Олон улсын эх хэлний өдөр өнөөдөр тохиойж байна. Энэхүү өдрийн хүрээнд Монгол Улсын Ерөнхийлөгчийн Тамгын газрын дарга асан П.Цагааны санаачилж, эмхлэн хэвлүүлсэн “Дархад дууны цоморлог” номын нээлт Монгол Улсын Их Сургуульд боллоо.
П.Цагаан “Нутгийн иргэдтэй уулзаж, ярилцаж явахдаа тэр хүмүүс өвөг дээдсийн маань 700-800 жилийн соёлын өв, хэл яриа, аялгууг өдий хүртэл хадгалан тээж явааг хараад бахархаж явлаа.
Тэр дундаа Дархад зон олны урлаг соёл, дуу хуурын гайхамшгийг мэдэрч, бүр олон хүнд сонсгож, мэдрүүлэх юмсан гэсэн чин хүсэл төрсөн.
Тиймээс Бямбын Ринчин гуай “Амьд соёлын 700 жилийн түүх” гэж тодорхойлсон Дархад зоны дууг эмхэтгэн хэвлүүлье гэдэг санаа төрсөн юм.
Сүүлийн жилүүдэд Монголчууд гадны улсын “савангийн дуурь”-т хэт шимтэж, тэр хэрээр тухайн улсын соёл эрчимтэй нэвтэрч байна. Нөгөө талдаа уламжлалт соёлын өвийг тээгчдийн тоо цөөрсөөр байна.
Монгол Улс бусад улсаас ондооших, омогших тэр мөн чанар гээгдэж, соёлын дархлаа суларч байгаа нь харамсалтай.
Хүн төрөлхтөн одоогоор 60,00 орчим хэлээр ярьж байгаагийн тал нь ойрын хугацаанд устаж үгүй болохоор байна гэсэн ЮНЕСКО-гийн судалгаа бий. Бид үүнийг анхаарахгүй өнгөрч болохгүй ээ. Монгол Монголоороо үлдэх боломж бол эх хэл, соёл юм” гэлээ.
“Дархад дууны цоморлог”-т өмнөх хэвлэгдсэн ном болон судалгааны ангийн тайланд орсон дуунуудыг харьцуулж, 525 дууг хувилбарын хамт (нийт 825) багтаажээ.
Гэрэл зургийг mpa.mn