Бүтэн марафоны ялагчийг 10 сая төгрөгөөр урамшуулна
"Найрсаг Улаанбаатар" хөтөлбөрийн хүрээнд энэ онд хэрэгжүүлэх үйл ажиллагаа, арга хэмжээний төлөвлөгөөнд “Улаанбаатар Марафон” олон улсын гүйлтийг нийслэл хотод гурав дахь удаагаа зохион байгуулах гэж байна. Энэ талаар Нийслэлийн Биеийн тамир спортын газрын дарга Ж.Ганболдоос тодрууллаа.
-Гурав дахь удаагаа зохион байгуулагдах “Улаанбаатар Марафон” олон улсын гүйлтийн талаар тодруулаач?
-“Улаанбаатар Марафон” олон улсын гүйлтийг ирэх сарын 4-ний өдөр зохион байгуулахаар бэлтгэл ажил хийгдэж эхлээд байгаа. Өмнөх жилүүдийн гүйлтэд нийслэлийн иргэдээс гадна хөдөө, орон нутаг, Монгол Улсад ажиллаж, амьдарч байгаа гадаадын иргэд, хөрш зэргэлдээ орны гүйлт сонирхогчид оролцсон.
Түүнчлэн олон улс, тив, дэлхийд танигдсан нэртэй тамирчид зэрэг 17-18 мянга гаруй хүнийг хамруулан амжилттай зохион байгуулахад нийслэл, дүүргийн нутгийн захиргааны байгууллага, ивээн тэтгэгч, дэмжигч, хэвлэл мэдээллийн спонсор байгууллагуудын идэвх санаачилга, хамтын хүчин чармайлт чухал нөлөө үзүүлдэг. Энэхүү гүйлтийг амжилттай зохион байгуулах, оролцогч дэмжигчдийн тоог нэмэгдүүлэх бэлтгэл ажлыг хангах ажлын хүрээнд “Улаанбаатар Марафон”-д Засгийн газар, салбарын яам агентлагууд татан оролцуулж байгаа.
Түүнчлэн нийслэл, дүүргийн нутгийн захиргааны байгууллага, бүх шатны боловсрол, соёл, спортын байгууллага, нийгмийн олонд танигдсан алдар цуутай хүмүүс, иргэдийг татан оролцуулахыг эрмэлзэж байгаа.
-Одоогийн байдлаар марафонд оролцохоор хэчнээн хүн бүртгүүлээд байгаа вэ. Хэдэн орны тамирчид оролцох бол?
-Нийслэлийн Засаг даргын нэрэмжит “Улаанбаатар Марафонд нэгдэцгээе” цомыг нийслэл, дүүргийн хэмжээнд өнгөрсөн дөрөвдүгээр сарын 4- нөөс энэ сарын 25-ны хооронд 50 хоногийн хугацаатай аялуулж 5000 гаруй хүн анкетаар, 10 мянга гаруй хүн онлайнаар бүртгүүлээд байгаа.
Түүнчлэн 2014 онд БНСУ-аас Барселоны Олимпийн марафон гүйлтийн аварга нэг тамирчин, Япон улсаас Азийн аварга хоёр тамирчин БНХАУ-аас олон улс, тив, дэлхийн шагналт гурван тамирчин оролцсон.
Харин 2015 онд БНХАУ-аас олон улс, тив, дэлхийн шагналт гурав тамирчин, Бутаны Вант улсын бүтэн марафоны аварга хоёр тамирчин урилгаар ирж оролцсон нь энэхүү гүйлтийн цар хүрээ, чанарыг тодорхой харуулж байгаа юм.
-Гүйлтэд оролцох хүсэлтэй иргэд хаана очиж бүртгүүлэх үү?
-Марафоны гүйлтийн онлайн бүртгэлийг www.ub-marathon.ub.qov.mn сайтаар болон Нийслэл, дүүргийн Биеийн тамир, спортын газар, хороодоос томилогдсон мэргэжилтнүүдэд бүртгүүлж болно. Түүнчлэн "Улаанбаатар-Марафон" олон улсын гүйлтийг зохион байгуулах тухай мэдээ мэдээллийг www.ub-marathon.ub.qov.mn сайт, "Ub-Marathon 2016" Public group, Community раgе-ээр сурталчилж байгаа.
Дашрамд дуулгахад, бүртгүүлээд төлбөрөө төлсөн оролцогчдод олгосон сугалааны тохирол ирэх сарын 4-нд буюу марафоны өдөр болно.
