Монгол улс Хүйсийн тэгш эрхийн байдлаар дэлхийд 58-д жагслаа
Дэлхийн Эдийн Засгийн Чуулганаас өнөөдөр дэлхийн хүйсийн тэгш эрхийн тайланг (global gender gap report) танилцууллаа.
Уг тайланд Монгол улс нийт 144 орноос 58-д жагссан байна. Улс бүрийн үзүүлэлтийг 0-ээс 1.0 хүртэл оноогоор үнэлэхэд Монгол улс 0.705 гэсэн оноо авчээ.
Ингэхдээ дараах дөрвөн дэд үзүүлэлтийг нь үнэлсэн байна.
- Эдийн засгийн эрх чөлөө
- Боловсрол олж авах боломж
- Эрүүл мэнд, амьдрах чадвар
- Улс төрийн оролцоо
Дэд үзүүлэлтүүдээс харвал Эрүүл мэнд, амьдрах чадвараар Монгол улс бусад 38 улсын хамт 1 дүгээр байранд жагссан байна. Үүнд гол хоёр хүчин зүйлийг үнэлсэн нь нэгд, эмэгтэй хүүхэд төрөхөд ялгаварлахгүй байх, хоёрт, хүчирхийлэл, өвчин тахал зэргээс болж зүй бусаар нас барахгүй байх ажээ.
Харин хамгийн муу дэд үзүүлэлт нь Улс төрийн оролцоо байж, энэ үзүүлэлтээр Монгол улс 119 дүгээрт жагссан байна. Үүнд эрх мэдэлтэн, удирдах түвшний ажилд эзлэх байр суурийг үнэлсэн гэжээ.
Бүс нутгийн хэмжээнд Монгол улс нь Филиппин, Шинэ Зеланд, Лаос, Австрали, Сингапурын дараа 6 дугаарт орсон бол Япон, Өмнөд Солонгос, Хятад улсууд манай хойно жагссан байна.
Бүрэн тайлантай энэ холбоосоор танилцах боломжтой.
Эх сурвалж: Weforum.org
