Хотод АН, хөдөө МАН ялчих шиг боллоо
2016 оны сонгууль шувтрах тийшээ хандлаа. Уг нь өчигдөр эцэслээд бүтэн жилийн турш сонгуульдсан бүх шатны “улстөрчид” амьсгаа авах байлаа. Ирц бүрдээгүй учраас ирэх бүтэн сайн өдрийг хүртэл дахиад л сонгуульдах нь. Явж явж өнөөх хар машины буянаар 1990-ээд оноос хойш сонгууль болохоор л үргэлжилдэг хэрүүл үндсэндээ алга болжээ. Одоо тулгараад байгаа зовлон нь сонгогчдын ирц хүрэхээ больсон байна.
Харин ирц нь хүрсэн 1 тойргуудад аль нам хэдэн суудал авсныг албан ёсоор хараахан зарлаагүй байна. Гэхдээ намууд өөрсдийн шугамаар мэдээллийг авчээ. Хамгийн гол нь намуудын авсан мэдээлэл хоорондоо яв цав таарч байгааг эх сурвалжууд нотолж байгаа юм.
Урьдчилсан мэдээгээр Сүхбаатар, Баянхонгор аймаг тэр чигээрээ “цэнхэртсэн” байна.
Бусад аймагт ямар нэг байдлаар МАН илүү байгаа гэх мэдээлэл намуудад иржээ. Нийслэлийн хувьд Багануур, Багахангай, Налайх дүүргүүдэд МАН ялсан. Харин Баянзүрх, Сонгинохайрхан, Баянгол, Сүхбаатар, Чингэлтэй, Хан-Уул дүүрэгт АН ялаад байгааг эх сурвалжуудын мэдээлэл нотолж байна.
Мөн нийслэлийн төвийн зургаан дүүрэг болон Багануур дүүргийн зарим хэсгийн хороонд сонгогчдын ирц хүрээгүйгээс нэмэлт санал хураалт явуулахаар болжээ. Гэхдээ энэ нь урьдчилсан мэдээний дүнг өөрчлөх боломж бага гэж байна.
Нэг зүйлийг хэлэхэд, Сум, дүүргийн сонгуулийн дүн гурван cap гаруйхны өмнө болсон УИХ-ын сонгуулийн дүнгээс хол зөрүүтэй гарсан нь анхаарал татаж байна. Уг нь сонгогчид УИХ-д ямар сонголт хийсэн, түүнийгээ Орон нутгийн сонгуулиар баталгаажуулсаар ирсэн байдаг. Хэрэв тэр “уламжлал”-аар явсан бол өнөөдөр МАН тэр чигээрээ үнэмлэхүй ялалт байгуулчих байв. Гэвч тэгсэнгүй.
МАН хэзээнээсээ сонгуулийн туршлагатай. Тэр утгаараа сонгуульд ялах нь тодорхой гээд итгэчихсэн МАН-ын зарим аймаг, сумын гишүүн албан тушаалаа аль эртнээс хувааж, зарим нэг нь Засаг даргын суудлын төлөө нармайгаа нээлцсэн нь бий.
УИХ-д илт давуу 76-суудлаас 65-ыг нь эзэлж суусан МАН энэ сонгуульд яагаад амжилтаа давтсангүй вэ. Үнэндээ гурван cap гэдэг тийм ч богино хугацаа биш ажээ. Хамгийн гол нь МАН энэ хугацаанд УИХ-ын сонгуульд дэмжиж, итгэл хүлээлгэсэн сонгогчдоо АН-д алдталаа “ажилласан” байгаа юм. Хэрэвзээ энэ сонгууль дахиад нэг сарын дараа болсон бол өнөөдрийнх шиг зөвхөн дүүргүүдийг биш сумдаа алдчихаад сууж байхыг үгүйсгэх аргагүй юм.
