ГХЯ: ОХУ-д суугаа Монголын Элчин сайдын яам казино ажиллуулж байгаагүй
ОХУ-ын хэвлэл мэдээллийн хэрэгслүүдээр тус улсад суугаа Монгол Улсын Элчин сайдын яаманд казино ажиллаж байсан талаар мэдээлэл гарсантай холбогдуулан Гадаад Харилцааны Яамнаас өнөөдөр мэдээлэл хийж, уг мэдээлэл үндэслэлгүй гэж мэдэгдлээ.
“ОХУ-ын хэвлэл мэдээллийн хэрэгслүүдээр гарч байгаа шиг зүйл байхгүй гэдгийг тус улсын цагдаагийн газар нотолсон. Удахгүй ОХУ албан ёсны мэдэгдэл гаргах байх. Гадаад Харилцааны Яамны зүгээс энэ хэрэг дээр онцгойлон ажиллаж байгаа. Удахгүй бид уг ташаа мэдээллийг залруулах үүднээс мэдэгдэл гаргах болно” гэж Гадаад Харилцааны Яамны Төрийн Нарийн Бичгийн дарга Д.Даваасүрэн мэдээллээ.
ОХУ болон Монгол Улсын холбогдох байгууллагууд харилцан тохиролцож, 1997 онд Монгол Улсын Элчин сайдын яамыг Монгол Улс түрээслэх эрхийг ОХУ гаргаснаар уг барилгыг түрээсэлдэг болжээ. Орон сууцны зориулалттай тус барилга нь хуучны барилга бөгөөд нийтдээ 1,300 м.кв талбай эзэлдэг юм байна.
