Цагдаагийн Ерөнхий Газраас Архи, согтууруулах ундаа худалдан борлуулахыг түр хориглосон тогтоолын дагуу өнөөдөр мэдээлэл хийлээ.
Нийслэлийн Иргэдийн Төлөөлөгчдийн Хурлын Тэргүүлэгчдийн баталсан “Хүнсний аюулгүй байдлыг хангах зарим арга хэмжээ”-ний тухай тогтоолоор нийслэлийн нутаг дэвсгэрт архи, согтууруулах ундаа худалдах, түүгээр үйлчлэхийг түр хугацаанд хориглоод байгаа билээ.
ЦЕГ-ын Урьдчилан сэргийлэх, олон нийттэй харилцах хэлтсийн ахлах мэргэжилтэн Б.Гүнчин-Иш “Нэгдүгээр сарын 17-ны 18:00 цагаас 20-ны өдрийг дуустал нийслэл хотын хэмжээнд архи, согтууруулах ундаа худалдаалах, түүгээр үйлчлэх үйл ажиллагааг зогсоосон.
Цагдаагийн байгууллагаас дээрх тогтоолыг хэрэгжүүлэх чиглэлээр хяналт шалгалтын ажлыг зохион байгуулсан байгаа. Өнгөрсөн хоногт гар дээрээс зөвшөөрөлгүйгээр архи согтууруулах ундаа худалдаалах гурван зөрчил бүртгэгдсэн.
Цагдаагийн байгууллага эдгээр зөрчлийг илрүүлэн архи, согтууруулах ундааны зүйлсийг хураан авч, мэргэжлийн байгууллагын шинжилгээнд хамруулан шалгаж байна.
Иргэдэд анхааруулж хэлэхэд хууль бус үйл ажиллагааг өөхшүүлж, зөвшөөрөлгүй, шинжилгээнд хамрагдаагүй архи согтууруулах ундааг авахгүй байх, мөн ийм хууль бус үйл ажиллагааг цагдаагийн байгууллагад нэн яаралтай мэдэгдэж, хамтран ажиллахыг уриалж байна” гэв.
2017 оны нэгдүгээр сарын 17-ны өдөр,
Дүүргүүд дэх цагдаагийн хэлтсүүдийн алба хаагчид мэргэжлийн хяналтын улсын байцаагч нартай хамтран хариуцсан дүүргийн нутаг дэвсгэрт архи, согтууруулах төрлийн зүйл худалдан борлуулдаг, түүгээр үйлчилдэг 4,346 аж ахуйн нэгж, 710 иргэнийг шалгаж, 175 аж ахуйн нэгжийн үйлажиллагааг нь зогсоож, 3,949 аж ахуйн нэгжид албан мэдэгдэл өгч, 1,393 шил архи, 3,945 шил шар айргийг битүүмжилж, 33 шил архи, 40 шил шар айраг, 1 шил дарсийг хураан авч, тусгай зөвшөөрөлгүй таван аж ахуйн нэгжийн үйл ажиллагаа зогсоож, гар дээрээс согтуурах ундаа худалдан борлуулж байсан нэг иргэн, нэг аж ахуйн нэгж, бусад хоёр зөрчлийг илрүүлэн, материалжуулан шалгаж байна.