БНХАУ-ын эрх баригчид шинээр байгуулахаар төлөвлөж байсан нүүрсний эрчим хүчний станцын 200 барилгын төслийг зогсоогоод байна.
Энэ тухай тус улсын Үндэсний хөгжил, шинэтгэлийн хороо болон Үндэсний эрчим хүчний удирдлагаас мэдээлжээ. Дээрх шийдвэр нь 13 дахь таван жилийн төлөвлөгөөнд багтаж буй 2016 онд нүүрсний 1,000 уурхайг хаах төлөвлөгөөтэй холбоотой аж.
Шинээр байгуулахаар төлөвлөж байсан нүүрсний эрчим хүчний 200 станц нь нийт 105 гигаватт эрчим хүч үйлдвэрлэх хүчин чадалтай байжээ. Өнөөгийн байдлаар Хятад нь жилд 5,5 тэрбум тонн нүүрсний хэрэглээгээр дэлхийд тэргүүлж байгаа.
Түүнчлэн Хятадын Эрчим хүчний удирдлагын газрын зүгээс 2019 он хүртэл 3 жилийн хугацаанд шинээр нүүрсний уурхай нээх эрх олгохгүй байхаар тогтсон бөгөөд улсын хэмжээнд нүүрсний нийт олборлолтыг 700 сая тоннд барих зорилт тавьсан юм.
Энэ оны нэгдүгээр улирлын байдлаар Хятадын нүүрсний үйлдвэрлэлийн тэргүүлэгч Shenhua Energy компанийн ашиг орлого 28,3%-иар буурч 734 сая ам.доллар болсон байна.