УИХ-аар хэлэлцэгдэх нь хэмээн удтал хүлээгдсэн Согтууруулах ундааны хяналтын тухай хууль, Хүүхэд харах үйлчилгээний тухай хуулийн төслүүдийг энэ долоо хоногт чуулганаар хэлэлцэж эхэлнэ. Тиймээс энэ удаагийн “Чухал сэдэв” буландаа УИХ-ын гишүүн Л.Эрдэнэчимэгийг урьж ярилцлаа. Тэрбээр, эдгээр хуулийн төслүүдийг өргөн мэдүүлж, эмэгтэй гишүүдийн хамт дэмжлэг үзүүлэн ажиллахаа илэрхийлсэн юм.
-Согтууруулах ундааны хяналтын тухай хууль удаан хугацаанд хүлээлт үүсгэлээ. Хуулийн төслийн гол ач холбогдлын талаар яриагаа эхлэх үү?
-Өргөн баригдахад бэлэн болсон нь өнгөрсөн тавдугаар сар. Нэлээд удаан хүлээж байж өнөөдөр /өчигдөр/ барилаа. Хуулийн төсөл сүүлийн гурван жил яригдсан. Энэ хуулийг Ерөнхийлөгчийн Тамгын газраас боловсруулж эхэлсэн. Олон улсын экспертүүд оролцсон, өргөн хүрээнд бэлтгэгдэж байгаад Хууль зүйн яам руу шилжсэн.
Миний хувьд Хууль зүйн яамны ажлын хэсэгтэй хамтарч хуулийн төслийг өргөн барихаар бэлтгэсэн байгаа. Хууль зөвхөн миний санаа биш. Гадаадын нэлээд олон улс орны туршлага судлаж, Дэлхийн эрүүл мэндийн байгууллагын төлөөлөгчид ч мөн саналаа оруулж боловсруулсан том хэмжээний хууль. Хууль гарах болсон шалтгааныг энд ярих хэрэггүй байх.
Хууль нь сул учраас бизнес хийх гэсэн, ашиг олох гэсэн сонирхол манайхыг чиглэх нь их
Архидалт хэрээс хэтэрсэн, архитай холбоотой гэмт хэргийн гаралт, зам тээврийн осол, гэр бүлийн хүчирхийлэл нэмэгдэж байгаа учраас хууль нийгмийн хүлээлт байсан. Манайд Архидан согтуурахтай холбоотой хууль хэрэгжээд бараг 10 гаруй жил болсон. Харамсалтай нь энэ хууль амьдралд хэрэгжихэд төвөгтэй, тунхаглалын шинжтэй байдаг. Хуулийг нарийвчилсан байдлаар өөрчлөх зайлшгүй шаардлага бий болсон учраас хуулийн төслийг боловсруулсан.
Дэлхий нийтээр архи тамхитай тэмцэж, бусад улс орнууд архитайгаа тэмцэх чамбай хуулиуд боловсруулчихсан байгаа юм. Архины хэрэглээ өндөр улс орнууд архитай тууштай тэмцэж эхэлсэн байна. Хууль нь сул учраас бизнес хийх гэсэн, ашиг олох гэсэн сонирхол манайхыг чиглэх нь их байгаа. Манайх Тамхины хяналтын тухай хуулиа чангаруулсан учраас гаднаас чиглэж байсан тамхины бизнесийн урсгал харьцангуй гайгүй болчихлоо.
-Хуулийн төсөлд архитай холбоотой бүх асуудлыг зохицуулахаар тусгасан уу?
-Зөвхөн бүтээгдэхүүний тухай хөндөнө. Архидан согтуурахтай холбоотой асуудал нэлээд олон хуулиар зохицуулагддаг учраас энэ хуулиар бүтээгдэхүүнээ голлож үзэх нь зүйтэй юм гэж үзсэн. Бүтээгдэхүүнийг үйлдвэрлэх, импортлох, худалдаалах, үйлчлэх буюу үйлдвэрээс гараад хэрэглэгчид хүрэх хүртэлх сүлжээнд тавих хяналтыг энэ хуулиар зохицуулна. Үйлдвэрлэл дээр тавигдах хяналтыг өөрөөр харсан.
