ВИДЕО: “Гоцлол болон цөөхүүл” хөгжмийн тоглолт сэтгэлийн учгийг хөндөнө
1957 оны зургадугаар сарын 12-ны өдөр нэгэнтээ зуны сар гарсан тул бороотой, нартай, салхитай алинд ч цаг агаар сайхан мэт санагддаг цаг. Тал талаас цугласан хөгжимчид Б.Элдэв-Очирын нэрэмжит кино театрт цуглажээ.
Ийнхүү анх байгуулагдах эх сууриа тавьж байсан Монгол Улсын Филармони нь одоо үндэсний, монгол хүний түүх, ахуй амьдрал, соёл, сэтгэлгээний эгшгэн илэрхийлэл болсон морин хуураа өвлөн уламжлах, дээдлэн хөгжүүлэх, дэлгэрүүлэн түгээх эрхэм зорилгыг өвөрлөн өдгөө 25 жилийн нүүрийг үзэж буй Морин хуурын чуулга, жазз хөгжмийн хэмнэл, аязаар үзэгчдийг татдаг Баянмонгол жазз найрал хөгжмийн 49 жилийн ой, сонгодог урлагаар соён гэгээрүүлэгч Симфони найрал хөгжмийн 60 жилийн ойн баярууд болох билээ.
Энэхүү тоглолтонд Монголчууддаа дэлхийн урлагтай хөл нийлүүлэн алхахыг урьтал болгож Симфони найрал хөгжим нь дэлхийн сонгодог бүтээлүүдийг сорчлон хүргэхээс гадна, үндэсний уламжлалт, сонгодог ая, аялгуу, дуунуудыг түгээн дэлгэрүүлэх үйлстэй юм.
Тэгвэл тус байгууллага ээлжит бэлгээ задалж, дэлхийн нэрт хөгжмийн зохиолчдын бүтээлүүдээр элэг нэгтнүүдийнхээ сонорыг мялаахад бэлэн болжээ.
Бичлэг: Тоглолт энэ сарын 30-нд 19:00 цагаас ганцхан удаа болно
Тодруулбал, Улсын Филармонийн Симфони найрал хөгжим, удирдаач соёлын тэргүүний ажилтан Д.Нямдаш, удирдаач Б.Батбаатар нар дэлхийн нэрт хөгжмийн зохиолчдын уран бүтээлийн сангаас толилуулах юм байна.
Тоглолт энэ сарын 30-нд “Улсын Филармонийн” концертын танхимд 19:00 цагаас ганцхан удаа болох аж.
“Гоцлол болон цөөхүүл” хэмээх нэртэй уг хөгжмийн тоглолтод нийт 80 гаруй уран бүтээлч хамрагдаж, таван хөгжимчид гоцлон, хийлийн чуулга болон холимог үлээвэр найрал хөгжимчид, утсан квинтет уянгалуулна.
Хүн бүрийн сэтгэлийн нандин учигийг хөндөх, шинэлэг өнгө аястай "Гоцлол болон цөөхүүл" хөгжмийн тоглолтыг таалан соёрхохыг уриалъя. Хөдөлмөрч, авъяаслаг хамт олны шилдэг тоглолтууд үргэлжилсээр байх болно.
