Тусгай замын автобусны шугамын зургийг энэ онд багтаан гаргана
Нийслэлийн Засаг дарга бөгөөд Улаанбаатар хотын захирагч Э.Бат-Үүл Азийн хөгжлийн банкны суурин төлөөлөгч Роберт Шөүл хаммэр болон бусад албаны хүмүүсийг хүлээн авч уулзлаа.
Уулзалтаар “Улаанбаатар хотын нийтийн тээврийг хөгжүүлэх хөрөнгө оруулалтын хөтөлбөр” буюу BRT /Bus rapid transit/ - ийн цаашид хийгдэх техникийн асуудлаар санал солилцов.
Уулзалтын эхэнд Азийн хөгжлийн банкны суурин төлөөлөгч Роберт Шөүл хаммэр “Азийн хөгжлийн банкны хамт олны өмнөөс танай баг хамт олонд талархснаа илэрхийлье. Бид төслийн хүрээнд цаашид хийгдэх техникийн асуудал, үндсэн бодлогын асуудлаар чиглэл авах гэж байгаадаа таатай байна. Бид төслийг гэр хорооллын дахин төлөвлөлт, газар чөлөөлөлт гэх мэт бусад ажлуудтай уялдуулан хийнэ гээд дараагийн шатны нарийвчилсан зураг төслийн ажлаа танилцууллаа.
Тусгай шугамын автобусны замд Азийн хөгжлийн банкны шугаманд тэнцэхүйц тролейбус явуулах саналтай байна. Ашиглалтын үйл явцыг нь бид бүрэн хариуцаж, эрчим хүчний аюулгүй байдлыг хангаж ажиллана. Энэ төслийн хүчирхэг гайхалтай чанар нь түгжирлийн асуудлыг шийдэх, мөн үндэсний үйлвэрлэл хөгжихөд тустай. Мөн тролейбусыг явуулснаар гарч болзошгүй эрсдэл болон шатахууны хэрэглээг багасгана гэж үзэж байна” гэлээ.
Төслийн хүрээнд энэ жил Чингисийн өргөн чөлөө болон хойд их тойруу дагуух тролейбус болон агаарын шугамын дэд станцуудын асуудлыг нарийвчлан зураглал хийж, эдийн засгийн тооцоогоо гаргах юм байна.
