Мах, улаанбуудай, тосны ургамлыг Хятадын зах зээлд экспортлох асуудлаар Хөх хотод ажиллалаа
Энэ сарын 18,19-ний өдрүүдэд ХХАА-н дэд сайд Б.Батзоригоор ахлуулсан ажлын хэсэг Хятад улстай хөдөө аж ахуйн салбар дахь хамтын ажиллагаагаа өргөжүүлэх, харилцаагаа шинэ шатанд гаргах, мах,махан бүтээгдэхүүн тэр дундаа үхэр, хонины мах болон улаанбуудай, тосны ургамлыг Хятадын зах зээлд экспортлох асуудлаар ӨМӨЗО-ны Хөх хотод ажиллалаа.
БНХАУ-ын дарга Си Зиньпин 2014 онд Монгол улсад айлчлах үеэр Монголд үйлдвэрлэсэн хөдөө аж ахуйн гаралтай бүтээгдэхүүнийг Хятадын зах зээлд татваргүй, хэмжээ харгалзахгүй экспортлох манай талын саналыг дэмжсэн билээ. Тэрбээр газар зүйн байршлын давуу талыг ашиглан үхэр, хонины махыг Монголд боловсруулж, нэмүү өртөг шингээн, татваргүйгээр хэмжээ харгалзахгүй Хятад улс руу экспортлох, үүнд дэмжлэг үзүүлэхэд бэлэн гэдгээ илэрхийлж байсан юм.
Энэ дагуу хөдөө аж ахуйн салбар дахь хамтын ажиллагааг өргөжүүлж, шинэ төвшинд гаргахаар ХХАА-н дэд сайдаар ахлуулсан ажлын хэсэг өнгөрөгч дөрөвдүгээр сард Бээжин хотноо ажилласан бол энэ удаа ӨМӨЗО-ны Хөх хотод ажлын айлчлал хийж холбогдох албаны хүмүүстэй уулзлаа.
Айлчлалын эхний өдөр дэд сайд Б.Батзориг Хөх хотын Хөдөө аж ахуйн танхимын дэд дарга Бүрэнтэй уулзсан бөгөөд хоёр орны хөдөө аж ахуйн гаралтай бүтээгдэхүүний худалдааг хөнгөвчлөх, хамтын ажиллагаагаа өргөжүүлэх асуудлаар санал солилцсон юм.
ӨМӨЗО-ны хувьд 28 сая хүн амтай, 100 сая малтай бол манай улс 3 сая хүн амтай, 51,9 сая малтай, энэ давуу талаа ашиглан нөхөн сэргээгдэх уг баялгаа эдийн засгийн эргэлтэд оруулах боломж байгаа юм.
Айлчлалын хүрээнд дэд сайд Б.Батзориг ӨМӨЗО-ны Дэд тэргүүлэгч Юн Гуанжүнтэй уулзаж ”Мал аж ахуй, газар тариалангийн гаралтай бүтээгдэхүүнийг Хятадад экспортлохоос гадна ӨМӨЗО-ны эрчимжсэн мал аж ахуйг Монголд нутагшуулах, техник технологийн дэвшлийг нэвтрүүлэх,энэ талын мэргэшсэн боловсон хүчин бэлтгэж сургахад дэмжлэг үзүүлэх, малын халдварт өвчний оношилгоо, судалгааны чиглэлээр мэргэжилтнүүдийг Хятадын лаборатори, хүрээлэнд дадлагажуулах зэрэгт дэмжлэг үзүүлэх “ саналыг тавьсан юм.
Дэд тэргүүлэгч Юн Гуанжүн болон холбогдох албаныхан манай саналыг нааштайгаар хүлээн авч, бүхий л талаар дэмжин ажиллана гэдгээ илэрхийллээ.
Эх сурвалж: ХХААЯ