Өнөөдөр 93 аж ахуйн нэгж архи, спирт үйлдвэрлэж байна. Энэ тоог багасгана. Ямар ч хязгаарлалтгүйгээр архи үйлдвэрлэж байгаа учраас хяналтыг чангатгана. Хяналт муу байна гэдэг нь чанаргүй архи гарах нөхцөл болно. Цаашлаад татвар төлөхгүй байгаа. Тиймээс архи үйлдвэрлэх тусгай зөвшөөрлийг Засгийн газраас олгодог байхаар тусгаж өглөө. Спиртийн хэмжээнд квот тогтоож Засгийн газар өөрөө барих ёстой.
Жилдээ гарч байгаа спиртийн хэмжээнд квот тогтоочихоор үйлдвэрлэх спиртээс хэдэн жил архи гарах вэ гэдэг нь ойлгомжтой болчихно. Худалдаалах эрх нээгдсэн 7500 гаруй аж ахуйн нэгж байгаа. Бидний нэрлэж заншсанаар найман нэрийн барааны дэлгүүр болгон архи худалдаалж байна.
Спиртийн хэмжээнд квот тогтоож Засгийн газар өөрөө барих ёстой.
Тиймээс тоог цөөрүүлж, архи зардаг тусгай дэлгүүрүүд бий болгоно. Скандинавын улс орнууд болон Азийн маш олон оронд архи зардаг тусгай дэлгүүрүүд байдаг. Тиймээс энэ туршлагад үндэслэн тусгай дэлгүүрээр хатуулаг өндөртэй архиа зардаг болгох заалт оруулж ирсэн.
Архи зардаг тусгай дэлгүүрүүд өөр ямар нэг бүтээгдэхүүн зарахгүй. Зөвхөн архиа зарна. Хүн амынхаа тоонд үндэслэн 2000 хүн тутамд нэг архины дэлгүүр байхаар тусгасан. Өнөөдөр 320 хүн тутамд нэг дэлгүүр байгаа. Чуулганаар хэлэлцэх явцад хүн амын тоо өөрчлөгдөж мэднэ. Жижиг сум суурин газарт 2000-аас дээш хүн амтай нөхцөлд хоёр байхаар тусгасан юм. Нэг монополь дэлгүүр гарч ирээд архины үнийг хөөрөгдөх вий гэсэн болгоомжлол байгаа учраас хоёр цэгтэй байхаар оруулж ирсэн.
-Цагийн хязгаар тогтоож өгөх үү?
-Тэгсэн. Өглөө 09.00 цагт нээгдээд орой 21.00 цагт хаана. Амралтын өдрүүдээр хугацааг нь богиносгож болох юм гэж харж байгаа. Хуульдаа тусгаагүй ч хэлэлцүүлгийн шатанд гишүүдээс ийм санал гаргаж дэмжлэг авчихвал оруулж болно. Ихэнх улс орнуудад архины тусгай дэлгүүр ням гарагт ажилладаггүй юм билээ. Энэ нь гэр бүлдээ зарцуулах цаг нь илүү байх үүднээс хийж өгсөн заалт. Манайд ч гэсэн ням гарагт ядахдаа 17.00 цаг хүртэл ажилладаг байхаар тусгаж өгч болно.
-Үйлчилгээний байгууллагад тооны хязгаар, архи зарах цэгийн заалт үйлчлэх үү. Тэдэн бар, паб зарна гэдэг ч юм уу?
-Үйлчилгээнд ямар нэг хязгаарлалт тавиагүй. Үйлчилгээний байгууллагууд үйл ажиллагаагаа явуулдаг орчмын иргэдтэйгээ нэлээд ойлголцож, хамтарч ажиллана. Нийслэлд үйл ажиллагаа явуулдаг шөнийн цэнгээний газар, караоке, паб ихэвчлэн орон сууцны нэгдүгээр давхарт байдаг. Тиймээс орон сууцны нэгдүгээр давхарт үйлчилгээний цэг байлгахгүй гээд заачихаар хэдэн зуун аж ахуйн нэгж дампуурна.
Тэгээд ч нэгдүгээр давхраас өөр газар байгуулах боломж бараг байхгүй. Сүүлийн үеийн барилгууд дандаа л нэгдүгээр давхартаа үйлчилгээний төв байгуулж байгаа учраас тэнд үйл ажиллагаа явуулах зөвшөөрөл авахдаа иргэдтэй уулз, тэднээс санал ав гэсэн шаардлага тавьж байгаа.
