ШХАБ-т Энэтхэг, Пакистан улсууд гишүүн орноор элсэх САНАМЖ БИЧИГТ гарын үсэг зурлаа

Ч.Болортуяа

2016 оны 6 сарын 24

iKon.MN

эрэмбэлэх: шинэ нь эхэнд хуучин нь эхэнд

17:43 2016/06/24

-Ташкент хотоос мэдээлж байна-

Бүгд Найрамдах Узбекистан Улсын нийслэл Ташкент хотноо Шанхайн Хамтын Ажиллагааны Байгууллагын гишүүн орнуудын Төрийн тэргүүн нарын зөвлөлийн ээлжит 16 дугаар хуралдааны өргөтгөсөн хуралдаан яг одоо үргэлжилж байна. Тус хуралдаанаар дөнгөж сая Энэтхэг, Пакистан улсыг ШХАБ-ын гишүүн болгох асуудлыг хэлэлцэж САНАМЖ БИЧИГТ гарын үсэг зурлаа.

16:25 2016/06/24

Энэ удаагийн уулзалтаас шинэ гишүүн, ажиглагч элсүүлэх шийдвэр гарахгүй бололтой гэж Монгол Улсын Гадаад Хэргийн Яамнаас мэдээлж байсан юм. Гэвч Энэтхэг, Пакистан гэсэн хоёр улсыг ШХАБ-ын гишүүн орноор нэмэх асуудлыг өнөөдрийн хуралдаанаар шийдвэрлэх шийдвэр гарч магадгүй болсон талаар албаны эх сурвалжууд хэллээ.

Өчигдрийг хүртэл талууд үл ойлголцолд байсан асуудлууд дээрээ санал нэгдэж чадсан талаар Монгол Улсын Гадаад Хэргийн сайд Л.Пүрэвсүрэн өнөөдөр сэтгүүлчдэд мэдээллээ.

Тэрбээр “Хэдхэн хоногийн өмнө ШХАБ-т шинэ гишүүн элсүүлэх хэлэлцээр хүнд байдалтай байгаа талаар албаныхны мэдээллийг авч байлаа. Нийт 30 баримт бичгийг өөрчилж шинэчлэх шаардлагатай байсан бөгөөд энэ явцад зарим нэг хүндрэл гарсан гэж байлаа. Харин өчигдөр орой болсон Гадаад хэргийн сайд нарын зөвлөгөөнөөр энэ асуудлаа хэлэлцэж шийдвэрлэсэн байна. Өнөөдрийн дээд хэмжээний уулзалтын үеэр ШХАБ-ын гишүүн зургаан орон санал хурааж шинэ хоёр гишүүнийг элсүүлэх нь. Энэтхэг, Пакистан хоёр ШХАБ-ын гишүүн болсноор Евразийн маш том байгууллага болон өргөжиж эхэлж байна гэсэн үг. ШХАБ нь өөрөө зургаан гишүүн оронтой, зургаан ажиглагч оронтой, зургаан яриа хэлэлцээний түнш оронтой. Найман гишүүнтэй болсноор ШХАБ-т өнөөдрөөс шинэ нөхцөл байдал эхлэх нь. Монгол Улсын хувьд одоогийн байдлаар ажиглагчийн статусаа хадгалах байр суурьтай хэвээр байгаа. Цаашдаа ч бид идэвхтэй ажиглагч байхыг эрмэлзэж байна” гэсэн юм.

17:43 2016/06/24

-Ташкент хотоос мэдээлж байна-