнээр Өмнөговь аймгийн Даланзадгад сумын Нэгдсэн эмнэлэгт  1 дүгээр сарын 24-ний өглөө эцэг Энхтүвшингийн Хатанболд, эх Ганбатын Аззаяа нарын гэр бүлд мэндэлсэн охин тодорсон байна.

3 сая дахь иргэнийг 70 сая төгрөг эсвэл үүнтэй дүйцэхүйц байраар урамшуулах ажээ.

2015.01.24