Оршин суугчидтай ойлголцоод, иргэдээс 90 хувийн дэмжлэг авсан тохиолдолд шөнийн цэнгээний газар байгуулах зөвшөөрлөө авч болно. Оршин суугчдын дийлэнх нь хажуудаа архиа үйлчилдэг, чимээ шуугиан ихтэй газар байгуулахыг хүсэхгүй л болов уу. Тэгэхээр тухайн баар, пабын эзэн иргэдэд амлалт өгч, яг цагтаа хаадаг, цаг хэтрүүлэн ажиллахгүй гэсэн амлалт өгч ажиллана.
Мөн амлалтаа зөрчсөн, цаг хэтрүүлсэн, зөрчил гаргасан бол тусгай зөвшөөрлийг нь цуцлах эрхийг нь мөн иргэдэд өгөх ёстой. Тухайн байранд оршин суугчдын 50-иас дээш хувь нь өргөдөл гаргасан бол байгууллагыг хянаж шалгаад, тусгай зөвшөөрлийг нь цуцлах, эсвэл зөрчил дутагдлыг нь арилгуулах зэргээр харилцан уялдаатай ажиллах хэрэгтэй юм.
-Тамхины хяналтын хууль хэрэгжихэд хуулийн хэрэгжилтэд байцаагчид хяналт тавьж байсан. Тэгэхээр найман нэрийг дэлгүүр архи зарж байгаа эсэх, үйлчилгээний байгууллага хугацаа хэтрүүлэн ажиллаж байна уу гэдгийг яаж хянах юм бэ?
-Согтууруулах ундааны хяналтын хууль гарснаар шагийн архи ихдэх вий дээ гэсэн болгоомжлол байна. 1990-ээд оны дараа архи олдохгүй үед шагийн архи газар авч байсан. Шагийг дагаад чанаргүй архи ихэсдэг, хүний эрүүл мэндэд заналхийлдэг гэсэн асуудал яригддаг. Ийм зөрчил гарна.
Гэхдээ 20 жилийн өмнөхтэй харьцуулж болохгүй. Иргэд хувь хүнээс архи авч уухгүй байх. Маш бага хэсэг нь л ийм зөрчил гаргана. Хоёрдугаарт, шууд л бүх согтууруулах ундааг хянаад цагдаад байхгүй. Найман нэрийн барааны дэлгүүрүүдэд бага градустай /вино, дарс, пиво/-г нь зарах эрхийг үлдээнэ.
Тусгай дэлгүүрээр зөвхөн 38 градусаас дээш согтууруулах ундаа зарна. Үйлчилгээний байгууллага ч гэсэн 21.00 цагаас хойш 24.00 цаг хүртэл пиво, вино зарах эрх нь нээлттэй. Гэртээ архидан согтуурдаг үзэгдэл харьцангуй багасах юм. Согтууруулах ундаа хэрэглэх соёлыг нь өөрчилнө гэдэгт итгэлтэй байгаа.
-Сурталчилгааг ямар байдлаар хянах вэ. Архи үйлдвэрлэгч, импортлогч компаниуд нэвтрүүлгийн ивээн тэтгэгчээр оролцох, “Сэнгүр” лиг зэргээр спортын тэмцээн уралдаан зохион байгуулдаг шүү дээ?
-Сурталчилгааг бүрэн хаана. 21.00 цагаас хойш согтууруулах ундааг сурталчилж болохгүй гэж оруулсан. Хэлэлцүүлгийн явцад шөнийн цагаар явуулахыг нь хориглохгүй байя гэсэн санал оруулж ирэхийг үгүйсгэхгүй. Архи, согтууруулах ундааны нэрийг ямар ч сурталчилгаанд ашиглахгүй.
Тамхины хяналтын тухай хууль дээр ч гэсэн “Монгол тамхи со” гэх мэтээр нэрэндээ тамхи сурталчилсан байсныг болиулсан. Энэ хуульд ч ийм заалт орно. Нэрэндээ архи сурталчлахгүй. “АПУ” компанийн нэр болох юм бол АПУ гэсэн архи үйлдвэрлэхгүй гэсэн үг. “Арвайн үндэс” компанийн нэрээрээ байх уу, архи байх уу гэдгээ шийднэ.
