Үндэсний баяр наадмын зохион байгуулах хорооны Хурдан морины салбар хорооноос ХХААЯ, Морин спорт уяачдын холбоо, Хурдан морины салбар хорооны саналуудыг үндэслэн эрлийз морьдыг тусад нь уралдуудах шийдвэр гаргажээ.
Ингэхдээ шинэчлэн баталсан журмын дагуу сэрвээний өндрийг хэмжихээс гадна морины үүлдэрийг харгалзан үзэх аж.
Хурдан морины салбар хорооны дарга З.Болдбаатар “Энэхүү журмыг хэрэгжүүлэн ажиллахад уяач, морь сонирхогчид хамтран ажиллахыг уриалж байна. Морины сэрвээний өндөр, үүлдэрийг тогтооход Үндэсний мал үржүүлгийн газар болон ХХААЯ-ны холбогдох мэргэжилтнүүдээс бүрдсэн ажлын хэсэг ажиллана. Үндсэн зургаан насанд эрлийз морьдыг уралдуулахгүй. Энэ жил зуншлага маш муу байгаа, хуурайшилт ихтэй, өвс ногооны гарц муу байгаа. Тиймээс уяачид байгалийн хүчин зүйлсийг анхаарч бэлтгэлээ хангахыг анхааруулж байна” гэлээ.
Долоодугаар сарын 13-нд буюу Уяачдын наадмаар эрлийз моридын уралдаан болох бөгөөд гурван насанд уралдуулах аж.
Хурдан морины уралдаан:
Хязаалан, шүдлэн долоодугаар сарын 10-нд
Азарга, их нас 11-нд
Соёолон, дааганы уралдаан 12-нд
Мөн хос морьдын уралдааны долоодугаар сарын 10-нд болох юм байна.