Амьсгалын замын цочмог халдварт, томуу, томуу төст өвчин ихэсч дүүргүүдийн нэгдсэн эмнэлэг дэх хүүхдийн тасгууд 5-60 хувь хүртэл хэтэрсэн ачаалалтай байгаа.
Үүнтэй холбогдуулан Нийслэлийн Эрүүл мэндийн газраас ямар арга хэмжээ авч ажиллаж байгааг НЭМГ-ын Эмнэлгийн тусламжийн хэлтсийн дарга М.Мөнхдэлгэрээс тодрууллаа.
- Эмнэлгүүдийн ачаалал хэтэрч хүлээлгийн танхим, хонгилд хүртэл ор тавьж хүүхэд хүлээн авсан байдалтай байгаа. Эмнэлгийн орны тоог нэмэгдүүлэх чиглэлээр ямар арга хэмжээ авч байгаа вэ?
- Жил бүрийн арваннэгдүгээр сараас хавар дөрөвдүгээр сар хүртэл амьсгалын замын өвчлөл, томуу томуу төст өвчний дэгдэлт нэмэгддэг учраас ес, аравдугаар сараас эхлээд л уг өвчнөөс урьдчилан сэргиийлэх тэмцэх ажлыг эрчимжүүлдэг.
Энэ жилийн хувьд томуу, томуу төст өвчин нэлээд хүндрэл өгч, хатгаа багтраа болох шинж тэмдгүүд илэрч байгаа учраас эмнэлэгт хэвтүүлэн эмчлэх зайлшгүй шаардлагатай байна. Ялангуяа 0-11 насны хүүхдүүдийг гэрээр нь эмчлэх боломжгүй учраас ачаалал ихсээд байгаа.
Хамгийн их ачаалалтай байгаа СХД-ийн нэгдсэн эмнэлэгийн амбулаторийн нэг хэсгийг хүүхдийн тасаг болгон 45 ор тавьж, хонгилд байсан хүүхдүүдээ тасаг руу шилжүүлээд байна.
Багануур, Багахангайгаас бусад бүх дүүрэг ачаалал ихтэй. Хүчин чадлаасаа давсан тооны хүүхэд хүлээн авч эмчилгээ хийж байна.
График: Дүүргийн нэгдсэн эмнэлгүүдийн хүүхдийн орны тоо болон одоо хэвтэн эмчлүүлж буй хүүхдийн тоо
- Ачаалал 67 хувь хүртэл хэтэрсэн байгаа энэ үед эмч, сувилагч нарын хүрэлцээ хэр байгаа вэ?
- НЭМГ-аас АШУҮИС-тай хамтран ажиллаж резидент эмч нарыг дайчлан ажиллаж байна. Хүүхдийн резидент 19 эмчийг ачаалал ихтэй байгаа дүүргийн эмнэлгүүд рүү хуваарилсан байгаа. Мөн 533 резидент эмчийг өрхийн эрүүл мэндийн төвүүд рүү хуваарилж, эрүүл болон хүндрээгүй хүүхдүүдэд байнгын хяналт үзлэг хийх ажлыг зохион байгуулж байна. Хүндрэхээс нь өмнө гэрээр эмчлэх ажил хийж байгаа гэсэн үг.
Мөн дүүрэг бүр дээр зөвлөгөө өгөх утсыг ажиллуулж байгаа.
Амьсгалын замын цочмог халдвараас урьдчилан сэргийлэх зөвлөмж, эмнэлгийн тусламж үйлчилгээний талаар нийслэлийн эрүүл мэндийн төвүүдээс зөвлөгөө авах утасны жагсаалт
“Утасны эмч” ажлын өдрүүдэд 08:30-19:00 цагийн хооронд ажиллана.
№ |
Байгууллагын нэр |
Утасны дугаар |
Хариуцах эзэн |
---|---|---|---|
1. |
Баянгол дүүргийн эрүүл мэндийн төв |
362539 |
Түргэний эмч нар |
2. |
Баянзүрх эрүүл мэндийн төв |
70150049 |
Хүүхдийн мэргэжилтэн н.Ундрам |
3. |
Багануур дүүргийн эрүүл мэндийн төв |
70210846 |
Халдвар судлагч эмч н.Очмаа |
4. |
Багахангай дүүргийн эрүүл мэндийн төв |
70491003 |
Түргэний эмч нар |
5. |
Налайх дүүргийн эрүүл мэндийн төв |
70233464, 70231003 |
Түргэний эмч нар |
6. |
Сонгинохайрхан дүүргийн эрүүл мэндийн төв |
98254999 |
Хүүхдийн мэргэжилтэн Бүтэмж |
7. |
Сүхбаатар Эрүүл мэндийн төв |
350793, 88285051 |
Эмч н.Алимаа |
8. |
Хан-Уул дүүргийн эрүүл мэндийн төв |
341003 |
Хүүхдийн мэргэжилтэн н.Онон |
9. |
Чингэлтэй дүүргийн эрүүл мэндийн төв |
70110716 |
Түргэний эмч нар |
10. |
Гачуурт тосгоны эмнэлэг |
70490003 |
Жижүүр эмч нар |
11. |
Хонхор тосгоны эмнэлэг |
95021234 |
Жижүүр эмч нар |
12. |
Жаргалант тосгоны эмнэлэг |
98854010 |
Жижүүр эмч нар |
13. |
Туул тосгоны эмнэлэг |
70497103 |
Жижүүр эмч нар |
Эцэг эхчүүд бага насны хүүхдээ ханиад томуунаас яаж урьдчилан сэргийлэх, гэрийн нөхцөлд хэрхэн асарч сувилах, өвчний шинж тэмдгийг хэдийд таньж мэдэх, эмнэлгийн яаралтай тусламжийг ямар үед авах вэ гэх мэт олон талын зөвлөгөөг “Утасны эмч”-ээс асууж лавлах бүрэн боломжтой юм байна.