-Албан үүргээ гүйцэтгэж яваа албан хаагч, жирэмсэн эхчүүд, хүүхдэд худалдахгүй гэж заасан. Гэхдээ архи авч байна уу, худалдагч жирэмсэн эмэгтэйд зарсан уу гэдгийг камераар хянах юм уу, эсвэл?
-21 настай хүрээгүй бол архи согтууруулах ундаагаар үйлчлэхгүй гээд одоо мөрдөгдөж байгаа хуульд байгаа. Тэгэхээр архи худалдан борлуулахдаа иргэний үнэмлэх шалгах нөхцлийг бүрдүүлнэ. Бусад улс орнууд насанд хүрсэн, эс хүрсэн ч бай бичиг баримтыг нь үздэг. Хяналт мэдээж тавина.
Архи зардаг тусгай дэлгүүрээс хүүхдээр архи авахуулахаар оруулах ч гэдэг юм уу ямар нэг байдлаар хяналт тавина л даа. Харваас жоохон хүүхэд орж ирээд архи авна гэхээр зарах ухамсартай хүмүүс одоо байхгүй болсон. Хүүхдэд зарснаар бид ямар асуудалд орох вэ гэдгээ мэдэж байгаа болов уу.
-Таны өргөн мэдүүлсэн Тамхины хяналтын тухай хууль нэлээд чамбай хэрэгжиж байгаа. Гэхдээ энэ намрын чуулганаар Тамхины хяналтын тухай хуульд нэмэлт өөрчлөлт оруулах асуудал дахиад ороод ирлээ. Хуулийн төслийн нэмэлт өөрчлөлтийг дэмжиж байгаа юу?
-УИХ-ын гишүүн О.Баасанхүү, УИХ-ын гишүүн, АН-ын бүлгийн дарга Д.Эрдэнэбат нар хоёр өөр хуулийн заалт яриад яваад байгаа. Би аль алиныг нь дэмжихгүй. Д.Эрдэнэбат даргын нэмэлт өөрчлөлт нь байгууллагыг дотоод орчинд тамхи татах цэг байгуулах тухай. Ингэлээ гээд яах юм бэ.
Өнөөдөр бүх байгууллага дотроо тамхи татах цэг байхгүй, эрүүл ахуйн орчин маш сайжирсан. Гэтэл байгууллагын нэг өрөөг тамхи татах цэгээр тохижуулахаар бас л мөнгө зарлагадана. Төсвөөс их, бага хэмжээгээр мөнгө гарна. О.Баасанхүү гишүүн 500 метрийг 250 метр болгох талаар хөөцөлдөж байгаа. 250 метр боллоо гэхэд маш олон аж ахуйн нэгжийн тамхи зарах эрх нь нээгдэнэ. Тэгэхээр энд бас лобби яваад байна уу л гэж хараад байгаа юм.
-Тамхины хууль батлах үеэр лобби маш их байсан гэж та ярьж байсан. Энэ хууль дээр ч гэсэн лобби их орох байх даа?
-Тэгнэ. Тамхины хяналтын тухай хуулийг хэлэлцүүлэх шатанд маш олон лобби орж ирсэн. Тэгэхээр энэ лобби үргэлжилнэ. Архи үйлдвэрлэгчид гэхээс илүү гадаадын томоохон импортлогчид лобби явуулна. Зах зээл дээр байгаа бүтээгдэхүүнийг харахад гаднаас маш олон архи, согтууруулах ундаа орж ирж байна. Үүнийг хянаад эхлэхээр лобби хийх гэж оролдох нь тодорхой. Энэ бүхний эсрэг тэмцсээр байгаад л батлуулна даа.
Тамхины хяналтын тухай хуулийг хэлэлцүүлэх шатанд маш олон лобби орж ирсэн
-Эмэгтэй гишүүдийн албан бус бүлгийн идэвхи буурлаа гэсэн шүүмжлэл байна. Үүнд ямар хариулт өгөх вэ?
-Эмэгтэй гишүүд хийх ажлаа хийсээр байна. Бидний үндсэн үүрэг бол хууль батлуулах. Тэгэхээр бид эмэгтэйчүүд, хүүхдийн эрхийг хамгаалах хуулиуд дээр ажиллах үүргээ хангалттай биелүүлж байна. Гэр бүлийн тухай, Гэр бүлийн хүчирхийллийн тухай, Хамтын тэтгэврийн тухай, Хүүхэд харах үйлчилгээний тухай хуулиуд өнөөдөр хэлэлцэгдэж эхэллээ.