Сугалааны ялагчид "Эрдэнэс Монгол" групп, "Туушин" зочид буудлаас оюутны хагас жилийн сургалтын төлбөрийн эрх, Сүхбаатар дүүргээс, Нийслэлийн Биеийн тамир, спортын газраас нэг жилийн сургалтын төлбөрийн эрх болон "361°" брэнд, "Голден жим", "Хербалайф", "Юнисити", "AVC " зэрэг компаниудын бүтээгдэхүүний эрх, марафоны футболк, малгай, батламжийг гардуулах юм.
Түүнчлэн энэхүү үйл ажиллагаанд иргэдийг татан оролцуулах зорилгоор сошиал ертөнцөөр зарлагдсан "UB MARATHON -2016 “LIKE” УРАЛДААН" энэ сарын 30-ны өдрийн 17:00 цагт хаагдсанаар ялагчдыг тодруулахаар болсон. Ялагчид Сонгинохайрхан, Хан-Уул, Баянгол дүүргүүдийн Усан бассейны нэг сарын эрх, "Хавай" фитнесс клубийн нэг сарын эрх, гүйлтийн футболк, малгай, медалион өгөхөөр төлөвлөөд байгаа.
-Марафон хэчнээн ангиллаар болох уу. Энэ өдөр төв замуудыг хаах уу?
-"Улаанбаатар Марафон 2016" олон улсын гүйлт ирэх сарын 4-ний өдрийн 09.00 цагт Их эзэн Чингис хааны нэрэмжит талбайд болно.
Тэмцээний өдөр бүртгэл хийхгүй бөгөөд энгэрийн дугаар олгохгүй.
Хагас марафон /21.095 м/, бүтэн марафон /42.195м/-д 18-аас дээш настай, марафон гүйлтээр тогтмол хичээллэгчид, 10.000 м-т 18-аас дээш настай, гүйлтээр тогтмол хичээллэдэг эрэгтэй, эмэгтэй зөвхөн сонирхогчид оролцох юм. Харин 5.000 м-ийн 12-17, 18- 35, 36-54, 55-аас дээш гэсэн дөрвөн насны ангилалд эрэгтэй, эмэгтэй зөвхөн сонирхогчид, 1.5 км-ийн гэр бүлийн төрөлд 11-ээс доош насны хүүхэдтэй гэр бүлийн гишүүд (өвөө эмээ, эцэг эх эсвэл ах эгчийн хамт оролцож болно), 1.5 км- ийн хөгжлийн бэрхшээлтэй иргэдийн ангилалд зөвхөн тэргэнцэртэй, хараагүй иргэд (эдгээрээс өөр хөгжлийн бэрхшээлтэй иргэд бусад зай, төрлийг сонгож) оролцож болно. Тэмцээний өдөр бүртгэл хийхгүй бөгөөд энгэрийн дугаар олгохгүй. Гүйлтийн тэмцээн болох өдөр Чингисийн талбай руу орох, гарах хөдөлгөөнийг 08:30 цагаас хязгаарлаж хаана.
-Хэрвээ нууц биш бол шагналын талаар тодруулаач?
-Оролцох хүсэлтэй иргэд энэ сарын 30-ны 17:00 цагаас өмнө интернетэд холбогдсон аль ч газраас www.ub-marathon.ub.qov.mn онлайн бүртгэлд хамрагдах боломжтой. Өөрийн биеэр очиж бүртгүүлж ч болно. Эсвэл аль ойр байгаа дүүргийнхээ Биеийн тамир, спортын хороо болон Нийслэлийн Биеийн тамир, спортын газарт иргэнийхээ үнэмлэхтэйгээ ирнэ.
Марафон гүйлтийн зай төрөл бүрт 1-3 байр эзэлсэн тамирчдыг алт, мөнгө, хүрэл медаль, өргөмжлөл, мөнгөн шагналаар шагнана.
Мөн 21.095м, 42.195М, 10,000 м зайд гүйж эхний 4-10 дугаар байр эзэлсэн гүйгчдийг дурсгалын медаль, өргөмжлөл, мөнгөн шагналаар шагнана.
Тодруулбал,
- Бүтэн марафон /42.195 м/ гүйлтийн шагнал I -10 сая, II – найм, III- зургаан сая төгрөг, IV-X байр 200 – 400 мянган төгрөг,
- Хагас марафон /21.095 м/ гүйлтийн шагнал I-тав, ll-дөрөв, III-гурав сая төгрөг, IV-X байр 150 -200 мянган төгрөг, 10,000 метрийн зайн гүйлтийн шагнал I-500, II-400, III-300, IV-X байр 100- 150 мянган төгрөг,
- 5,000 метрийн зайн гүйлтийн шагнал I-300, II-250, III-200 мянган төгрөг, IV-VIII байр 50-100 мянган төгрөгөөр тус тус шагнаж урамшуулах болно.