-Бид энэ хуулиуд дээр өдөр шөнөгүй сууж ажилласан. Хүүхэд харах үйлчилгээний хуулийг оноос өмнө батлуулна. Эхний хоёр жилд бид гадуур явж хүмүүстэй уулзаж, бэрхшээлтэй асуудлуудтай танилцаж, түүнийгээ хэвлэл мэдээллээр ил тод хэлсэн. Энэ нь биднийг идэвхтэй харагдуулсан байх.
-Гэхдээ одоо амьдрал ямар байгааг мэддэг болсон учраас үүнийг засч залруулахаар хуулийн төслүүд дээр ажиллаж байгаа юм. Энэ бүхнийг засах нь хууль, төсөв байгаа учраас шоу хийж эмнэлэг сургуулиар явахаас илүү сургууль, эмнэлгийг нь бариулах төсөв, мөнгөний асуудлыг нь хуульд тусгахаар ажиллаж байна. Их хурлын чуулган дээр эмэгтэй гишүүд юу хэлж байгаа, төсөв дээр яаж ажилласныг харах юм бол идэвхгүй гэж дүгнэхгүй л болов уу.
-2015 оны төсөвт хэдийгээр сургууль цэцэрлэг барих мөнгийг хангалттай тусгасан ч энэ нь өмнөх оны царцаасан барилгууд юм биш үү. Шинээр баригдах нь хэд байгаа вэ?
-Эмэгтэй гишүүдээс УИХ-ын гишүүн С.Одонтуяа бид хоёр Төсвийн ажлын хэсэгт орж ажилласан. Д.Арвин гишүүн нийгмийн чиглэлийн төсвийг ахалж ажилласан байгаа. Бидний зүгээс тавьсан ганц зүйл бол сургууль цэцэрлэгийн барилгуудыг царцаахгүй байх, 2015 онд бүгдийг нь барьж дуусгах.
Шинэ хуучин ч хамаагүй сургууль цэцэрлэгийн зориулалтаар баригдаж байгаа бүх барилга ашиглалтад орох ёстой гэсэн байр суурийг хамгаалж чадсанаар ирэх онд царцсан болон шинээр баригдах 100 гаруй сургууль, цэцэрлэгийн барилгад мөнгө нь тусгагдсан. 2015 ондоо багтаж дуусах нь дуусаад, 2016 оны эхээр зарим нь ашиглалтад орчихно.
-Хүүхэд харах үйчилгээний тухай хуулийг УИХ-ын чуулганаар хэлэлцэх гэж байна. Хуулийн төслийн агуулгын талаар?
-Хүүхэд харах үйлчилгээний тухай хуулийн төслийг маргааш /өнөөдөр / чуулганаар хэлэлцэж эхэлнэ. Ерөнхийлөгчийн сонгуулийн мөрийн хөтөлбөрт Хүүхэд харах үйлчилгээний талаар туссан байсан. Тиймээс гишүүд болон Ерөнхийлөгчийн санаачилсан хуулийг нэгтгэн хэлэлцэж эхлэх гэж байна. Энэ хуулийг боловсруулах болсон үндсэн шалтгааныг хүн бүр мэдэж байгаа болов уу.
Өнөөдрийн байдлаар 2-5 насны 247100 хүүхэд цэцэрлэгт хамрагдах ёстойгоос 80 мянган хүүхэд цэцэрлэгт хамрагдаж чадахгүй байна. Өөрөөр хэлбэл, гурван хүүхэд тутмын нэг нь цэцэрлэгт хамрагдаж чадахгүй байгаагаас гэртээ цоожлуулаад үлддэг. Цэцэрлэгт хамрагдаж байгаа хүүхэд тус бүрт улсаас сар бүр 116 мянган төгрөгийг төсөвлөн өгч байгаагийн зэрэгцээ эдгээр хүүхдүүд сургуулийн өмнөх боловсрол олж авах боломжоор хангагдаж байгаа.
Тэгвэл цэцэрлэгт явж чадахгүй байгаа хүүхдүүдэд энэ бүгд хаалттай болж, хохирч байна. Үүнээс үүдэн эцэг, эхийн аль нэг нь гэртээ хүүхдээ харж ажил хийхгүй байснаас үүдэн нэг айлын өрхийн орлогод нөлөөлж, ядууралд хүргэх нэг шалтаг болж байгаа юм. Үүнээс гадна тэтгэвэртээ гараад сайхан амарч байх ёстой ахмадууд маань ч гэсэн хүүхэд харж, үнэ хөлсгүй ажиллаж байна гэж болно. Тиймээс энэ хуулийн төслийг санаачлан хэлэлцүүлэх гэж байна.
-Хүүхэд харах үйлчилгээг хуульчилснаар цэцэрлэгүүд үүдээ барина гэх шүүмжлэл байгаа шүү дээ?
-Хүүхэд харах үйлчилгээ бол нийгмийн үйлчилгээний шинэ хэлбэр. Энэ хуулийг гаргаснаар цэцэрлэгүүд үүдээ барьж, сургуулийн өмнөх боловсролын систем байхгүй болох гэж байна гэсэн шүүмжлэл нэлээд дагуулж байгаа. Тиймээс энэ бол цоо шинэ нэг төрлийн үйлчилгээ гэж хэлмээр байгаа юм.
Хууль батлагдсанаар хүүхэд харах төвүүд олноор нээгдэж, хүүхдийн аюулгүй байдал, стандартын шаардлага хангасан үйлчилгээний цэвэр өрсөлдөөн бий болно. Хүүхэд харах үйлчилгээг тодорхойлохдоо, хүүхдийг асран халамжлах, хамгаалах, хооллох, тоглуулах, амраах, хөгжүүлэх цогц ажиллагаа байх ёстой.
Хүүхэд харах үйлчилгээг хүүхдийг асран хамгаалах, хооллох, тоглуулах, хөгжүүлэх цогц үйлчилгээ гэж хэлж болно. Энэ үйлчилгээг Хүн амын хөгжил, нийгмийн хамгааллын яам хариуцна. Сургуулийн өмнөх боловсрол олгож буй одоогийн цэцэрлэгүүд үйл ажиллагаагаа үргэлжлүүлэн явуулсаар байх болно. Бид жил бүр цэцэрлэгт төсөвлөх төсвийг суулгасаар байна.
-Үүнээс гадна хүүхэд харах цэцэрлэгийн стандартыг хэрхэн хангах, үүнд хэн хяналт тавих вэ гэдэг асуудал үүснэ шүү дээ?
-Мэдээж гарна. УИХ дахь намын бүлгүүдээс болон гишүүдийн зүгээс гарч байгаа санал, шүүмжлэлд хүүхэд харах үйлчилгээний төвийн стандартыг яаж хангаж байгаа болон аюулгүй байдлыг хэрхэн хангах асуудлыг байнга хөндөж байгаа. Нэгдүгээрт, Хүн амын хөгжил, нийгмийн хамгааллын яамны харьяанд Хүүхдийн төлөө гэх том газар бий. Энэ газар маань аймаг, нийслэл, дүүрэгт салбар, хэлтэстэй үйл ажиллагаагаа явуулж байна.
Хамгийн гол нь эцэг, эхийн хяналт чухал гэдгийг хуулийн төсөлд оруулж өгсөн
Мөн орон нутагт ажиллаж байгаа Хүүхэд, гэр бүлийн газар хүүхэд харах үйлчилгээг хариуцаж стандартыг бий болгон, хяналтаа тавиад явна. Түүнчлэн Мэргэжлийн хяналтын газар давхар хяналт тавихын зэрэгцээ тухайн хороо, багийн нийгмийн ажилтан хяналт тавьж, өрхийн эмнэлгүүд хамтарч ажиллах юм.
Үүнээс гадна хамгийн гол нь эцэг, эхийн хяналт чухал гэдгийг хуулийн төсөлд оруулж өгсөн. Ингэснээр эцэг, эхчүүд тухайн Хүүхэд харах төв дээр эцэг, эхийн зөвлөл байгуулж тодорхой хяналт тавих боломж бүрдэх юм. Гадаадын олон улс оронд хүүхэд харах үйлчилгээгээр сургуулийн өмнөх насны хүүхдийн асуудлыг шийддэг юм. Тиймээс ч өнгөрсөн жил хүүхэд харах үйлчилгээний загвар төвийг Сонгинохайрхан дүүргийн аравдугаар хороонд байгуулсан.
Өөрөөр хэлбэл, гэр хороололд айлын хувийн сууцыг 300 орчим мянган төгрөгөөр хөлсөлж, тодорхой хэмжээний хөрөнгө оруулалт хийж, засвар үйлчилгээ хийж 15 хүүхдийг авч, үйл ажиллагааг нь эхлүүлсэн. Нэг багшид таван хүүхэд оногдох юм. Ингээд тооцоод үзэхээр сард 2.6 сая төгрөг гарч байгаа юм.
-Анх хуулийн төсөл санаачилж байхад гэртээ хүүхдээ харж байгаа эмэгтэйчүүд хүүхэд харах боломжтой гэж байсан. Гэтэл хуульд стандарт зааж өгсөн байна. Үүнийг хэрхэн хангах вэ?
-Анх өргөн барьсан хуулийн төсөлд өөрийн гэрт нэг ээж таван хүүхэд харж болно. Үүнд улсаас зардал өгнө гэсэн асуудлыг ярьж байсан. Харин Ерөнхийлөгчийн өргөн мэдүүлсэн хуульд тухайн хүүхэд харах үйлчилгээний төвийн байранд хэн нэгэн амьдарч болохгүй гэсэн заалтыг оруулж өгсөн.
Тиймээс тухайн иргэн өөрийн байранд мини цэцэрлэг, хүүхэд харах төв байгуулах бол тухайн гэртээ амьдарч болохгүй, суллаж, 5-10 хүүхэд харж болно. Яагаад ийм заалт оруулсан гэхээр айлын гэрт хүүхэд харна гэдэг нэг талаас аюулгүй байдал хэр хангагдах вэ гэсэн асуудал гарсан учраас ингэж заасан байгаа.
-Ярилцлагын төгсгөлд улс төрийн сэдэвтэй асуудлаас тодруулчихъя. Засгийн газар тун удахгүй бүрдэх нөхцөл бүрдлээ. Бүх нам эвслээс оруулах талаар ярьж байна. Та ямар байр суурьтай байна вэ?
-Бүх нам эвслүүд Засгийн газарт орж ажиллаасай гэж хүсч байгаа. Мэргэжлийн, Үндэсний эв нэгдлийг хангасан Засгийн газар байгуулагдаасай гэж харж байна. 100 хувь гаднаас гэж хэлэхгүй. Гэхдээ ихэнх нь гаднаас орж ажиллах хэрэгтэй байна. Өнгөрсөн хоёр жилд УИХ-ын гишүүн сайдуудтай байхын зовлонг өөрийнхөө биеэр мэдэрсэн. Сайдад ямар нэг шаардлага тавьж болдоггүй, сайдаас ямар нэг мэдээлэл авч болдоггүй.
Яагаад гэхээр, УИХ-ын гишүүн гэдэг талаасаа ижилхэн мэдээлэлтэй байгаа гэсэн асуудлаар ханддаг. Сайд гаднаас байвал УИХ-ын гишүүний хувьд сайдыг дуудаж ирээд шаардлага тавьдаг, асуудлыг нь сонсдог, лавладаг, өөрийнхөө асуудлыг ойлгуулдаг байдлаар ажиллах боломжтой. Өнөө маргаашийн явуургүй улстөржилт биш өргөн далайцтай хамтарч ажиллах л чухал болоод байна. Засгийн газрыг унагахад идэвхтэй үүрэг гүйцэтгэсэн кноп дарснаараа нэлээд их муулууллаа, намдаа ч их ад үзэгдлээ. Хэдэн мянган намын гишүүд эсэргүүцлээ илэрхийлсэн.
Гэхдээ нэг л зүйлийг ойлгох хэрэгтэй. Сүүлдээ төрийн ажил урагшаа явахаа больсон. Улстөрчид албан тушаалдаа дурлаж, хямралаас гаргах нөхцөл байдал харагдахгүй болчихсон. Тийм учраас Засгийн газарт хариуцлага тооцсон. Дараагийн Засгийн газар илүү сайн ажиллахад мэдээж хяналт тавьж, шахаж шаардаж ажиллана.
-Яамдуудын тоог хэд байхаар шийдвэрлэвэл зөв гэж харж байна вэ?
-Энэ талаар мэдээлэл алга. Ерөнхий сайд асан Н.Алтанхуягийн сүүлд нэгтгэсэн хувилбар илүү оновчтой болов уу гэж харж байна.